1 Hayafile Abimaleki, kalawila Tola mwanaghe Pua, na mtsukulu wa Dodo, wa likabila lya Isakari, yawakombole Waisiraeli. Tola tsakakala Shamiri mna isi ya ipfidunda pfa Efuraimu. 2 Yeye tsa mlamtsi wa Isiraeli kwa miyaka ishilini na midatu, kuya tsakafa na katsikighwa kuko Shamiri.

3 Hayafile Tola, Yairi munu wa Gileadi kawa mlamtsi wa Waisiraeli kwa miyaka ishilini na mili. 4 Ayo tsakana wana wamale selasini iwang'ali wodina pfihongwe selasini. Pfipfila tsawana miji selasini mna isi ya Gileadi, na mbaka leloli yokemighwa Hawoti Yairi, mana yake miji ya Yairi. 5 Yairi tsakafa na katsikighwa kuko Kamoni.

6 Waisiraeli tsawamtendela keli ghehile IMNDEWA Imulungu, waitambikila imilungu ya Baali, imilungu ya Ashitoreti, imilungu ya Aramu, imilungu ya Sidoni, imilungu ya Moabu, imilungu ya wana wa Amoni, na imilungu ya Wafilisti, nawo wamleka IMNDEWA Imulungu na wala ng'awamsang'anile baye. 7 Apfo IMNDEWA Imulungu kawonela maya Waisiraeli, kawautsa na kawatenda watowighwe na Wafilisti, na Waamoni. 8 Nawo wawatsupfa na kuwadununza Waisiraeli iwakalile Gileadi mna isi ya Waamori ili ubali wa mashariki ya ghumto ghwa Yoridani kwa miyaka kumi na minane. 9 Waamoni nawo tsawaloka ghumto ghwa Yoridani kwitowa na makabila gha Yuda, Benjamini na Efuraimu. Na Waisiraeli tsawaghanzika ng'ani.

10 Apfo Waisiraeli wamlilila IMNDEWA, walonga, "Tukutendela ghehile, kwaapfila tukuleka Imulungu wetu na tuitambikila milungu ya Baali." 11 Naye IMNDEWA kawalongela, "Angu nene siwakombole baye kulawa kwa Wamisiri, Waamoni, Waamori na Wafilisti? 12 Wasidoni, Waamaleki na Wamidiani, wawo tsawawatsupfa, namwe mndilila nene. Angu nene siwakombole baye kulawa mna ghamoko ghawo? 13 Lekeni mwemwe mndeka na muitambikila milungu ingi, apfo sitsowakombola keli baye. 14 Mke mkaililile imilungu yamuisaghule. Ilekeni iwakombole ahala mwemwe hamtsoghaya."

15 Lekeni Waisiraeli wamlongela IMNDEWA, "Twetwe tutenda nzambi, ututende pfopfose pfaubama, lekeni leloli twokulomba utukombole." 16 Nawo wayasa na kuileka ghendo imilungu ingi ikalile mna wawo, nawo wamtambikila keli IMNDEWA. Naye IMNDEWA ng'abamile baye ukwona keli maghayo gha Waisiraeli.

17 Kuya Waamoni wetingana hamwe, weka indalo yawo ako Gileadi. Nawo Waisiraeli wetingana hamwe na weka indalo yawo ako Mizipa. 18 Kuko pfilongotsi wa iwanu wa Gileadi weghutsa wawo kwa wawo, "Yuhi yatsolongola kwitowa na Waamoni? Iyatsotenda apfo, ayo yuyo iyatsowalongotsa iwanu wose iwokala Gileadi."