1 Kuya Naomi kamlongela Ruti mwalipfala wake, "Mwanangu, angu ambe pfinogha nene nikubamile mmale yakukwele, naye yakutunze? 2 Mmale mwenyegho Boazi, iyane iwapinga yausang'ane nawo, yeye imunu wa lukolo lwetu, Leloli nemihe koyobeta ishayili yake. 3 Apfo woghe, ubake ghamafuta, upfale pfinoghile, kuya ughende hanu hayobetela ingano yake, lekeni aleke kukumanya mbaka ahala hayomalitsa ukuja na ukunwa. 4 Pfipfila uhamanye hanu hayowasa, na ang'awasa, mghendele lughalugha ufunule ligholole hane maghulu ghake, naghwe uwase baho, naye katsokulongela chokutenda."

5 Ruti kamwidika, "Ghose ghaulonga nitsoghatenda."

6 Apfo Ruti kaghenda hanu hala ho kubetela ishayili, katenda ka pfayamlongele mwalipfala wake. 7 Boazi hayamalitse ukuja na ukunwa, tsakasangalala, kaghenda kuwasa hane lilundo lye ishayili. Ruti kaghenda lughalugha, kafunula ligholole hane maghulu gha Boazi kuya kawasa baho. 8 Mna chilo chikulu, Boazi kabwighinduka, kahunduka na baho tsakeduka hayamwonile ipinga kawasa hane maghulu ghake. 9 Kaghutsa, "Angu ghweghwe uli nani?"

Ruti kamwidika, "Nene Ruti, imtumwa wako, ungubike gholelo lyako kulangusa ka kobamighwa kunitunza, ung'wele kwaapfila ghweghwe kwa imunu wa lukolo lwetu."

10 Boazi kamwidika, "Imtwatsa Imulungu yakubaliki, kwaapfila uluso waututendele mkulu kubita ula waututendele ghumwande, mana ng'aubamile bae iwabwanga iwalihela chinu au awala iwane mali wakukwele. 11 Lelo uleke kupfuka Ruti, nitsokutendela ghose ghaubama kwaapfila iwanu wose iwali mna ghumji ghuno wokumanya ka ghweghwe kwa ipinga yunoghile. 12 Ona ghendo, nene nobamighwa kukutunza ghweghwe, lekeni kuna ndughu yungi iyali habehi kubita nene yobamighwa kukutunza ghweghwe. 13 Apfo ukale hano chilo chose, na ilupfi nemitondo tutsolola ka katsotoghola au katsolema kukutunza, Ang'atoghola pfinogha, ang'alema, nene nelaha kwa taghwa lye Imulungu nitsokutunza. Uwase hano mbaka nemitondo." 14 Apfo Ruti kawasa hamaghulu hake mbaka nemitondo, lekeni tsakedawa mitondotondo koka ili iwanu waleke kumtanga, mana Boazi ng'abamile bae imunu yamanye ka Ruti tsakawasa hala. 15 Boazi kamlongela, "Ugholose hasi ikanga yako iyawighubike." Naye Ruti katenda pfipfo. Kuya Boazi kamwikila Shayili debe limwe, kamtwika. Kuya ipinga ayo koya ukaye yake. 16 Ruti hayapfikile ukaye, mwalipfala wake kamghutsa, "Lelo yuiletsa?"

Ruti kamlongela ghose ghayamtendele Boazi. 17 Kalonga keli, "Kanongela ndeke kuya ukaye kwa mwalipfala wangu ghamoko ghaliyeka, apfo kangaya shayili debe limwe."

18 Naye Naomi kalonga, "Lelo mwanangu ubetetse, mbaka wone choni ichitsolawila, kwaapfila leloli Boazi ng'atsobwihila bae mbaka yaimalitse mbuli ino."