1 Wanu wose wa Israeli iwolawa kuna ghumji ghwa Dani mbaka mji ghwa Beeri Sheba na awala iwolawa mna isi ya Gileadi walawa, wawa chinu chimwe na waghenda kwitingana hamwe ako Mizpa, hambele ha IMNDEWA. 2 Pfilongotsi wose wa ghamakabila gha Isiraeli tsawakala hambele ha mtingano ghwa iwanu we Imulungu, na wose tsawamale wa ng'ondo tsa wa laki nne iwoghenda kwa maghulu na iwakindile mimaghe yawo. 3 Wanu wa Benjamini nawo wahulika ka Waisiraeli wayao wose wagheluka waghenda Mizipa. Kuya Waisiraeli wamghutsa Mlawi, "Tulongele, ighehile aghano ghalawiletsa?" 4 Apfo Mlawi ayula, yana ipinga iyakomighwe kawalongela, "Nene na pinga wangu tsatupfika mna ghumji ghwa Gibea, ighuli muisi mwa wanu wa Benjamini, tukawase kuko. 5 Lekeni iwanu wa Gibea watsa nechilo waitsunguluka ing'anda yaniwasile, wabama wang'ome nene, wawasa na pinga wangu wa kunze kwa ngupfu mbaka kafa. 6 Nilusola ilukuli lwa ipinga wangu nimghana pfihande hande, chila chihande nichighala kuna likabila limwe lya isi ya Isiraeli, kwaapfila watenda chinu achino chihile na cha chachinyala mna isi ya Waisiraeli. 7 Lelo mwemwe Waisiraeli, mwighutse, na mlonge mtsotenda choni." 8 Iwanu wose wenuka lumwe walonga, "Kuduhu hata yumwe iyatsakuya ukaye yake wala iyakuya kuna lihema lyake, 9 lekeni tutsowatendela iwanu wa Gibea ichinu achino. Tutsolamla kwa kwasa simbi pfatutsowatowa. 10 Tutsosola wanu kumi mna chila wanu miya wa ghamakabila ghose gha Isiraeli, na wanu miya mna chila wanu elufu imwe, na wanu elufu imwe mna wanu elufu kumi, iwanu awano ng'onde yawo itsakuwa kuwaghalila ichijo maasikali iwowatowa iwanu wa Gibea iwali mna isi ya Benjamini, kwa ichinu chihile na cha chinyala chawatendile mna isi ya Isiraeli." 11 Iwamale wose wa Isiraeli wetingana hamwe, wose wawa chinu chimwe kwa kughutowa ghumji ghwa Gibea. 12 Iwanu wa ghamakabila gha Isiraeli watuma wanu mna isi yose ya likabila lya Benjamini, walonga, "Apfi achi chinu chachi chihile chamtendile? 13 Lelo muwalapfe wanu awo wa Gibea iwehile ng'ani tuwakome, na tulapfe chinu achino chihile mna Isiraeli." Lekeni Wabenjamini walema kuwategheletsa ndughu tsawo wana wa Isiraeli. 14 Lekeni iwanu wose wa likabila lya Benjamini walawa mna imiji yawo, wetingana ako Gibea, waghende waketowe na Waisiraeli. 15 Wanu wa likabila lya Benjamini wawakema hamwe wamale elufu ishilini na sita iwakindile mimaghe iwolawa mna imiji yawo mna litsuwa lilyo, iwodaha kwitowa, na wawasaghula iwanu miya saba kulawa kuna iwanu iwokala Gibea. 16 Mna iwanu awo wose iwasaghulighwe, tsakuna wanu miya saba iwakwasila ghoya ghumoko ghwa kumoso, chila yumwe tsakadaha ukwasa libwe kwa ng'umbewe na kodaha kulenga lupfili lumwe kwa ng'umbewe na kulupata. 17 Waisiraeli wawakema hamwe wanu laki nne kulawa mna ghamakabila ghangi kuleka likabila lya Benjamini, iwadahile kwitowa kwa mimaghe.

18 Waisiraeli wagheluka, waghenda hanu ha ukutambikila ako Beteli, kuko wamlomba Imulungu, walonga, "Nani mna twetwe iyatsotulongola kughenda kuwatowa Wabenjamini?" Na IMNDEWA kawedika, "Iwanu wa likabila lya Yuda wawo iwatsolongola." 19 Apfo Waisiraeli woka nemitondo, waghenda kwika indalo habehi na Gibea. 20 Waisiraeli waghenda kwitowa na wanu wa Benjamini, na waweka iwamale wa ing'ondo kulolesa ghumji ghwa Gibea. 21 Iwanu wa likabila lya Benjamini walawa kunze mwa ghumji ghwawo ghwa Gibea, wetowa na Waisiraeli, na wawakoma Waisiraeli elufu ishilini na mbili mna tsuwa limwe. 22 Lekeni Waisiraeli weghuma ngupfu wawo kwa wawo, weika ghoya kwa kwitowa keli na Wabenjamini, bahala hawakalile tsuwa lya kwanza. 23 Ng'ana watende apfo baye Waisiraeli tanu tsawaghenda hanu ha kumtamanila Imulungu, wamlilila Imulungu mbaka nemihe, wamlomba Imulungu apfino, "Pfii tugheluke keli kwitowa na Wabenjamini ndughu tsetu?" IMNDEWA kawedika, "Mgheluke mketowe nawo." 24 Kuya Waisiraeli wasoghela habehi mna tsuwa lya keli wakawatowe Wabenjamini. 25 Mna litsuwa alyo lya keli Wabenjamini walawa Gibea waghenda kuwatowa Waisiraeli wayao, wawakoma Waisiraeli elufu kumi na nane iwadahile kwitowa na mimaghe. 26 Iwamale wose wa ing'ondo wa Waisraeli wagheluka Beteli. Wakala kuko aku womlilila Imulungu na ng'awajile chinu baye mbaka nemihe, wamlapfila IMNDEWA Imulungu nambiko tsa ukulakatsighwa na nambiko tsa ukukala tseghamba. 27 Waisiraeli wamghutsa Imulungu ako Beteli, kwaapfila lisanduku lya lilaghano tsakuko kwalili mna ghamatsuwa agho. 28 Naye Finehasi, mwana wa Eleazari mtsukulu wa Aruni, tsakakala mtambika. Iwanu wamghutsa Imulungu, "Apfi tugheluke keli twiketowe na Wabenjamini ndughu tsetu?" IMNDEWA Imulungu kawedika, "Ghendani ilupfi nene nitsomwapfilani kuwatowa."

