1 Hambele chidogho, mna ghumsimu ghwa ukupfuna ingano, Samsoni kasola imene mdoghodogho kamwangila imwehe wake. Kamlongela aba mkwe yake, "Nobama ng'ende kuna ichiheleto cha mwehe wangu." Lekeni aba wake kamlemela. 2 Aba mkwe yake kalonga, "Nene nyaghitsa ghweghwe kumuhila ghendo, apfo nimwing'a sale yako. Lekeni kana mdodo wake, ayo kanogha kubita yeye, umkwele yeye." 3 Samsoni kalonga, "Lelo sambi hanitsowalagha Wafilisti, mleke kumbona nitotsa." 4 Apfo Samsoni kaghenda kaghogha mbweha miya ndatu, kawoha mikila yawo weli weli, keka chiwenge cha ghumoto mna chila mikila ya mbweha weli. 5 Kabwina ghumoto mna miwenge ayo na kawalekelela wambweha, nawo wengila mna mighunda ya Wafilisti, walakatsa imikinza ya ngano na ingano ila ng'ana ipfunighwe baye, na mighunda ya mizeituni. 6 Baho Wafilisti waghutsa, "Nani iyatendile apfino?" Wedika, "Ayo Samsoni, tsakatenda apfo kwaapfila ipinga iyamkwelile kulawa Timna aba wake mkwe kamwing'a sale yake." Wafilisti waghenda wamlakatsa ipinga ayo na aba wake. 7 Samsoni kawalongela, "Ka mwemwe mtenda apfino, nene nelighita ghendo ka sitsoleka baye mbaka niwoyitsile chamnitendele." 8 Kawatowa ng'ani na kawakoma wanu wengi, kuya kaghenda kukala mna imango ya libambalawe ako Etamu.

9 Kuya Wafilisti wagheluka, waghenda kwika ndalo mna isi ya Yuda, na wenela mbaka habehi na ghumji ghwa Lehi. 10 Iwanu wa Yuda wawaghutsa, "Heule mwemwe mtsa kututowa." Nawo wawedika, "Tutsa kumghogha Samsoni, na kumtenda ka pfayatutendile." 11 Kuya wanu elufu ndatu wahulumka, waghenda kuna imango ya libambalawe ili Etamu. Wamlongela Samsoni, "Pfihi ng'umanya baye ka Wafilisti sambi wotutawala? Angu achi choni chaututendile?" Kawedika, "Niwatendela achila wawo chawanendele." 12 Wamlongela, "Tutsa kukughogha na kukughala ghweghwe kwa Wafilisti."

Samsoni kawalongela, "Mwilahe ka mwemwe wenyegho ng'amtsonikoma baye."

13 Wamlongela, "Pfinogha, tutsokwoha hela na kukughala kuna wawo, lekeni ng'atutsokukoma baye." Apfo wamwoha kwa mitsabi mili ya sambi, na wamlapfa mmango. 14 Hayapfikile Lehi, Wafilisti wamghendela aku wotsuma na wokemelela. Baho Muhe ghwa Imulungu kamtenda Samsoni yawe na ngupfu na imitsabi iyohighwe mmoko mwake idumka, iwa ka lutsi pfalulakala mmoto, na imitsabi ayo ilaghala hasi. 15 Naye kona pate limwe bisi lya ghamatsino gha chihongwe, kalisola na kawakomela wanu elufu imwe. 16 Kuya Samsoni kawalongela,

"Kwa pate lya chihongwe,

ng'oma wanu elufu imwe,

kwa pate lya chihongwe niwalundika iwanu iwafile malundolundo."

17 Hayamalitse ukulonga, kalyasa lipate alila, na hanu ahala hakemighwa Lamati Lehi, mana yake chidunda cha pate.

18 Kuya Samsoni kona ng'ilu, kamlilila Imulungu, kalonga, "Ghweghwe kutwing'a ukombotsi uno kubitila imtumwa wako na sambi nakufa kwa ng'ilu na noghoghighwa na ghamoko gha iwanu ing'awengile ngoma baye." 19 Kuya Imulungu katula hanu hana lipondo mna isi ya Lehi, na baho halawa ghamatsi, na hayanwele ingupfu yake imuyila keli. Imbwibwi ayo ikemighwa Eni Hakore nayo yakuko mbaka leloli. 20 Samsoni kawa mlamtsi wa Waisiraeli kwa miyaka ishilini mna matsuwa gha Wafilisti hawang'ali wotawala isi.