1 Boazi tsakeghenda kune libani lya ghumji, hanu ha kwitinganganila iwanu kakala baho. Kuya indughu yula wa Elimeleki, Boazi iyalongile mbuli tsake tsakabita baho. Boazi kamkema, kalonga "Soghela hano sale yangu," Naye kasoghela, kakala hasi. 2 Boazi kawakema wanzee kumi, kawalomba wakale hasi, nawo wakala hasi. 3 Baho Boazi kamlongela ndughu yake yula, "Lelo Naomi iyoyile kulawa mna isi ya Moabu, kobama yautse mghunda tsa ghwa ndughu yetu Elimeleki. 4 Lelo nene mbona ng'apfu tanu nikulongele ghweghwe, ka koghubama, ughukombole aku iwanu iwakalile hano wolola. Na ka ng'ughubama bae, unongele nimanye. Kwaapfila kuduhu imunu wa kughukombola ila ghweghwe, kuya nene."

Naye kedika, "Nitsoghukombola."

5 Boazi kalonga, "Pfinogha, lekeni ung'aghukombola mghunda aghwo kulawa kwa Naomi, pfipfila umkwele Ruti, mwehe wa ndughu yetu iyafile, yawe mwehe wako ili mghunda aghwo ghuwe ghwa lukolo lwa ndughu yetu iyafile."

6 Imunu yula kedika, "Sitsoghukombola bae mghunda aghwo, nokuleka ghweghwe ughukombole. Nene sidaha bae, kwaapfila iwanangu ng'awatsolisi bae mghunda aghwo."

7 Mna matsuwa agho, imunu ang'abama kughombola chinu au kughombola mali kwa miyaghe, wang'ali wotsulagha likwabatsa limwe na kumwing'a imunu iyokombola chinu. Apfi pfipfo Waisiraeli pfawang'ali welaghana.

8 Imunu yula kamlongela Boazi, "Ghukombole ghweghwe." Katsula likwabatsa lyake kamwing'a Boazi. 9 Kuya Boazi kawalongela iwanzee wala na iwanu wose iwakalile hala, "Leloli mwemwe mwa wakalangama wangu, mwona wenyegho ka nene nighombola ipfinu pfose ipfiwile pfa Elimeleki, Kilioni na Mahiloni. 10 Pfipfila, ayu Ruti Mmoabi, mwehe wake Mahiloni, nimkwela yawe mwehe wangu, ili tsimali tsikale mna lukolo lwa ndughu yetu iyafile, na taghwa lyake lileke kwagha mna ndughu tsake wala akaye yake, Mwemwe mwa wakalangama."

11 Iwanu wose iwakalile hala na iwanzee wala walonga, "Ona twetwe twose twawakalangama. Imtwatsa Imulungu yamtende ipinga yuno iyakwingila ukaye yako, yawe ka Raheli na Lea, iwamwelekele Yakobo iwana wengi, naghwe ubwede mna Efulata na uwe imunu iyomanyika mna Betilehemu. 12 Iwana iyokwing'a Imtwatsa Imulungu kulawa kwa ipinga yuno wawe ka iwana wa Pelesi, iwana wa Yuda na Tamali."

13 Apfo Boazi kamkwela Ruti, kawa mwehe wake. Imtwatsa Imulungu kambaliki Ruti, naye kakinda inda, keleka imwana mmale. 14 Iwapinga wa ghumji aghwo wamlongela Naomi, "Umtunye Imulungu, yeye ng'akulekile bae leloli bila kuwa na imunu iyali habei wo kukutunza, taghwa lya imwana ayu limanyike mna isi yose ya Isiraeli. 15 Imwana ayu katsokutenda wibone kwa mwali na katsokutunza hautsolala, kwaapfila mwalipfala wako, iyokunoghela ng'ani, naye kanogha kubita iwanaghe saba, iyo iyamweleke." 16 Kuya Naomi kamsola imwana, kamlela.

17 Iwapinga iwakalile habehi naye walonga, "Naomi kana mwana," taghwa lyake Obedi. Obedi kamweleka Yese, na Yese kamweleka Daudi.

18 Aluno lulo lukolo lwa Pelesi. Pelesi kamweleka Hesironi. 19 Hesironi kamweleka Ramu, Ramu kamweleka Aminadabu, 20 Aminadabu kamweleka Nashoni, Nashoni kamweleka Salimoni, ✝ 21 Salimoni kamweleka Boazi, Boazi kamweleka Obedi, 22 Obedi kamweleka Yese, na Yese kamweleka Daudi.