1 Wanu wa kabila lya Efuraimu wamghutsa Gidioni, "Ule ututendele apfino? Ule ng'utukemile baye haughendile kwitowa na Wamidiani?" Apfo wamkembela ng'ani.

2 Lekeni yeye kawedika, "Aghala ghanendile nene si chinu baye kubita aghala ghamtendile mwemwe. Achila chidodo chamtendile mwemwe wanu wa Efuraimu chikulu kubita ghawatendile iwanu wangu wa lukolo lwa Abiazeri. 3 Imulungu kawatenda Orebu na Zeebu ipfilongotsi weli wa Wamidiani watowighwe na mwemwe. Angu lelo nitendile choni kubita mwemwe?" Gidioni hayalongile apfo, baho waleka kumghudubukila.

4 Gidioni na iwanu wake mia ndatu wapfika kuna ghumto Yoridani, na waloka. Hata ka tsawepfa sideke waghendelelela kuwawinza Wamidiani.

5 Naye kawalongela iwanu wa Sukoti, "Weng'eni ichijo wanu wangu iwoniwinza waje kwaapfila wepfa sideke, twetwe tung'ali twowakoleletsa Zeba na Salimuna, wafalume wa Midiani."

6 Lekeni iwakulu wa Sukoti wamghutsa Gidioni, "Mwemwe ng'ana muwaghoghe Zeba na Salimuna, heule kobama tuweng'e ichijo wanu wako?"

7 Gidioni kawalongela, "Pfinogha, lekeni IMNDEWA hayatsonyapfila niwaghoghe Zeba na Salimuna, nitsotsihoma ng'uli tsenu kwa mihonga na tsimiwa tsa kunyika."

8 Kulawa aho Gidioni kawaghendela iwanu wa Penueli, kawalomba pfipfila, lekeni wamwidika ka pfawamwidike iwanu wa Sukoti.

9 Apfo kawalongela iwanu wa Penueli, "Hanitsakuya aku niwahuma iwafalume awo, nitsoghuhinya ghumnala ghwenu."

10 Zeba na Salimuna tsawakala ako Karikori, hamwe na lijeshi lyawo lya wanu elufu kumi na tano iwasighale kulawa kwa iwanu wake wa mashariki, kwaapfila wayawo laki imwe na ishirini tsawakomighwa. 11 Apfo Gidioni na iwanu wake waghenda kuna inzila ya wachuutsi ili ubali wa mashaliki ya pfijiji pfa Noba na Yogibeha, wawatowa kwaapfila tsang'awakalile ghoya kwa ukwitowa baye. 12 Wafalume wa Midiani, Zeba na Salimuna, watsuma, lekeni Gidioni kawawinza na kawaghogha na iwanu wose wa ing'ondo wa iwafalume awo, nawo wengilighwa na wogha.

13 Kuya Gidioni mwana wa Yoashi, tsakoya kulawa kung'ondo kwa kubitila ing'alo ya Heresi. 14 Kamghogha msongolo yumwe wa Sukoti na kumghutsa. Na imsongolo ayo kamwandikila mataghwa gha iwakulu na iwabala iwomanyika wa Sukoti. Awo wose tsawapfika sabini na saba.

15 Kuya Gidioni kawoyila iwanu wa Sukoti, kawalongela, "Ambe mwokumbuka pfamndighile ahala hamlongile, ‘Mwemwe mng'ali kuwaghogha Zeba na Salimuna? Ule kobama tuweng'e ichijo wanu wako iwepfile?’ " Haya lelo, Zeba na Salimuna awano ahano.

16 Kasola mihonga ya kunyika na tsimiwa kawakanya kwa kuwatowela iwanu na iwakulu wa Sukoti.

17 Kuya kaghubomola ghumnala ghwa Penueli na kuwakoma iwanu wa ghumji aghwo.

18 Pfipfila kawaghutsa Zeba na Salimuna, "Iwanu awala wamuwakomile akula Taboli wali pfii?" Wamwidika, "Weghala na ghweghwe, kwaapfila chila yumwe tsakoneka ka mwana wa mfalume."

19 Gidioni kawedika, "Iwanu awo ndughu tsangu, twong'a tombo limwe. Nelaha ka IMNDEWA pfayali mghima, ka mng'awalekile waghima, na nene ning'alekile kuwakoma mwemwe." 20 Kuya kamlongela Yeteli, imwanaghe chaudele, "Wakome!" Lekeni Yeteli ng'asomole baye limaghe lyake, kwaapfila yang'ali yopfuka, na yang'ali msongolo. 21 Bahala Zeba na Salimuna walonga, "Tukome mwenyegho, kwaapfila aino ng'onde ya munu mkulu." Apfo Gidioni kenuka kawakoma Zeba na Salimuna na kasola unzolingo ukalile msingo mwa wangamia wawo.

22 Kuya Waisiraeli wamlongela Gidioni, "Uwe chilongotsi wetu ghweghwe na wanagho na watsukulu wako, kwaapfila kutukombola kulawa mna ghamoko gha Wamidiani."

23 Gidioni kawalongela, "Nene sitsowalongotsa baye wala watsukulu wangu, IMNDEWA yuyo iyatsowalongotsa." 24 Kuya kawalongela apfino, "Nowalomba chinu chimwe, chila munu yangolele tsiheleni tsa mmaghutwi tsayabokile kung'ondo." Kwaapfila Wamidiani awala tsa Waishimaeli, wang'ali wopfalagha heleni tsa nzahabu mna ghamaghutwi ghawo.

25 Wamwidika, "Twetwe tokwing'a kwa ghumoyo ghwose." Apfo watandatsa gholole na chila munu keka tsiheleni tsayabokile kung'ondo. 26 Tsiheleni tsose tsayabamile wamwing'e tsipimighwa tsipfika ka kilo ishilini. Pfipfila tsakeng'ighwa maghwanda ghanoghile gha nzambalao ighapfalighwe na wafalume wa Midiani, na mikufu ikalile msingo mwa wangamia wawo. 27 Ipfinu apfo pfose Gidioni kapfitengenetsela chinyagho, kuya kaghenda kuchika kuna ghumji ghwake ghwa Ofira. Waisiraeli wose waghendagha ako kuchitambikila. Ichinyagho acho chiwa nyonzo kwa Gidioni na iwanu wa ikaye yake. 28 Apfo Wamidiani tsawatowighwa ghendo na Waisiraeli, wawa si wanu wa kupfukighwa keli baye. Na isi ya Isiraeli ikala tseghamba kwa miyaka alubaini, matsuwa ghose Gidioni hayakalile mghima.

29 Kuya ayo Yeru Baali, mwana wa Yoashi, koya ukaye yake kukala. 30 Gidioni tsakana wana wamale sabini, kwaapfila tsakakwela wapinga wengi.

31 Tsakana pinga wa kunze iyakalile Shekemu, iyamwelekele mwana mmale, iyamkemile Abimeleki. 32 Gidioni mwana wa Yoashi tsakafa na miyaka mingi, wamtsika hana ichibaka cha Yoashi aba wake, kuna ghumji ghwa Ofira wa Wabiezeri.

33 Gidioni hayafile, Waisiraeli wayuyila keli milungu ya Baali na kuitambikila. Wamtenda Baali Beriti yawe mulungu wawo. 34 Ng'awamkumbuke baye IMNDEWA wawo iyawakombole kulawa kwa iwanu iwawehile iwawatsunguluke.

35 Pfipfila ng'awawatendele ghanoghile baye iwanu wa ikaye ya Yeru Baali, ayo Gidioni, kwa aghala ghose ighanoghile ghayawatendele.