1 Abimeleki, imwana wa Gidioni kawaghendela ndughu wose wa mai wake iwokala Shekemu, kawalongela, 2 "Waghutseni iwanu wose wa Shekemu, ‘Chinu chachi chamkona chinogha, iwana wose sabini wa Yeru Baali wawalongotse mwemwe au mwana yumwe yawalongotse?’ Mkumbuke ka nene na damu yenu." 3 Wandughu wa mai wake wawalongela iwanu wa Shekemu aghala ghayawalongele Abimeleki, na iwanu wose wa Shekemu walamla kumuwinza Abimeleki kwaapfila tsa ndughu yawo. 4 Wamwing'a pfihande sabini pfa fetsa ipfilawile mna ing'anda ya Baali Beriti, naye Abimeleki kawaliha iwanu waghobo ili wamuwinze.

5 Kaghenda nawo ukaye kwa aba wake ako Ofira, naye kawakoma ndughu tsake sabini iwanaghe Yeru Baali kwa kuwakoma mchanya mwa bambalawe. Lekeni Yotamu, imwana mdodo wa Yeru Baali, ng'akomighwe baye kwaapfila tsakepfisa.

6 Iwanu wose wa Shekemu na Beti Milo wetingana hamwe hana ghumbiki ighuli habehi na ghumnala ako Shekemu, kuko wamtenda Abimaleki yawe mfalume wawo.

7 Yotamu hayahulike apfo, kaghenda kwima kuna ichidanando cha chidunda cha Gerizimu, naye kakemelela kalonga, "Mwemwe iwanu wa Shekemu ka mwobama Imulungu yawategheletse mwemwe tanu mnitegheletse nene. 8 Tsuwa limwe, imibiki ighenda kwisaghulila mfalume wawo, ighulongela mzeituni, ‘Uwe mfalume wetu!’ 9 Lekeni mzeituni ghwidika, ‘Pfihi ndeke isang'ano yangu ya ukulapfa ghamapfuta, ighowanoghela imilungu na iwanu, ng'ende nikawe mfalume wa mibiki?’ 10 Kuya imibiki ighulongela ghumtini, ‘Utse uwe mfalume wetu!’ 11 Lekeni ghumtini ghwidika, ‘Angu ndeke isang'ano yangu ya ukweleka ghamatunda ighanoghile na ighali mta, na nitse nikawe mfalume wa mibiki?’ 12 Kuya imibiki ighulongela mnzabibu, ‘Utse uwe mfalume wetu.’ 13 Lekeni ghumnzabibu ghwidika, ‘Angu ndeke isang'ano yangu ya ukweleka nzabibu itsilapfa dipfai, inogheletsa milungu na iwanu, ng'ende nikawe mfalume wa mibiki?’ 14 Baho imibiki yose ighulongela mbiki ghwa mihonga, ‘Utse uwe mfalume wetu.’ 15 Ghumbiki ghwa mihonga ghwidika apfino, ‘Ka mwobama ghendo kunisaghula niwe mfalume wenu, mtse mkale hasi ha ichimbeho changu. Lekeni ka ng'ambama ukutenda apfo ghumoto ghulawe mna imihonga yangu na kuilakatsa mieleletsi ya Lebanoni.’"

16 Yotamu kaghendelela kulonga, "Apfo mwakona chamtendile chotogholighwa na chinogha ahala hamumsaghule Abimeleki yawe mfalume? Na mwakona mumtendela ghanoghile Yeru Baali na iwanu wake, kwa aghala ghayatendile? 17 Mkumbuke ka aba wangu tsakawatowela mwemwe, tsakelapfa yafe ili yawakombole mwemwe kulawa kwa Wamidiani. 18 Lekeni leloli muwatowa iwanu wa ikaye ya aba wangu na kuwakoma iwanaghe sabini mchanya mwa bambalawe limwe, kuya mumtenda Abimeleki imwana wa ipinga wake wa kunze yawe mfalume wa iwanu wa Shekemu kwaapfila ka ndughu yenu. 19 Apfo ka mwakona mutnda apfo kwa ghumoyo ghunoghile na kwa kumtoghola Yeru Baali na iwanu wa ikaye yake, lelo deng'eleleni hamwe na Abimeleki, naye yadeng'elele namwe. 20 Lekeni ka si pfipfo baye, ghumoto ghulawe kwa Abimeleki ghuwalakatse iwanu wa Shekemu na Beti Milo, pfipfila ghumoto ghulawe kuna mwemwe iwanu wa Shekemu na Beti Milo ghumlakatse Abimeleki." 21 Kuya Yotamu koka, katsumila Beeri, kakala kuko kwaapfila yang'ali yompfuka indughu yake Abimeleki.

