1 Aho ghumwande mna matsuwa ghala Walamutsi hawang'ali woitawala Isiraeli, tsakulawila nzala ng'ulu. Munu yumwe iyolawila Betilehemu ya Yuda, kaghenda kukala chidogho mna isi ya Moabu, yeye na mwehe wake na iwanaghe weli. 2 Imunu ayo taghwa lyake Elimeleki na mwehe wake taghwa lyake Naomi, na wanaghe weli walume tsawakemighwa Maloni na Kilioni, wao wolawila mna likabila lya Waeflati ilili Betilehemu mna isi ya Yuda. Waghenda kukala mna isi ya Moabu. 3 Elimeleki mmale wake Naomi tsakafa, Naomi kalekighwa na iwanaghe weli. 4 Iwanaghe awo weli wakwela iwapinga wa kabila lya Moabu, yumwe tsakakemighwa Oripa na yungi tsakakemighwa Ruti, haimalile miyaka kumi, 5 Maloni na Kilioni tsawafa, Naomi lelo tsakayeka, tsakahela mmale wala iwanaghe weli.

6 Matsuwa chidogho haghapfosile, Naomi kahulika ka Imulungu kawapfila iwanu wake kwa kuwaghalila ipfijo ako Moabu, Apfo Naomi na walipfala wake weli woka Moabu, woya ukaye yawo. 7 Naomi na walipfala wake walawa hanu hala hawang'ali wokala, wawinza inzila ighendile kune isi ya Yuda. 8 Naomi kawalongela walipfala wake, "Chila yumwe yoye ukaye kwa mai wake, na Imulungu yawatendele ghanoghile, ka mwemwe pfamnitendele nene ighanoghile na iwafile. 9 Na Imtwatsa Imulungu yamwapfileni mkwelighwe keli na muwe na tsing'anda tsenu."

Apfo Naomi kawaagha kwa kuwanonela. Lekeni wanza kulila kwa usungu. 10 Wamlongela, "Bae tutsoghenda naghwe kwa iwanu wako." 11 Lekeni Naomi kawalongela, "Muye ukaye wanangu. Ebali mniwinza? Angu mwakona nitsakweleka iwana wangi iwatsowakwelani mwemwe? 12 Muye ukaye iwanangu, nene sambi nilala, sikwelighwa keli bae, na ning'alonga nololela ukweleka, hata ka leloli nechilo ning'awasa na mmale na kuwa na iwana, 13 angu mtsowabeta mbaka wakule? Angu mtsokala bila kukwelighwa kwa kuwabeta wawo? Bae wanangu, nene nakona usungu kubita mwemwe kwaapfila Imulungu kaghaleka aghano ghandawile nene."

14 Baho walila keli. Kuya Oripa kamnonela mwalipfala wake, koya ukaye kwao, lekeni Ruti kamuwinza. 15 Naomi kamlongela, "Ulole miyagho kakuya kwa iwanu wake na kwa milungu yake, apfo naghwe uke naye." 16 Lekeni Ruti kamwidika, "Uleke kunilomba nikuleke ghweghwe, wala uleke kunighoma kukuwinza ghweghwe. Nene nitsoghenda Kwokwose kwaughenda, na nitsokala kwokwose kwautsokala. Iwanu wako watsakuwa iwanu wangu na Imulungu wako katsakuwa Imulungu wangu. 17 Haukufila na nene nitsakufila baho, na nitsotsikighwa baho. Imtwatsa Imulungu yandaghe ka nene notenda chinu chochose ichidaha kutubaghula nene na ghweghwe, ila ukufa kuliyeka kutsotubaghula nene na ghweghwe!" 18 Naomi hayonile Ruti kananahila kuka naye, ng'alongile naye bae. 19 Apfo wose weli waghendelela na ghumwanza ghwao mbaka wapfika Betilehemu. Hawapfikile ako, iwanu wose wakangawala, hata iwapinga walonga, "Angu ayu si Naomi bae?" 20 Naomi* kalonga, "Mleke kunikema keli Naomi, ila mnikeme Mara*, kwaapfila Imulungu yane ngupfu kanendela pfinu pfa usungu. 21 Nene nilawa hano na ipfinu pfingi, lekeni Imulungu kambuyitsa ghamoko ghaliyeka. Ule mwonikema Naomi aku Imulungu kanidununza, kanitenda nighaye?" 22 Apfi pfipfo Naomi pfayoyile kulawa Moabu na Ruti Mmoabi, mwalipfala wake, wapfika Betilemu mna ghumsimu ghwa kupfuna shayili.