29 Waisiraeli waweka iwanu wa ing'ondo wepfise na waghutsunguluke ghumji ghwa Gibea. 30 Apfo Waisiraeli wagheluka, waghenda kwitowa na wanu wa likabila lya Benjamini mna litsuwa lya kadatu, wema chila munu hanu hake aku woghulolesa ghumji ghwa Gibea, ka pfawalongole kutenda. 31 Wabenjamini walawa kunze wetowe nawo na wakweghighwa walawe mna ghumji aghwo. Wanza kuwakoma Waisiraeli mna isi ili mwatsi mna nzila ighenda Beteli na inzila ighenda Gibea. Na Waisiraeli iwakomighwe wopfika salasini. 32 Wabenjamini walonga, "Tuwatowa ka pfatulongole kuwatowa." Lekeni Waisiraeli walonga, "Twetwe tutsume, tuwakweghe walawe mna ghumji ghwawo watse akuno kuna inzila ng'ulu."

33 Apfo lijeshi kulu lya Isiraeli walawa hanu hawo waghenda kukala keli ako Baali Tamari, na awala iwopfitsia walawa hanu hawo hawakalile wanza kwitowa. 34 Kuya wanu elufu kumi iwodaha kwitowa pfinoghile iwasaghulighwe kulawa mna ghamakabila gha Isiraeli waghenda kughutowa ghumji ghwa Gibea. Ing'ondo tsaiwa ng'ulu mna litsuwa alyo, lekeni Wabenjamini ng'awamanyile ka ukukomighwa kwao kwa habehi. 35 IMNDEWA kawapfila Waisiraeli kuwatowa Wabenjamini, na wawakoma Wabenjamini elufu ishirini na tano na miya imwe mna litsuwa alyo. Wose awano tsawadaha ukwitowa kwa imimaghe. 36 Na Wabenjamini watanga ka watowighwa kwaapfila Waisiraeli tsawoya kuchughu ka apfila wowatsuma wanu wa Benjamini, ili kuwaleka awala iwepfisile habehi na Gibea wawatowe Wabenjamini.

37 Iwanu iwepfisile wasumka kutsumila Gibea, wengila mna ghumji na kumkoma chila munu yakalile kuko. 38 Waisiraeli tsawelaghana na iwanu iwang'ali wepfisa ka wang'atendile chitango, baho hawatsolyona lihosi mlanga ililawa mna ghumji aghwo, waghutowe ghumji aghwo. 39 Na baho iwanu wa kabila lya Benjamini wawakoma Waisiraeli ka selasini, na welongela, "Tuwatowa ka pfatutendagha." 40 Lekeni halilawile libingu lya hosi mna ghumji, baho wanu wa Benjamini walola kuchughu, wakangawala kwona lihosi mlanga kulawa mna ghumji ghwawo ighung'ali ghulakala. 41 Baho Waisiraeli wahunduka, na Wabenjamini tsawengilighwa na wogha, kwaapfila watanga ka ukumala kwawo tsakupfika. 42 Apfo watsumila kunyika, lekeni ng'awadahile baye kuhona. Waghoghighwa haghatighati ha iwanu wa ing'ondo wa Isiraeli, na iwanu wa ing'ondo iwang'ali wolawa kuna ghumji wawakoma. 43 Wawapfingilila Wabenjamin, na wawawinga mbaka Gibea ubali wa mashariki, aku wowakoma wanu wengi. 44 Mna litsuwa alyo wanu elufu kumi na nane iwadahile kwitowa pfinoghile wa likabila lya Benjamini wakomighwa. 45 Wabenjamini wangi iwasighale watsumila kunyika kuna libambalawe lya Rimoni, na Waisiraeli wawakoma wanu elufu tano hawang'ali wa mnzila wotsuma. Waisiraeli waghendelela kuwawinga Wabenjamini iwasighale mbaka Gidomu na kuko wawakoma wanu wangi elufu mbili. 46 Mna litsuwa alyo Wabenjamini elufu ishilini na tano iwadahile kwitowa na mimaghe wakomighwa. Awano wose tsawakubuhu mna ukwitowa.

47 Lekeni wanu miya sita wa likabila lya Benjamini watsumila kunyika kuna libambalawe lya Rimoni, na wakala kuko miyetsi mine. 48 Waisiraeli wawoyila keli Wabenjamini iwasighale na wawakoma kwa limaghe wamale, wapinga, iwana na wanyama wawo, na imiji yose yawaipfikile wailakatsa kwa moto.