1 Matsuwa agho Waisiraeli tsawakala wahela mfalume. Kulawila Mlawi yumwe iyakalile mgheni mna isi ya pfidunda pfa Efraimu, tsakasola pinga wa kunze iyolawa Betilehemu mna isi ya Yuda. 2 Lekeni ipinga ayo kamghudubukila Imlawi ayo. Kuya kamleka Mlawi ayo na koya ukaye kwa aba wake ako Betilehemu mna isi ya Yuda, na kakala kuko kwa miyetsi mine. 3 Kuya mmale wake kaghenda kumuwinza, kabama yakalonge naye ili yoye ukaye. Apfo mmale ayo kaghenda aku kelongotsa na mtumwa wake na wapfihongwe wake weli. Ipinga ayo kambokela, kamwingitsa mng'anda mwa aba wake, na mkwe yake hayamwonile kambokela kwa kudeng'elela. 4 Kuya mkwe yake, aba wake ipinga ayo, kamkomangitsa yakale, naye kakala kwa matsuwa madatu, waja na kunwa na kawasa kuko. 5 Mna litsuwa lya kane, walamka lupfilipfili, keka pfinu pfake ghoya kwa ukuka, lekeni mkwe yake kamlongela, "Tanu uje chijo chidogho upate ingupfu ya ukukila, kuya kodaha kuka." 6 Apfo iwanu awo weli wakala hamwe, wanwa na ukuja, kuya mkwe yake kamlongela Mlawi ayo, "Dedede uwase ahano ichilo chino na ghumoyo ghwako ghudeng'e." 7 Imunu ayula kenuka kabama yoke, lekeni mkwe yake kamkomangitsa yakale, naye kawasa keli kuko. 8 Kalamka nemitondo tondo mna litsuwa lya tano, kabama yoke, mkwe yake kamlongela, "Uje chidogho, ubete mbaka nemisi." Apfo wose weli waja chijo hamwe.

9 Mlawi ayo na ipinga wake na mtumwa wake hawenuke woke, aba wake ipinga ayo, kamlongela, "Ulole lelo, misi imala na nemihe yakwingila, litsuwa liswa, uwase na udeng'e. Ilupfi kutsolamka nemitondotono na kuka ukaye." 10 Lekeni Mlawi ayo kalema kuwasa ako kwa chilo chingi, apfo koka kaghenda Yebusi, mana yake Yerusalemu, kelongotsa na ipinga wake na imtumwa wake na pfihongwe wake weli.

11 Hawapfikile habehi na ghumji ghwa Yebusi, litsuwa tsa liswa ghendo, imtumwa ayula kamlongela mtwatsa wake, "Pfinogha ukwingila mna ghumji ghwa Wayebusi na tukawase kuko." 12 Mtwatsa wake kamwidika, "Ng'atuhunduka baye na kwingila mna isi ya wagheni, iwanu iwali si Waisiraeli baye. Tughendelele mbaka tupfike Gibea au Rama." 13 Kalonga, "Tukatsane tupfike Gibea au Rama na tutsowasa mna ghumji ghumwe ghwa imiji aino mili." 14 Apfo waghendelela na ghumwanza ghwao, litsuwa tsa litsama ghendo hawapfikile habehi na Gibea mna ghumji ghwa likabila lya Benjamini. 15 Wengila mna ghumji ghwa Gibea ili wawase kuko, na waghenda kukala mna ichibwalu chawetinganilagha iwanu, kwapfila tsakuduhu munu iyawabokele wakawase ukaye yake. 16 Nemihe ayo, imnzehe yumwe iyalawile kumghunda tsakabita. Munu ayuno tsakalawa mna isi ya pfidunda pfa Efuraimu, lekeni matsuwa agho yang'ali yokala mna ghumji ghwa Gibea ghwawokala Wabenjamini. 17 Naye hayenule tsinenge tsake yalole, kamwona munu mbita nzila kakala mchanza, mnzehe ayo kamghutsa, "Ulawile kwani ghweghwe? Na ughenda kwani?" 18 Mlawi kamwidika, "Tulawa Betilehemu ili muisi ya Yuda, na twoghenda isi tsa kutali, isi itsili mna pfidunda pfa Efraimu, tsang'enda Betilehemu ya Yuda na sambi na kuya kuna ing'anda ya IMNDEWA wangu. Kuduhu munu iyatubokele ukaye yake, 19 hata ka tunacho chila chinu, tunayo imitsani ya ukuja wapfihongwe wetu, na pfighate na dipfai ya ukunwa nene na pinga wangu na mtumwa wangu, ng'atubama chinu chochose baye." 20 Mnzehe ayula kalonga, "Mtse ukaye yangu, na nitsomwing'ani chochose chambama, lekeni mleke kuwasa ahano mchanza." 21 Kawasola, kawaghala ukaye yake, kaweng'a ichijo wapfihongwe wake. Nawo wahopfugha maghulu ghawo, waja na kunwa. 22 Hawang'ali wodeng'elela, wamale wamwenga wehile wa ghumji agho waitsunguluka ing'anda na wagong'onda ghumlango, wamlongela imnzehe yana ing'anda, "Mlapfe kunze immale ayula iyatsile ukaye yako, twobama tuwase naye." 23 Lekeni imnzehe ayo yana ing'anda kalawa kunze kawalonglea, "Baye, sale tsangu, mleke ukutenda chinu acho chihile. Kwaapfila munu ayuno mgheni wangu, mleke kutenda chinu ka achino cha chinyala. 24 Mlole ahano hana neghe wangu ng'ana yawase na mmale baye, na ipinga wa munu ayuno mgheni, nitsomlapfilani kunze, muwasole na muwatendele ka pfambama. Lekeni imunu ayuno mleke kumtendela chinu acho cha chinyala." 25 Lekeni iwanu ng'awamhulikitse baye. Apfo Mlawi kamsola ipinga wake kawalapfila kunze, wawasa naye na wamtendela pfihile chilo chose, nemitondo wamlekelela yoke. 26 Lupfilipfili, ipinga ayula koya ukaye hayakalile immale wake, kaghwa hasi ha ghumlango, kakala baho mbaka hakuchele. 27 Mmale wake kalamka nemitondo, kapfughula ghumlango yalawe kunze, yaghendelele na ghumwanza ghwake, baho kamwona ipinga wake kawasa hasi ha ghumlango, ghamoko ghake ghakinda chitsingiti cha ghumlango. 28 Kamlongela, "Winuke tuke." Lekeni ipinga wake ng'amwidike chinu baye, apfo kamwinula, kamdinitsa mna chihongwe wake, woya ukaye. 29 Hayapfikile ukaye yake kasola mmaghe na kamghana ghana ipinga ayo pfihindi kumi na pfili. Kuya kachighala chihande chimwe kwa chila kabila lya isi ya Isiraeli. 30 Iwanu wose iwonile ichinu acho walonga, "Achi chihulo! Chinu ka achino ng'ana chilawile baye wala koneka tangiya Waisiraeli hawalawile mna isi ya Misiri mbaka leloli aino. Twalangule chinu achi, twighutse na tulamle chaukutenda."