1 Waisiraeli watenda keli ghehile hambele ha IMNDEWA, naye IMNDEWA kawaleka watowighwe na Wamidiani kwa miyaka saba. 2 Wamidiani tsawawatendela pfihile ng'ani Waisiraeli, mbaka Waisiraeli wehimbila mapondo na tsimango kupfidunda pfiwe hanu ha ukwipfisa. 3 Chila Waisiraeli hawang'ali wohanda tsimbeghu mmighunda, Wamidiani na Waamaleki na iwanu wa ako mashariki wang'ali wakutsa kuwatowa. 4 Iwanu awo weka ndalo muisi, wahinya ipfijo pfawo pfose pfili muisi mbaka haughenda Gaza, wawaboka wang'olo, wang'ombe na wapfihongwe, wala ng'awawalekele chinu chochose Waisiraeli.

5 Wang'ali wakutsa wengi kulonga nzighe, wawo na ng'ombe tsawo, na mahema ghawo, tsang'aidahika baye ukuwapeta pfawakalile wengi iwanu awo hamwe na ngamiya wawo, nawo tsawengila muisi amwo ili kuihinya isi ayo. 6 Wamidiani wawatenda Waisiraeli wawe nyondenyonde, apfo Waisiraeli wamlilila IMNDEWA yawapfile.

7 Waisiraeli hawamlilile IMNDEWA yawalapfile ghamaghayo ghawapatile kulawa kwa Wamidiani, 8 IMNDEWA kawaghalila nabii, naye kawalongela apfino: Achino chicho IMNDEWA, Imulungu wa Isiraeli, chayolonga, "Tsaniwalongotsa mgheluke kulawa isi ya Misiri, kulawa isi yamkalile mwa watumwa. 9 Niwakombola mna ghamoko gha Wamisiri, na mna ghamoko gha awala wose iwawadununze, niwawinga hambele henu hamng'ali mkutsa, na kuweng'a mwemwe isi yawo. 10 Kuya niwalongela apfino, nene na IMNDEWA, Imulungu wenu, mleke kuitamanila imilungu ya Waamori, wane isi yamuisolile, lekeni mwemwe ng'amnitegheletse baye."

11 Malaika wa IMNDEWA kaghenda, kakala hasi ha ghumbiki ghwa mwaloni ako Ofura, ghwa Yoashi, wa lukolo lwa Abiezeri. Na Gidioni imwanaghe ayo Yoashi yang'ali yobeta ngano mghati mwa lipondo lya ukukamila tsinzabibu, yaifise ili Wamidiani waleke kuyona.

12 Imalaika wa IMNDEWA hayamlawile Gidioni, kamlongela: "IMNDEWA kahamwe naghwe, ghweghwe yauli mtowa ng'ondo yaulihela wogha."

13 Gidioni kamwidika kalonga, "Ghwe mfalume wangu, ka IMNDEWA Imulungu ka hamwe na twetwe, heule ghatupatile aghano ghose? Na tsili kwani tsisang'ano tsake itsikangawatsa, tsawatupetele iwabala wetu, ahala hawalongile, ‘Pfihi si IMNDEWA baye yatughalile akuno kulawa Misiri?’ Lekeni lelo IMNDEWA katwasa na katutenda tutowighwe na Wamidiani!"

14 IMNDEWA kamuhundukila kamlongela, "Ghenda kwa tsingufu tsako tsitsino tsauli natso, ukawakombole Waisiraeli kulawa mna ghamoko gha Wamidiani. Pfihi si nene baye yanikutuma?"

15 Gidioni kamwidika, "Leka ghwe IMNDEWA! Nitsodahatse nene kuikombola Isiraeli? Ulole, ilukolo lwangu nene lwa nyondenyonde kubita kolo tsose mna likabila lya Manase, na nene nimwenyegho sili chinu baye kubita wose mna ikaye ya aba wangu."

16 Naye IMNDEWA kamlongela, "Nene nitsakuwa hamwe na ghweghwe, na nitsokutenda uwakome ghendo Wamidiani ka apfila kokoma munu yumwe."

17 Gidioni kamwidika, kalonga, "Ka ghweghwe kunitoghola, ungaye chitango nene nimanye ka ghweghwe yuyo yaulonga na nene. 18 Nokulomba uleke kuka ahano mbaka nene mbuye na kukughalila nzawadi yangu na kuyika hambele hako." Na IMNDEWA kalonga, "Ghoya, nitsobeta ahano mbaka haukuya."

19 Gidioni kaghenda mng'anda mwake, kambika nyama ya mene mdoghodogho, na kwa usaghe wa makimbo kumi koka pfighate ipfilihela hamila kaghuma inyama mna ichiseghe, na ghumtsuho kaghuma mchiha, kuya kamghalila ahala hasi ha ghumbiki ghwa mwaloni, na kayika hambele hake. 20 Na imalaika wa Imulungu kamlongela, "Usole inyama na ipfighate apfo upfike mchanya mwa libambalawe alino, kuya umwaghile ghumtsuho mchanya mwake." Naye Gidioni katenda pfipfo. 21 Imalaika wa IMNDEWA kagholosa ing'weku ikalile mmoko mwake, na kusa kwa ing'weku aila kadonza inyama aila na ipfighate apfila. Baho moto ghulawa mbambalawe, ghulambita ghendo inyama na ipfighate apfo. Na baho imalaika wa IMNDEWA kagha.

