1 Ako Yerusalemu tsakuna imunu iyakemighwa Boazi, iyolawila mna lukolo lwa Elimeleki, immale wake Naomi. Imunu yuno tsakamnyika sideke na tsakana mali nyingi. 2 Litsuwa limwe, Ruti ipinga yula iyalawile mna isi Moabu, kamlongela Naomi, "Leka nighende kumghunda nikasalalitse ipfijo ipfilekighwe. Songaa nitsomwona imunu iyatsondeka nisalalitse kuchughu kwake." Naomi kamwidika, "Ona mwanangu, ghenda." 3 Apfo Ruti kaghenda kumghunda, kawawinza kuchughu iwanu iwopfuna aku kosalalitsa ipfijo ipfilekighwe, na baho katanga kumbe yang'ali yosang'ana mna mghunda ghwa Boazi, iyolawa mna lukolo lwa Elimeleki. 4 Ambele chidogho Boazi iyalawile Betilehemu tsakapfika, kawalamsa iwanu iwopfuna, kalonga, "Tseng'onde wayangu, Imulungu yakale namwe."

Nawo wamwidika, "Tsinogha, Naghwe Imulungu yakubaliki." 5 Kuya Boazi kamghutsa iyang'ali iyowemilila iwanu iwopfuna, "Angu imwali yula nani?" 6 Naye kamwidika, "Imwali yula Mmoabu, katsa na Naomi. 7 Kanilomba nimleke yawawinze kuchughu iwanu iwopfuna kuya naye yasalalitse ipfijo ipfilekighwa, kasinda kosang'a kulawa nemitondo, lekeni sambi kaghenda kubwihila hane chibumbulika."

8 Kuya Boazi kamlongela Ruti, "Mwanangu tegheletsa, uleke kughenda kusalalitsa mna mghunda ghungi, wala uleke kuka hano, usang'ane na iwapinga wayagho. 9 Uwalole kwawopfuna kuya naghwe uwawinze kuchugho kwao. Niwakanya iwanu wangu waleke kukudesa, na ung'ona ing'ilu, ughende kune pfibuyu ukanwe ghamatsi ghawadeghile iwanu awo."

10 Baho Ruti kamwinamila Boazi mbaka hasi, kamlongela, "Ule konendela uluso uno? Ebali umbonela libatsi nene yanili mgheni?" 11 Boazi kamwidika, "Wanongela ghose ghaumtendele mwalipfala wako kulawa hala hayafile mmale wako, na apfila pfaumlekile aba wako na mai wako, na isi yako na kutsa kukala na iwanu ng'ana uwamanye bae. 12 Imtwatsa Imulungu yakulihe kwa ghose ghautendile, Imulungu wa Isiraeli yaumtsumilile yakulolese, na yakwing'e ighanoghile." 13 Ruti kamwidika, "Mkulu wangu, kunitendela wende mkulu ghendo, hata ka nene si ka yumwe wa iwatumwa wako, ghweghwe kunikanza na kulonga na nene kwa unoghelo mkulu."

14 Hawang'ali wakuja, Boazi kamlongela Ruti, "Soghela hano, usole chighate upfabike mna mtsuwo." Apfo Ruti kakala na iwanu iwopfuna, kuya Boazi kamwing'a ingano itsingighwe, kaja keghuta mbaka kaleka. 15 Hayenuke yaghende kusalalitsa, Boazi kawalaghitsa iwanu wake, kalonga, "Mlekeni yasalalitse mbaka hane pfilundo, mleke kumghoma. 16 Pfipfila mumkwanyulile imikungwi kulawa mna pfilundo na mumleke yadondole wala mleke kumghoma." 17 Apfo Ruti kaghendelela kusalalitsa imikungwi mbaka nemihe, na hayahulule imikungwi ayo ya shayili na kubeta, kapata pishi mbili na makimbo meli. 18 Ketwika, koya ukaye, kamlangusa mwalipfala wake chayasalalitse, kuya Ruti kalapfa na kamwing'a ipfijo pfila pfayalekile kuja hala hayeghutile. 19 Mwalipfala wake kamghutsa, "Udondole kwani yose ino? Tsapfili mghunda ghwa nani? Imulungu yambaliki imunu yula iyakwonele libatsi."

Kuya Ruti kamlongela mwalipfala wake ka tsakasalalitsa mna mghunda ghwa imunu iyokemighwa Boazi. 20 Naye Naomi kamlongela mwalipfala wake, "Imtwatsa Imulungu yambaliki Boazi! Yeye ng'alekagha bae kututendela twetwe ighanoghile ituli waghima na wayetu iwafile." Kuya kaghendelela kalonga, "Imunu ayo ndughu yetu ghendo, yeye ka yumwe mna wala wane isang'ano ya kutulela twetwe."

21 Kuya Ruti Mmoabu kalonga, "Pfipfila kanongela, nikale na iwanu wake iwosang'ana mbaka hawomalitsa kupfuna." 22 Naomi kamlongela Ruti mwalipfala wake, "Ona mwanangu. Pfinogha ghweghwe kusang'ana na iwapinga iwali mna mghunda ghwa Boazi, kwaapfila mna mghunda ghwa munu yungi iwanu wodaha kukudesa." 23 Apfo Ruti kasang'ana nawo, kasalalitsa mikungwi mbaka hawamalitse kupfuna ingano na shayili. Matsuwa agho ghose yang'ali yokala kwa mwalipfala wake.