1 Wafilisti hawalibokile lisanduku lya Imulungu, waghenda nalyo kulawa kuna ghumji ghwa Ebenezeri mbaka kuna ghumji ghwa Ashidodi. 2 Kuya waliduta lisanduku lya IMNDEWA, waghenda nalyo kuna ing'anda ya mulungu wawo Dagoni na walika habehi na chinyagho cha Dagoni. 3 Iwanu wa Ashidodi hawalamke nemitondo, wachona chinyagho cha Dagoni chifudabala hambele ya Lisanduku lya IMNDEWA. Wachisola ichinyagho cha Dagoni na wachimitsa keli hanu hake. 4 Lekeni hawalamke nemitondotondo, tsawona chinyagho cha Dagoni chifudabala hambele ha lisanduku lya IMNDEWA. Litwi, ghamaghulu, na ghamoko gha ichinyagho acho pfose pfibeneka, tsapfiwasa mna ichitsingiti. Ilukalile tsa ilukuli luliyeka lwa ichinyagho cha Dagoni. 5 Apfo watambika wa Dagoni na iwanu wose iwakwingila kumtambikila Dagoni ako Ashidodi, ng'awokanyagha baye ichitsingiti acho mbaka leloli.

6 IMNDEWA kawadununza ng'ani na kawatenda iwanu wa Ashidodi wampfuke. Tsakawadununza hata iwanu iwali habehi nawo, kwa kuwaghalila mapute. 7 Iwanu wa Ashidodi hawonile aghala ighawapatile welongela, "Imulungu wa Isiraeli kotudununza ng'ani twetwe hamwe na mulungu wetu Dagoni. Lisanduku lya laghano lya IMNDEWA ng'alidaha baye ukukala kuna twetwe." 8 Apfo wawatuma wanu waghende wakawalongele wakulu wose wa Wafilisti, nawo wetingana hamwe, wawaghutsa, Angu tulitendatse lisanduku alino lya Imulungu wa Isiraeli? Iwakulu awo wedika, "Sanduku alyo lya Imulungu wa Isiraeli lighaleni Gati." Apfo walighala ako kuna ghumji ghwa Gati. 9 Lekeni hawalighalile ako Gati IMNDEWA kaghutowa ghumji agho, kawatenda iwanu wapfuke ng'ani, kawatowa iwamale wa isi ayo, iwasongolo na iwakulu kwa kuwaghalila ghamapute. 10 Apfo walighala lisanduku alyo lya Imulungu ako kuna ghumji ghwa Ekironi. Lekeni Lisanduku alyo lya Imulungu halipfikile ako, iwanu wa isi ayo wakemelela, walonga, "Watughalila lisanduku lya Imulungu wa Isiraeli ili litukome twetwe na iwanu wetu." 11 Kuya wawatuma wanu na wawatinganitsa watawala wa Wafilisti na kuwalongela, "Lyuitseni lisanduku lya Imulungu wa Isiraeli hanu hake, hela litsotukoma twetwe na iwanu wetu." Tsawatenda apfo kwaapfila iwanu tsawapfuka ng'ani mna isi yose, na Imulungu yang'ali yowadununza ng'ani. 12 Na awala ing'awafile Imulungu tsakawadununza na ghamapute na chililo chawo chipfika kulanga.