1 Tsakuna munu yumwe iyakemighwe Elikana, iyalawile mna likabila lya Efraimu, iyakalile mna ghumji ghwa Rama mna isi ya pfidunda ya Efraimu. Yeye tsa imwana wa Yerohamu na mtsukulu wa Elihu, na chilembwe wa Tohu, wa lukolo lwa Sufu. 2 Elikana tsakana mapinga weli, yumwe tsakakemigwa Hana na wakeli tsakakemigwa Penina. Penina tsakana wana, lekeni Hana tsakahela wana. 3 Chila mwaka Elikana yang'ali yolawagha Rama na kugheluka kumtamanila na kumlapfila nambiko IMNDEWA iyana ingupfu ako Shilo. Ako iwana weli wa Eli, Hofini na Finehasi, wawo tsawawa watambika wa IMNDEWA. 4 Chila Elikana hayamlapfile imnyama yawe nambiko, yang'ali yomwing'agha Penina, ipinga wake hunde limwe. Pfipfila yang'ali yoweng'agha ghamahunde iwanaghe wamale na wapinga. 5 Lekeni Elikana yang'ali yomwing'agha Hana hunde kulu, kwaapfila tsakamkunda sideke, hata ka IMNDEWA tsakamtenda yaleke kweleka iwana.

6 Kuya Penina yang'ali yomghobola Hana, na kumdesa, kwaapfila IMNDEWA kamtenda yaleke kweleka wana. 7 Chinu achino chighendelela kulawila chila mwaka. Hana chila hayagheluke kuna ing'anda ya IMNDEWA, Penina yang'ali yomghobola Hana, Hana yang'ali yolilagha na kwifeya ukuja. 8 Na Elikana, immale wake kamghutsa, "Hana chulila choni? Hebali ng'ukuja baye? Heule ukwona usungu? Angu nene sinoghile baye kubita iwana kumi?"

9 Nawo hawamalitse ukuja na ukunwa ako Shilo mna ing'anda ya IMNDEWA, Hana kenuka. Naye Eli mtambika mkulu tsakakala mna ichighoda habehi na ghumlango ghwa ing'anda ya IMNDEWA. 10 Hana tsakona usungu ng'ani. Na hayang'ali yomlomba IMNDEWA, tsakalila kwa usungu. 11 Hana keka natsili, kalonga, "Ghwe IMNDEWA yana ingupfu, undole nene mtumighwa wako! Ulole maghayo ghangu, na ung'umbuke, uleke kunisemwa! Ka kutsongaya mwana mmale, nelaha ghendo nitsokulapfila ghweghwe IMNDEWA imwana ayo yawe wako matsuwa ghake ghose hayatsokala mghima, na ng'atsogheta baye tsimvili tsake kwaapfila kalapfighwa kwa IMNDEWA."*

12 Hana hayang'ali yoghendelela ukumlomba IMNDEWA, Eli yang'ali yolola ghumlomo ghwake. 13 Hana yang'ali yolomba chinyelenyele aku mlomo ghwake ghung'ali ghohighisika, lekeni chayolonga ng'achihulikika baye. Eli tsakaghitsa Hana kapatika. 14 Apfo Eli kamlongela Hana, "Apfi kutsoghendelela ukupatika mbaka tsuwachi? Leka kunwa imbwali."

15 Hana kamwidika, "Baye mkulu wangu, nene na ipinga yane usungu ng'ani, nene sinwele baye dipfai wala mbwali, lekeni ning'ali nimlapfila IMNDEWA Imulungu ighali mna ghumoyo ghwangu. 16 Uleke kumbona ka nene na ipinga inikoneka si chinu baye. Ning'ali nolomba apfino kwaapfila nina usungu na noghanzika."

17 Eli kamwidika, "Ughende tseghamba na Imulungu yakwing'e aghala ghaumlombile."

18 Hana kalonga, "Nokulomba unilolese pfinoghile." Kuya Hana koka, kaja ichijo na ichihanga chake nachoneke na usungu keli baye.

19 Ilupfi haipfikile, Elikana na iwanu wa ikaye yake walamka mitondotondo, wamlomba IMNDEWA, kuya woya ukaye yawo ako Rama. Elikana kawasa na Hana mwehe wake, na IMNDEWA kamwidika Hana achila chayalombile. 20 Apfo Hana kakinda inda, keleka mwana mmale, naye kamkema Samweli, kwaapfila tsakalonga, "Nimlomba kwa Imulungu."

21 Elikana na iwanu wose wa ikaye yake wagheluka keli Shilo kumlapfila IMNDEWA nambiko ya chila mwaka na kutimilitsa natsili. 22 Lekeni Hana ng'agheluke baye, kwaapfila Hana tsakamlongela mmale wake apfino, "Mbaka imwana hayatsoleka kughwawa, nitsomghala kuko na nitsolamlapfa kwa IMNDEWA yakale kuko matsuwa ghake ghose gha ugima wake wose."

23 Elikana, mmale wake kamwidika, "Tenda ighokunoghetsa, ukale ahano mbaka imwana hayatsoleka kughwawa. Na IMNDEWA yatimilitse inatsili yawikile." Apfo Hana kakala ukaye, kamlela imwanaghe mbaka imwana hayalekile ukughwawa.

24 Imwana hayalekile ukughwawa, Hana kamsola, hamwe na ing'ombe mmale wa miyaka midatu, lobota limwe lya usaghe na supa ya ngotsi ine dipfai kamghala kuna ing'anda ya IMNDEWA ako Shilo, na imwana ayo tsayang'ali mdodo. 25 Nawo hawamchinjile ing'ombe ayula, wamghala imwana kwa mtambika Eli. 26 Hana kamlongela, "Ghwe mkulu wangu, ka apfila Imulungu pfayakwikile mgima, apfi kwonikumbuka? Nene yuyo ipinga ayula iyemile habehi naghwe, iyang'ali yomlomba IMNDEWA Imulungu. 27 Ning'ali nimlomba IMNDEWA Imulungu yangaye imwana ayuno, naye IMNDEWA Imulungu kangaya ka pfanimlombile. 28 Apfo nomwing'a IMNDEWA Imulungu imwana ayuno, ghamatsuwa ghose hayatsokala mghima, yeye kalapfighwa kwa IMNDEWA Imulugu." Kuya ako wamtamanila IMNDEWA Imulungu.