22 Apfo Abimeleki tsakawalongotsa iwanu wa Isiraeli kwa miyaka midatu. 23 Kuya Imulungu kawatenda iwanu wa Shekemu na Abimeleki wesonge, nawo iwanu wa Shekemu wambiduka Abimeleki. 24 Imulungu katenda apfino ili kuliha ukukomighwa kwa iwana sabini wa Yeru Baali, ikutendighwe na Abimeleki na iwanu wa Shekemu iwamwapfile Abimeleki kuwakoma ndughu tsake.

25 Iwanu wa Shekemu waweka iwanu mna ipfidanando pfa ipfidunda wawapfisile na kuwaboka pfinu pfawo iwanu iwobita mnzila, lekeni Abimeleki kahulika imbuli ayo.

26 Kuya Gaali mwana wa Ebedi kaghenda na ndughu tsake kukala Shekemu, na wanu wa Shekemu wamhuwila yeye. 27 Wose walawa waghenda mna imighunda yawo ya minzabibu, wabawa nzabibu tsawo na watsikama walapfa dipfai. Kuya watenda chihungo mna ing'anda ya mulungu wawo, waja na kunwa na wamlighita Abimeleki. 28 Pfipfila Gaali imwana wa Ebedi kalonga, "Angu Abimeleki nani? Na twetwe wanu wa Shekemu tsina nani mbaka tumsang'anile yeye? Angu si mwana wa Yeru Baali baye, na Zebuli si mkulu wake baye? Lelo mwemwe wasang'anileni wanu wa Amori, aba wake Shekemu. Lekeni twetwe heule tumsang'anile Abimeleki? 29 Ka ning'awile mkulu wa iwanu awano, ning'amuwingile Abimeleki. Ning'amlongele apfino, ‘Abimeleki wongetse wanu wako wa ing'ondo, kuya ulawe kunze twitowe.’ "

30 Zebuli mkulu wa ghumji hayahulike ghayalongile Ebedi, kona maya. 31 Naye kawatuma wanu chinyelenyele waghende kwa Abimeleki ako Toma wakalonge, "Gaali mwana wa Ebedi na ndughu tsake wengila mna isi ya Shekemu na wowasongeletsa iwanu mna ghumji wakuhile ghweghwe. 32 Apfo lelo ghweghwe na wanu wako nechilo muye mumbete kwa kwipfisa mna imighunda. 33 Pfipfila nemitondo litsuwa halitsolawa mghende mkaghutowe ghumji aghwo. Gaali hayolawa na wanu wake kutsa kwitowa na mwemwe, uwatowe ka pfaudaha."

34 Apfo nechilo Abimeleki na iwanu wake walawa woka. Kawaghola iwanu wake wakale makingili mane, nawo tsawepfisa mna imighunda habei na Shekemu. 35 Abimeleki na iwanu wake hawamwonile Gaali kolawa kunze, na kema hana lilango lya ghumji, Abimeleki na iwanu wake iwakalile naye walawa hanu ahala hawepfisile. 36 Gaali hayawonile iwanu awo, kamlongela Zebuli, "Ulole iwanu wohulumka kulawa mna ipfidanando pfa ipfidunda."

Naye Zebuli kamlongela, "Chaukona ghweghwe masisila gha ipfidunda na si wanu baye."

37 Lekeni Gaali kalonga keli, "Ulole iwanu wolawila haghatighati ha isi, na iwanu wamwenga wakutsa kubitila nzila ya ghumbiki ghwa mwaloni ghwa walaghutsi."