22 Gidioni hayatangile kama ayula tsakakala malaika wa IMNDEWA, kadalamka kalonga, "Nyifa nene! Ghwe MNDEWA Imulungu! Kwaapfila nimwona imalaika wako kwa tsinenge tsangu."

23 Lekeni IMNDEWA kamlongela, "Ukale tseghamba, uleke kupfuka, ng'utsakufa baye." 24 Kuko Gidioni kamtsengela IMNDEWA matsabahu, na kaikema, "IMNDEWA katindiwalo." Imatsabahu ayo mbaka leloli aino ing'ali kuko Ofura, ghumji ghwa Waabiezeri.

25 Ichilo chicho IMNDEWA kamlongela, "Msole ing'ombe mmale wa keli wa aba wako, iyana miyaka saba, uibomole imatsabahu ya Baali iyali nayo aba wako na uchighane ichinyagho cha Ashera ichili habehi nayo. 26 Kuya umtsengele matsabahu IMNDEWA, Imulungu wako, mna iludando aluno kwa mabwe ighapangighwe ghoya, kuya umsole ing'ombe ayula wakeli undapfile nambiko ya kulakatsighwa kwa kutumila tsing'odi atsila tsa ichinyago achila cha Ashera chautsochighana." 27 Apfo Gidioni kasola watumwa wake kumi, na katenda ka pfayamlaghitse. Lekeni kwaapfila tsakawapfuka iwanu wa ikaye ya aba wake na iwanu wa ghumji, ng'adahile kughatenda agho nemisi baye, ila kaghatenda nechilo.

28 Nemitondo iwanu wa ghumji hawalamke wona imatsabahu ya Baali ibomolighwa, na ichinyagho cha Ashera ichikalile habehi nayo chighanighwa na matsabahu ingi itsengighwa na mchanya mwake ing'ombe mmale wa keli kalakatsighwa nambiko.

29 Nawo weghutsa, "Nani iyatendile ichinu achino?" Hawaghutsile ghutsile na kupelemba walongelighwa, "Gidioni, imwana wa Yoashi, yeye iyatendile ichinu achino." 30 Apfo iwanu wa ghumji wamlongela Yoashi, "Mlete imwanagho ahano yakomighwe, kwaapfila kaibomola imatsabahu ya Baali na kachighana ichinyagho cha Ashera ichikalile habehi nayo."

31 Lekeni Yoashi kawalongela iwanu awala iwaghendile kwisonga naye, "Pfihi mwemwe mwodaha kumwamila Baali? Mwoghetsa ukumkombola? Munu wowose iyomwalamila na yakomighwe pfipfino ng'ana kuche. Ka Baali Imulungu ghendo mlekeni yeyamile imwenyegho kwa apfila kuna munu kaibomola imatsabahu yake." 32 Apfo kulawa litsuwa alyo wamkema Gidioni "Yeru Baali," mana yake, "Baali yeyamile mwenyegho." Kwaapfila kaibomola imatsabahu yake.

33 Kuya Wamidiani, Waamaleki na wanu wose iwokala ubali wa mashariki wetingana hamwe, waloka ghumto ghwa Yoridani na weka tsindalo tsawo mna ilwanda lwa Yezireeli. 34 Pfipfila Ghumuhe ghwa IMNDEWA ghumtsila na kumlongotsa Gidioni, naye katowa malati kawakema Waabiezeri watse wamuwinze. 35 Kuya katuma wasenga waghende mna isi yose ya Manase wawakeme iwanu wamuwinze, na wasenga wangi kawatuma waghenda kuwakema iwanu wa makabila gha Asheri na Zabuloni na Nafutali, nawo waghenda kwitingana naye.

36 Pfipfila Gidioni kamlongela Imulungu, "Ka kutsowakombola Waisiraeli kubitila nene ka pfaulongile, 37 ulole nakwika chigotsi cha ng'olo mna ichibwalu cha ukubetela ingano, ka ichigotsi acho chitsakuwa na tungwe chiliyeka, na isi yose ing'akala yahela ghendo litungwe, aho nitsomanya ghendo ka kutsowakombola Waisiraeli kwa ghumoko ghwangu ka pfulongile." 38 Na ilawila pfipfo, kwaapfila nemitondo hayalamke kona litungwe mchanya mwa ichigotsi, kachikama ichigotsi acho, litungwe limema bakuli ngima. 39 Kuya Gidioni kamlongela Imulungu, "Uleke kungudubukila, leka nikulombe chinu chingi keli. Nokulomba unileke nighetse keli kwa ichigotsi chichino. Lelo nobama ichigotsi achino chiliyeka chisakale, lekeni isi yose iwe na litungwe." 40 Ichilo acho Imulungu katenda pfipfo. Ichigotsi chiliyeka chisakala, na isi yose iwa na litungwe.