1 Mna likabila lya Benjamini, tsahana munu yumwe yana mali nyingi iyakemighwe Kishi. Yeye tsa mwana wa Abieli, na mtsukulu wa Serori, na chilembwe wa Bakorati, iyolawila mna lukolo lwa Afia mna likabila lya Benjamini iyamanyike sideke. 2 Kishi tsakana mwana mmale, taghwa lyake Sauli. Sauli tsakanogha, na kuduhu imunu mna isi ya Isiraeli iyanoghile ka yeye. Sauli tsa mtali kubita wanu wose mna isi ya Isiraeli.

3 Tsuwa limwe, pfihongwe wa Kishi tsawagha, kuya Kishi kamlongela mwanaghe Sauli, "Msole mtumighwa yumwe, mghende mkawabame wapfihongwe." 4 Nawo waghenda kuwabama mna isi ya ipfidunda ya Efraimu, na wabita mna isi ya Shalisha, lekeni ako ng'awawonile baye. Kuya waghenda mna isi ya Shaalimu, ako nako ng'awawonile baye. 5 Hawapfikile mna isi ya Sufu, Sauli kamlongela imtumighwa wake, "Tuye ukaye, hela aba wangu katsoleka ukwalangula wapfihongwe yatwalangule twetwe."

6 Imtumighwa kamwidika, "Beta chidogho, mna ghumji aghuno kuna munu wa Imulungu iyotogholighwa ng'ani, chila chayolonga cholawila ghendo, lelo tumghendele, songaha kodaha kutulongela tughende ubali wachi."

7 Sauli kamghutsa, "Tung'amghendela tutsomwing'a choni? Lola, ipfijo pfatutsile napfo pfimala na twahela chinu chochose cha kumwing'a imunu ayo wa Imulungu. Tuna choni?"

8 Imtumighwa ayula kamwidika Sauli, "Lola, nina chihande chidogho cha pfesa, nitsomwing'a imunu ayo wa Imulungu ili yatulongele kwani kwatutsowona wapfihongwe."

9 Ghumwande mna isi ya Isiraeli imunu yang'abama kumlomba Imulungu, tsakalonga, "Haya tuke kwa mtowa lamli." Kwaapfila imunu iyakemighwe nabii mna ghamatsuwa aghano ghumwande tsakakemighwa mlaghutsi. 10 Sauli kamwidika, "Kulonga ghoya, haya tuke." Apfo waghenda mna ghumji aghula ghwayang'ali yokala imunu ayula wa Imulungu. 11 Hawang'ali wogheluka kughenda kuna ghumji, wetingana na wandele woghenda kudegha matsi. Wawaghutsa iwali awo, "Pfihi hana mlaghutsi ahano?"

12 Iwandele awala wawedika, "Ona, kabaho. Kahambele henu, mng'aghenda himahima mtsompfika. Katsa leloli kwaapfila leloli iwanu watsotambika ako kuna hanu ha ukutambikila. 13 Hamkwingila mna ghumji, mtsompfika, yeye ng'ana yaghende baye yakaje ako kwawotambikila. Kwaapfila iwanu ng'awatsakuja baye mbaka yeye yatambike, baho iwanu iwakemighwe nawo watsakuja. Apfo mghende himahima, mtsetingana naye." 14 Apfo Sauli na mtumighwa wake wagheluka kuna ghumji. Hawang'ali wakwingila mna ghumji, wamwona Samweli kowatsila, naye yang'ali yoghenda hanu ha ukutambikila.

15 Lelo digholo yake, ng'ana Sauli yapfike baye, IMNDEWA kamlongela apfino Samweli, 16 "Ilupfi chipindi ka achino, nitsokughalila munu kulawa kuna isi ya Benjamini, naghwe kutsombaka mapfuta yawe mtawala wa iwanu wangu wa Isiraeli. Yeye katsowakombola iwanu wangu kulawa kwa Wafilisti, kwaapfila niwona iwanu wangu pfawodununzika, na chililo chawo chinipfikila."

17 Samweli hayamwonile Sauli, IMNDEWA kamlongela. "Ayuno yuyo imunu ayula yanikulongele mbuli tsake. Yeye yuyo iyatsowatawala iwanu wangu." 18 Kuya Sauli kamsoghelela Samweli iyakalile habehi na lilango lya ghumji kamghutsa, "Nokulomba nilanguse ing'anda ya mlaghutsi."

19 Samweli kamwidika, "Nene yuyo imlaghutsi. Mlongole mghende hanu ha ukutambikila, kwaapfila leloli mtsakuja na nene. Ilupfi nemitondo nitsokuleka uke ukaye yako, na nitsokulongela ghose ighali mmoyo mwako. 20 Na awala wapfihoghwe iwaghile tangia jutsi, uleke kuwalangula, awo woneka. Angu Waisiraeli yuhi iwombama ghendo? Apfi si ghweghwe baye na ikaye ya aba wako yose?"

21 Sauli kamwidika, "Nene nolawa mna likabila lya Benjamini ghendo, kabila dodo kubita makabila ghose mna ghamakabila gha Isiraeli. Na lukolo lwangu ludodo ghendo kubita kolo tsose itsili mna likabila lya Banjamini. Ule lelo konongela apfo?"

22 Kuya Samweli kamghala kuchikuta Sauli na mtumighwa wake, kaweka hanu hawokala iwakulu, kwawakalile iwanu iwakemighwe. Tsahana wanu iwopfika salasini iwakemighwe. 23 Samweli kamlongela imunu yakwambika, "Ngalile lihunde lya inyama lyanikwing'ile, alila lyanikulongele ulike hambali." 24 Imunu ayula iyakwambika kaghenda kaghala lihatsa, keka hambele ha Samweli. Samweli kamlongela Sauli, "Lola achi chicho chawikilighwe ghweghwe, lelo chikighwa hambele hako. Uje kwaapfila nikwikila ghweghwe ahala haning'ali niwakema iwagheni."

Apfo litsuwa alila Sauli kaja hamwe na Samweli. 25 Hawahulumke kulawa hanu ha ukutambikila na kupfika kuna ghumji, Samweli kalonga na Sauli hayang'ali mkano kwayawasile.

26 Nemitondotondo, kuko mkano Samweli kamkema Sauli, "Lamka nikuwaghe uke ukaye." Sauli kalamka, na wose weli yeye na Samweli, walawa kunze woka. 27 Hawapfikile kuna ghumbaka ghwa ghumji, Samweli kamlongela Sauli, "Mlongele imsongolo ayo yalongole." Imsongolo ayula hayokile, Samweli kamlongela Sauli, "Beta chidogho nikulongele aghala ghayalongile Imulungu."