1 Awano wawo iwanu wa tsiisi iwalekighwe na IMNDEWA ili wawaghetse Waisiraeli ing'awana wamanye ukwitowa ng'ondo mna isi ya Kanaani.

2 Tsakatenda apfo ili yawalangulitse ukwitowa ng'ondo iwanu wa ipfeleko apfo, kwaapfila tsang'awana wetowe ng'ondo baye. 3 Awano wawo iwanu iwasighale, wakulu watano wa Wafilisti, Wakanaani wose, Wasidoni, na Wahivi iwakalile mna ipfidunda pfa Lebanoni, kulawa chidunda cha Baali Herimoni mbaka Hamati.

4 Awo tsa kawaleka ili yawaghetse Waisiraeli, yawone ka woghakinda ghamalaghitso gha IMNDEWA, ghayaweng'ile iwabala tsawo kubitila Musa. 5 Apfo Waisiraeli tsawakala hamwe na Wakanaani, Wahiti, Waamori, Waperizi, Wahivi na Wayebusi.

6 Wawakwela neghe tsawo, na iwana wa iwanu awo wawakwela neghe tsa iwanu wa Isiraeli, na waitambikila imilungu ya iwanu awo.

7 Waisiraeli watenda ghehile hambele ha IMNDEWA, wamsemwa IMNDEWA, Imulungu wawo, na watumikila milungu ya Mabaali na Maashera. 8 Apfo IMNDEWA kawaghudubukila Waisiraeli, naye kawatenda watowighwe na Kushani Rishataimu, mfalume wa Mesopotamia, na Waisiraeli wamtumikila ayo Kushani Rishataimu kwa miyaka minane. 9 Lekeni Wasiraeli Wamlilila IMNDEWA, naye kawaghalila munu wa ukuwakombola iyakemighwe Otinieli, mwana wa Kenazi, mdodo wake Kalebu. 10 Muhe ghwa IMNDEWA ghumtsila Otinieli, naye kawa mlamtsi wa Isiraeli. Otinieli kaghenda kung'ondo kwitowa, IMNDEWA kamwika Kushani Rishataimu imfalume wa Mesopotamia mmoko mwake, naye kamhuma.

11 Apfo isi tsaikala tseghamba kwa miyaka alubaini. Kuya Otinieli imwana wa Kenazi kafa.

12 Kuya Waisiraeli watenda ighehile hambele ha IMNDEWA Imulungu, naye IMNDEWA kamwing'a ngupfu Egiloni imfalume wa Moabu yawatowe Waisiraeli kwaapfila pfawatendile ighehile hambele ha IMNDEWA. 13 Ayo Egiloni kakema mtingano ghwa Waamoni na Waamaleki, waghenda naye kwitowa na Waisiraeli, wawatowa na waghusola ghumji ghwa Mitende ighumanyika Yeriko.

14 Waisiraeli wamtumikila Egiloni imfalume wa Moabu kwa miyaka kumi na minane.

15 Lekeni Waisiraeli hawamlilile IMNDEWA, naye kawenulila munu wa kuwakombola, iyakemighwe Ehudi, yeye tsakamamoso, imwana wa Gera wa likabila lya Benjamini. Waisiraeli wamtuma yaghale nzawadi tsawo kwa Egiloni imfalume wa Moabu. 16 Lelo Ehudi tsaketendela maghe ilitema kwosekwose na utali wake ka futi imwe na nusu, kalihomeka mchuno kuna lihatsa lyake lya kujilo, hasi ha tsinguo tsake. 17 Kuya kamghalila Egiloni tsinzawadi atsila, naye Egiloni tsakakala munu yanenehe ng'ani. 18 Ehudi hayamalitse ukulapfa tsinzawadi, kawalongela iwanu iwadutile tsinzawadi atsila walawe woke. 19 Lekeni yeye hayapfikile hana ipfinyagho pfa ghamabwe ipfisongolighwe habehi na Giligali, koya kwa Egiloni, kamlongela, "Ghwe mfalume, nina mbuli yako nobama nikulongele chinyele." Imfalume kalaghitsa watumwa wake kalonga, "Mwinyamale," nawo walawa kunze wose wamleka.

20 Kuya Ehudi kamseghelela imfalume ayula iyakalile hana ichiheleto chake ichiholile, kamlongela, "Nina mbuli yako kulawa kwa Imulungu." Imfalume kenuka ahala hayakalile hana ichighoda chake kema wima. 21 Bahala Ehudi kasomola limaghe kwa ghumoko ghwake ghwa kumoso, kulawa hana lihatsa lyake lya kujilo, kamhoma munda mwake. 22 Limaghe lingila mghati hamwe na muhini ghwake, na lilawilila kumghongo, na ghamapfuta ghaghubika limaghe kwaapfila Ehudi ng'alisomole baye limaghe. 23 Kuya Ehudi kalawa kunze hachikuta, kahinda imilango ya ichiheleto achila kwa funguwo.

24 Ehudi hayokile, iwatumwa wa imfalume woya. Hawonile imilango yose ya ichiheleto ihindighwa kwa ufunguwo, walonga, "Semeghe kaghenda kucholo amwo mchiheleto chake."

25 Wabetetsa mbaka wanza ukwalangula. Hawonile ng'opfughula imilango baye, wasola ifunguwo na waipfughula. Wamwona imfalume wawo kaghwa hasi, naye kafa.

26 Hawang'ali wobetetsa, Ehudi katsuma koka, kabitila hana ipfinyagho pfa ghamabwe, katsumila Seira. 27 Hayapfikile ako, katowa malati mna isi ya ipfidunda ya Efuraimu, nawo Waisiraeli wahulumka naye kulawa isi aila ya ipfidunda, aku yeye kawalongolela. 28 Naye kawalongela, "Mniwinze nene, kwaapfila IMNDEWA kawatenda muwahume wehile wenu Wamoabu." Baho wahulumka wamuwinza yeye mbaka hana ichiloko cha ghumto ghwa Yoridani, wachiboka ichiloko achila, na ng'awalekile munu wowose yaloke baye.

29 Mna litsua alyo, wawakoma Wamoabu kama elufu kumi, asikali awo wose tsawana bapfu na wadaha ukwitowa, na ng'ahonile hata munu yumwe baye. 30 Mna litsua alyo Waisiraeli wawahuma iwanu wa Moabu. Na isi ikala tseghamba kwa miyaka samanini.

31 Hayamalitse Ehudi, kenuka mlamtsi yungi iyakemighwe Shamgari mwana wa Anati, iyawakomile Wafilisti miya sita kwa biki lya kudimila ng'ombe. Naye pfipfila tsakawakombola Waisiraeli.