1 Mna ghamatsuwa agho Waisiraeli tsawakala wahela mfalume, na mna matsuwa ghagho iwanu wa likabila lya Dani wang'ali webamila isi yawo wenyegho ya ukukala, kwaapfila ng'awadahile baye ukwingila mna isi iwagholelighwe iwe yawo, ka pfaghali ghamakabila ghangi gha Isiraeli. 2 Apfo iwanu wa Dani watuma wanu watano wana tsingupfu iwolawa Zora na iwolawa Eshitaoli. Iwanu awo walawa mna chila lukolo mna likabila lya Dani, na watumighwa waghende kuipelemba isi ayo. Apfo iwanu awo wapfika mna isi ya ipfidunda pfa Efuraimu, ukaye kwa Mika, wawasa kuko.

3 Hawang'ali wa ukaye kwa Mika, watanga apfila pfayolonga imsongolo Mlawi, baho wamhundukila na wamghutsa, "Nani yakughalile ahano? Utenda choni ahano? Heule kwa ahano?"

4 Yeye kawedika, kawalongela, "Mika kanyika ahano nimsang'anile, niwa mtambika wake." 5 Wamlongela, "Twokulomba utughutsile kwa Imulungu ka ghumwanza ghwatughenda ghutsonogha." 6 Mtambika ayula kawedika, "Mleke kwalangula chinu chochose, IMNDEWA yuyo iyomlongotseni mna ghumwanza ghwenu."

7 Iwanu awala watano woka, wapfika Laisha. Wawona wanu iwakalile ako, apfila pfawakalile tseghamba, ka pfawokalile iwanu wa Sidoni. Ng'awolongagha na munu baye wala ng'awakwalangula chinu baye, tsawenela na chila chinu chili muisi. Wakala kutali na Wasidoni na tsawahela mbuli na munu wowose. 8 Iwanu awo watano hawoyile Zora na Eshtaoli, ndughu tsawo wawaghutsa, "Ako mwonile choni?"

9 Nawo wedika, "Twinuke lelo, tugheluke tukaitowe isi ya Laishi, kwaapfila tuyona isi yawo inogha sideke. Angu lelo chambeta choni? Mleke kupfuka kughenda ako na kuisola isi ayo. 10 Hamtsopfika ako mtsowona iwanu iwokala tseghamba. Isi ayo ng'ulu sideke na ng'aihungukighwe baye na chinu chochose ichili muisi, na Imulungu kamwing'ani isi ayo iwe yenu."

11 Apfo wanu miya sita wa likabila lya Dani aku wakinda tsisilaha tsa ng'ondo walawa ako Zora na Eshtaoli waghenda kwitowa. 12 Wagheluka na wapfika mna ghumji ghwa Kiriati Yearimu, mna isi ya Yuda, na kuko weka ndalo yawo. Apfo pfipfo maghalibi ya Kiriati Yearimu pfahakemighwe Mahane Dani mbaka leloli aino. 13 Kulawa aho waghenda mna isi ya ipfidunda pfa Efuraimu, na wapfika ukaye kwa Mika.

14 Iwanu awala watano iwaipelembe isi ya Laishi wawalongela ndughu tsawo, "Apfi mwomanya ka ng'anda imwe mna tsinganda atsino kuna chitsibao cha mmambagha, na chinyagho cha mbiki ichibakighwe fetsa, na chinyagho cha ukulubula, na pfipfila kuna pfinyagho pfingi? Lelo ng'ambe mwomanya cha ukutenda." 15 Apfo waghenda mna ing'anda ya Mika, kwayakalile imsongola Mlawi na wamghutsa yoghendelelatse. 16 Baho iwanu awala miya sita wa likabila lya Dani, iwadahile kwitowa ghoya wema hana lilango.

17 Iwanu awala watano iwaghendile kuipelemba isi wengila mghati na wasola ichinyagho achila, ichitsibao, na ipfinyagho pfingi pfa imilungu. Na aku imtambika ayula kema hana lilango hamwe na iwanu awala miya sita iwakindile tsisilaha tsawo.

18 Iwanu awano hawengile mng'anda mwa Mika na kusola ichisibao cha mmambagha na ichinyagho acho ichibakighwe fetsa, na ichinyagho cha ukulubula na pfinyagho pfingi ipfili mna ing'anda aila, baho imtambika kawona, kawaghutsa, "Mtenda choni?"

19 Wamlongela, "Nyamala! Uleke kulonga chinu chochose. Tuke wose, uwe aba wetu na mtambika wetu. Angu chihi chinoghile kuna ghweghwe, uwe mtambika wa kabila limwe lya Isiraeli au uwe mtambika wa munu yumwe?" 20 Imtambika ayo hayahulike apfo, ghumoyo ghwake ghudeng'elela. Apfo kasola ichitsibao cha mmambagha achila na ichinyagho cha fetsa, na chinyagho cha ukulubula, kuya koka nawo.

21 Apfo wahunduka woka aku wawalongotsa iwana wawo na iwanyama wawo na ipfinu pfawo pfose.

22 Hawapfikile kutali chidogho kulawa hana ing'anda ya Mika, iwanu awala iwakalile mna tsing'anda itsili habehi na ing'anda ya Mika tsawakemighwa hamwe, nawo wawatsumila mbaka wawapfika iwanu wa likabila lya Dani, 23 na wawakemelela. Iwanu wa likabila lya Dani wahunduka na wamghutsa Mika, "Una choni ghweghwe mbaka kutsa na wanu awano wose?" 24 Naye Mika kawedika, "Msola milungu yanihongole na mumsola mtambika wangu na mka naye. Angu nene nina chinu chachi keli? Heule mwongutsa, ‘Una choni?’ "

25 Iwanu wa Dani wamwidika, "Uleke kulonga na twetwe hela iwanu wana imaya watsokutsila na kukukoma ghweghwe na iwanu iwali mkaye mwako." 26 Apfo wanu wa likabila lya Dani woka, naye Mika hayonile wana bapfu kubita yeye, kahunduka koya ukaye yake.

27 Wanu wa Dani tsawasola pfinu pfose pfayahongole Mika, na imtambika wake, waghenda Laishi kuna iwanu iwakalile tseghamba. Wawakoma iwanu iwakalile mumo kwa mimaghe na kuilakatsa isi yawo. 28 Tsakuduhu munu iyawapfile iwanu, kwaapfila tsawakala kutali na wanu wa Sidoni, na tsawahela sale wowose ayula, isi yawo tsaikala mna lwanda lwa Beti Rehobu na wanu wa kabila lya Dani waghutsenga keli ghumji aghwo. 29 Isi ayo ghumwande ing'ali ikemighwa Laishi, lelo sambi woikema Dani taghwa lya sekulu wawo, yeye tsa mwana wa Yakobu. 30 Iwanu wa Dani wapfimitsa ipfinyagho apfo ili wapfitamanile, naye Yonasani mwana wa Gerishomu na mtsukulu wa Musa, na wanaghe wawa watambika mna likabila lya Dani mbaka matsuwa aghala iwanu hawaghalighwe kuna utumwa.

31 Iwanu wa likabila lya Dani waghendelela kupfitambikila ipfinyagho apfila pfayahongole Mika, matsuwa ghose ahala lihema lya Imulungu halikalile ako Shilo.