1 Mna litsuwa alyo, Debora na Baraki mwana wa Abinoamu wemba wila auno:

2 Pfilongotsi tsawalawila kuilongotsa Isiraeli,

na iwanu tsawelapfa kwa kubama wenyegho,

mtunyeni IMNDEWA!

3 Hulikeni mwemwe muwafalume!

Muwambe ghamaghutwi,

mwemwe muwakulu!

Nene nitsomwimbila IMNDEWA,

nitsomtowela chilimba IMNDEWA,

Imulungu wa Isiraeli.

4 Ghwe IMNDEWA, haulawile ako Seiri,

hauhulumke mna ichidunda cha Edomu,

isi tsaidedema,

kulanga kulaghatsa matsi,

nagho ghamabingu ghalaghatsa mvula.

5 Ipfidunda pfihighisika hambele ha IMNDEWA,

Ona, hata ichidunda cha Sinai chihighisika hambele ha IMNDEWA, Imulungu wa Isiraeli.

6 Mna ghamatsuwa gha Shamgari,

mwana wa Anati,

mna ghamatsuwa gha Yaeli,

nzila ng'ulu tsikala tsahela wanu,

iwali mna ghumwanza wang'ali wakwang'a nzila tsili mmbalimbali.

7 Iwanu iwolima tsawahaduhu,

tsawahupa mna isi ya Isiraeli,

mbaka nene Debora haninuke,

haninuke kama mamo mna isi ya Isiraeli.

8 Wesaghulila milungu ingi,

baho kulawila ng'ondo muisi.

Kuduhu hata yumwe yakindile mgoha au ngawo,

mna iwanu elufu alubaini wa Isiraeli.

9 Ghumoyo ghwangu ghowadeng'elela iwakulu wa ing'ondo wa Isiraeli,

hamwe na awala iwelapfile wenyegho mna iwanu.

Mtunyeni IMNDEWA!

10 Mwemwe yamdina wapfihongwe watselu,

na yamkalila matandiko gha bei ng'ulu ighakwikighwa mchanya mwawo,

na mwemwe yamkwanga mnzila,

walongeleni iwanu imbuli aino.

11 Wategheletseni iwanu iwakwimba iwali

hana ipfisima pfa ghamatsi,

aho wakwimba ukuhuma kwa IMNDEWA,

ukuhuma kwa iwanu wake mna isi ya Isiraeli.

Baho iwanu wa IMNDEWA wahulumka kuna ghamalango gha ghumji.

12 Lamka, lamka, Debora!

Lamka, lamka, wimbe wila!

Winuke, Baraki,

usole iwanu wako wauwaghoghile kung'ondo,

ghweghwe mwana wa Abinoamu.

13 Baho iwanu iwasighale wahulumka,

iwanu wa IMNDEWA waghenda kwitowa na awala wane tsingupfu.

14 Watsa wanu kulawa Efuraimu,

iwang'ali wokala kwa Waamaleki,

kuya iwanu wa Benjamini nawo tsawahulumka,

kulawa Makiri tsawahulumka pfilongotsi wa ing'ondo,

na kulawa Zabuloni watsa pfilongotsi wakulu.

15 Iwakulu wa Isakari watsa hamwe na Debora,

nawo iwanu wa Isakari tsawamtoghola ng'ani Baraka,

nawo wasumkila ukughenda hamwe naye mbaka mchiwala.

Lekeni tsikolo tsa Rubeni tsatsighola,

imimoyo yawo ing'ali ikwalangula waghende au waleke kughenda.

16 Hebali mkalile kuchughu hamwe na wang'olo?

Pfihi mng'ali mhulikitsa tsifilimbi tsa iwadimi pfawokema wang'olo?

Lekeni tsikolo tsa Rubeni tsatsighola,

imimoyo yawo ing'ali ikwalangula waghende au waleke kughenda.

17 Wagileadi tsawakala kumwambu mwa Yoridani.

Na hebali Wadani tsawakala mna tsimeli matsuwa mengi?

Waasheri wawo tsawasindamala kumwani mwa ibahari,

wakala mna tsibandali tsawo.

18 Wazabuloni wawo iwanu

iwakalile tiyali kulapfa ughima wawo mna lifwa,

na Wanafutali nawo watenda pfipfo mna ichibwalu cha ing'ondo.

19 Iwafalume watsa, wetowa ng'ondo,

iwafalume wa Kanaani wetowa ako Taanaki,

habehi na tsimbwibwi tsa Megido,

lekeni ng'awabokile fetsa wala chinu chochose baye.

20 Nako kulanga tsinondo natso tsatsitowa ng'ondo,

tsatsiwinza tsinzila tsake, tsatsitowa na Sisera.

21 Ghamatsi gha mto Kishoni ghamema ghawakululusa kutali,

ghumto aghula ghwa ghumwande,

ghumto ghwa Kishoni.

Ghwe muhe ghwangu,

ughendelele hambele kwa ngupfu!

22 Baho tsing'wato tsa wafalasi tsibita kwa chisindo,

walapfa chisindo hawang'ali wotsuma kwa ngupfu.

23 Imalaika wa IMNDEWA kolonga apfino:

"Ghulighiteni ghumji ghwa Merozi,

walighiteni kwa usungu iwanu wake,

kwaapfila ng'awatsile kune ing'ondo ya IMNDEWA baye,

kumwapfila IMNDEWA ukwitowa na iwehile wake wane ingupfu."

24 Yabarikighwe Yaeli, mwehe wa Heberi, Mkeni, kubita wapinga wose.

Pfipfo, yabarikighwe kubita wapinga wose iwokala mna ghamahema.

25 Sisera kalomba matsi, naye kamwing'a matsiwa,

kamghalila matsiwa gha mtindi mna libakuli lya ukunwela iwakulu.

26 Kwa moko ghumwe kakinda chighingi cha hema,

na kwa ghumoko ghwa kujilo kakinda inyundo ya fundi,

kamhonda litwi Sisera,

kamtula na kambang'anyula ichihanga chake.

27 Sisera kenama, kaghwa,

kawasa tulu ghendo hamaghulu ghake.

Bahala hayenamile baho kaghwa, kuya kafa.

28 Mai wake Sisera kasungulila hana lidilisha,

na baho hana lidilisha kanza ukulila, kalonga:

"Hebali ghumtuka ghwake ghwa chuma ighukweghighwa na falasi ghukawa ukupfika?

Mbona ichisindo cha tsing'wato tsa wafalasi wa imituka yake chokawa ukuhulikika?"

29 Wapinga iwakengele iwang'ali womtumikila wamwidika, wamhotsa ghumoyo,

naye kaghendelela kwilongela:

30 "songaha wegholela ipfinu pfawabokile kung'ondo,

mwali yumwe au weli kwa chila mmale yumwe,

bwende lya mighala ya ng'olo lya langi kwa ajili ya Sisera,

bwende lya mighala ya ng'olo lighelighwe unzolingo,

na mitandilo mili ya unzolingo mwingi kwa ajili ya isingo yangu!"

31 Ghwe IMNDEWA! Awala iwokuhila wose wafe.

Lekeni awala iwokukunda wawe ka tsuwa pfalilangatsa ahala halilawa.

Nayo isi ikala tseghamba ghendo kwa miyaka alubaini.