1 Matsuwa agho tsahana munu yumwe iyang'ali yokala mna isi ya pfidunda pfa Efuraimu iyakemighwa Mika. 2 Yeye kamlongela mai wake, "Pfihande pfila pha fetsa elufu imwe na miya pfayakwibile imbapfi, nikuhulika ghweghwe komlighita, ulole tsisendi atso ninatso nene, yanitsisolile nene." Mai wake kamwidika, "Mwanangu, IMNDEWA, Imulungu yakubaliki." 3 Pfipfila kamuyitsila mai wake ipfihande apfo. Mai wake kalonga, "Ili ukulighita kwanilighite kuleke kukupata, nene nopfilapfa ipfihande pfimwenga pfiwe pfa IMNDEWA." Kuya kamlongela mwanaghe, "Mwanangu, nobama ipfihande apfino pfa fetsa phitengenetsighwe chinyagho cha ukuhongola na chinyagho cha ukulubula. Lelo nene nokuyitsila ipfihande apfo." 4 Apfo kamuyitsila mai wake ipfihande apfo, lekeni mai wake kasola pfihande pfa fetsa miya mbili kamwing'a imunu iyadahile ukulubula ifetsa, naye katenda chinyagho cha ukulubula na chinyagho cha mbiki ichibakighwe ifetsa. Kuya chikighwa mng'anda mwa Mika. 5 Imunu ayuno Mika, tsakana hanu ha ukutambikila mna ing'anda yake. Tsakatenda pfinyagho pfa milungu yake na chinu chimwe ichikemighwe chitsibaho cha mmambagha, naye kamsaghula imwanaghe yumwe yawe mtambika wake. 6 Mna matsuwa agho tsakuduhu imfalume mna isi ya Isiraeli, chila munu tsakatenda ka pfayabamile imwenyegho.

7 Tsahana msongolo yumwe iyolawa mna ghumji ghwa Betilehemu mna isi ya Yuda. Yeye tsa Mlawi iyang'ali yokala na wanu wa likabila lya Yuda. 8 Imsongolo ayo kalawa Betilehemu ili muisi ya Yuda kaghenda kubama hanu ha ukukala, apfo kapfika ukaye kwa Mika mna isi ya ipfidunda pfa Efuraimu. 9 Mika kamghutsa, "Ghweghwe ulawa kwani?" Naye kamwidika, "Nene na Mlawi, nolawa Betilehemu mna isi ya Yuda, nobama hanu ha ukukala."

10 Mika kamlongela, "Ukale na nene, uwe aba wangu na uwe mtambika wangu, nitsokwing'a pfihande kumi pfa fetsa chila mwaka, na maghwanda gha ukupfala, na ipfijo." 11 Apfo Imlawi ayo katoghola ukukala na Mika, na Mika kamtenda ka mwanaghe. 12 Na baho Mika kamhimika Imlawi ayo, kawa mtambika wake, naye kakala ukaye kwa Mika. 13 Naye Mika kalonga, "Lelo nomanya ghendo ka Imulungu katsonendela ghanoghile, kwaapfila nina Mlawi ka mtambika wangu."