38 Kuya Zebuli kamlongela, "Ukwighoda kwako lelo kulikwani? Angu si ghweghwe baye yulongile, ‘Abimeleki nani? Na hebali tumsang'anile yeye?’ Lelo awo wawo wauwabetsile, ghenda uketowe nawo." 39 Apfo Gaali kalawa, kawalongotsa iwanu wa Shekemu kwitowa na Abimaleki. 40 Lekeni Abimaleki kamuwinga Gaali, na wanu wengi walaghighwa na waghwa mnzila mbaka hana lilango lya ghumji. 41 Abimeleki tsakakala Aruma, naye Zebuli kawawinga Gaali na ndughu tsake walawe woke mna isi ya Shekemu.

42 Ilupfi yake, Abimeleki kahulika ka iwanu wa Shekemu waghenda kuna imighunda. 43 Apfo kawasola iwanu wake, kawaghola mna makingili madatu, nawo wepfisa mna imighunda. Hayawonile iwanu wolawa mna imiji, kenuka akula kwayepfisile kaghenda kuwakoma. 44 Abimeleki na kingili lyake watsuma, waghenda kulibetetsa lilango lya ghumji, na ghamakingili meli ighasighale waghenda wawatowa iwanu iwakalile kumighunda na kuwakoma. 45 Abimeleki tsaketowa na iwanu iwang'ali wokala mna ghumji aghwo misi yose, mbaka hayaghusolile na kuwakoma iwanu wake. Kuya kaghulakatsa kwa moto ghumji aghwo na kughughela mkele.

46 Iwanu wose iwakalile mna ghumnala ghwa Shekemu hawahulike apfo, watsumila mna imibanda ya ing'anda ya imulungu iyakemighwe Eli Beriti. 47 Abimeleki kahulika ka iwanu iwakalile mna imibanda ya Shekemu wetingana hamwe. 48 Apfo Abimaleki na iwanu wake wagheluka mna ichidunda cha Salimoni, na kasola hoya kaghana putila limwe, kalika mna liyegha lyake. Kuya kawalaghitsa iwanu wake wasumke ukutenda ka pfayatendile yeye. 49 Apfo chila yumwe kaghana putila ka liyaghanile Abimeleki. Na wasola maputila ghawo wagheka mna ubanda utsunguluka ghumji, wabwina ghumoto na kuilakatsa imibanda mikulu itsunguluka ghumji na iwanu wose wa imibanda ya Shekemu wafa. Apfo iwanu wose iwafile wamale na wapinga tsawapetighwa wapfika elufu imwe.

50 Kuya Abimeleki kaghenda Tebezi, kaghutsunguluka ghumji aghwo na kughusola. 51 Lekeni mghati mwa ghumji aghwo tsakuna mnala ghubabale. Iwanu wose wamale na wapinga tsawatsumila kuko, wehindila mghati na wadina mchiswili mwa ghumnala aghwo. 52 Abimeleki kaghenda kuna ghumnala na kughutowa, kuya kaghusoghelela ghumlango ghwa ghumnala ili yaghulakatse kwa moto.

53 Lekeni pinga yumwe kamwasila Abimeleki libwe lya ukusaghila mwitwi mwake, nalyo limtowa na kuhonda litwi lyake.

54 Baho Abimeleki kamkema imsongolo wake iyadutile tsisilaha tsake, kamlongela, "Usole limaghe lyako unikome, hela iwanu watsolonga nikomighwa na ipinga." Imsongolo ayo kasola limaghe lyake kamhoma na kumkoma. 55 Waisiraeli hawonile Abimeleki kafa, chila munu koka ukaye yake.

56 Apfi pfipfo Imulungu pfayamuyitsile Abimeleki kwa aghala ighehile ghayamtendele aba wake, ahala hayawakomile ndughu tsake sabini.

57 Pfipfila Imulungu kawaliha iwanu wa Shekemu kwa aghala ighehile ghawatendile. Apfo lighito lya Yotamu mwana wa Yeru Baali liwapfika.