1 Samweli kafa, nawo Waisiraeli wose wetingana hamwe kumdomboketsela, na wamtsika ukaye yake ako Rama.

Kuya Daudi tsakaghenda kuna inyika ya Parani. 2 Tsahana munu yumwe mna ghumji ghwa Maoni ako Parani, yeye tsakana mali nyingi mna chijiji cha Karmeli. Imunu ayuno, tsakana ng'olo elufu ndatu na mene elufu imwe ako Karimeli, iyang'ali iyowaghanagha imighala. 3 Imunu ayo tsakakemighwa Nabali na mwehe wake tsakakemighwa Abigaili. Abigaili tsa pinga iyakengele na pinga iyanoghile. Lekeni Nabali tsakeha na kana misi, naye tsakalawila mna ilukolo lwa Kalebu. 4 Daudi hayang'ali ako kunyika tsakahulika ka Nabali yang'ali yowaghana imighala wang'olo wake ako Karimeli. 5 Apfo Daudi kawatuma wasongolo kumi, kawalongela, "Mghende mkandamsile Nabali ako Karimeli. 6 Mtsomlongela Daudi kokulamsa, kolonga, ukale tseghamba, ghweghwe, ikaye yako na pfose pfauli napfo. 7 Nihulika kowaghana mighala wang'olo wako, iwadimi wako hawakalile hamwe na twetwe, twetwe ng'atuwatendele ghehile baye, na kuduhu chinu chawo ichibighwe ghamatsuwa ghose ghawakalile Karimeli, 8 ung'awaghutsa, watsokulongela. Lelo uwe mluso kwa wasongolo wangu, kwaapfila tutsa mna litsuwa lya chihungo. Nokulomba uweng'e chochose chawinacho awano watumighwa wako na nene nimwanagho Daudi."

9 Iwasongolo awala wa Daudi wapfika wamlongela ka pfawalaghitsighwe na Daudi, kuya wabeta chidogho. 10 Kuya Nabali kawedika iwatumighwa wa Daudi, "Angu ayuno Daudi nani? Ayuno mwana wa Yese nani? Ghamatsuwa aghano kuna iwatumighwa wengi iwotsuma kulawa kwa iwakulu wawo. 11 Apfi nisole pfighate pfangu, ghamatsi ghangu na inyama yaniwachinjile iwanu iwowaghana mighala wang'olo wangu na niweng'e iwanu hata kwawolawa sikumanyile baye?"

12 Awala wasongolo wa Daudi woya na wamlongela Daudi achila Nabali chayawedike. 13 Apfo Daudi kawalongela iwanu wake, "Chila munu yohe limaghe lyake mchuno." Chila munu keyoha limaghe lyake, pfipfila Daudi naye tsakeyoha limaghe lyake. Wanu iwopfika miya nne tsawamuwinza Daudi na iwanu miya mbili tsawakalitsa imitsigho.

14 Mtumighwa yumwe wa Nabali, kamlongela Abigaili, mwehe wake Nabali, "Daudi tsakawatuma wanu kulawa kunyika watse kumlamsa mkulu wetu, lekeni yeye kawaligha. 15 Ila iwanu awo tsawatutendela pfinoghile, wala ng'awatulaghile baye, ghamatsuwa ghose hatukalile habehi nawo kunyika tsakuduhu chinu chetu chochose ichaghile. 16 Wawo tsawawa ka ubanda iutukinga chilo na misi mna ghamatsuwa ghose hatung'ali twodima wang'olo. 17 Lelo lola imbuli aino na ulamle cha ukutenda. Imbuli aino yodaha ukughala maghayo kwa mkulu wetu na kaye yake yose. Yeye keha na kuduhu iyodaha kulonga naye."

18 Abigaili katenda himahima, kasola pfighate miya mbili, pfiliba pfili pfa ngotsi pfa dipfai, wang'olo watano iwabanikighwe, makimbo kumi na saba gha madanu, pfikungwi miya ndatu pfa nzabibu itsinyalile, pfighate miya mbili pfa tini, ipfinu apfino pfose kapfidinitsa mchanya mwa pfihongwe. 19 Kuya kawalongela iwatumighwa wake awala, "Mlongole! Nene nitsowawinza." Lekeni ng'amlongele chochose baye mmale wake.

20 Hayang'ali kohulumka aku kadina chihongwe wake na kasikitsighwa na chidunda ubali umwe, kwa chidukitsa ketingana na Daudi na iwanu wake wohulumka wakutsa akula kuyolawa. 21 Daudi yang'ali yolonga, "Kumbe ning'ali nibetetsa hela tsimali tsa imunu ayuno kunyika, na kuduhu chinu chochose ichaghile mna tsimali tsake, lekeni yeye kaniliha ghehile kwa aghala ighanoghile ghanimtendele. 22 Imulungu yang'ome ka ilupfi nemitondo sitsowakoma baye iwamale wake wose."

23 Abigaili hayamwonile Daudi, kahulumka mna ichihongwe wake na kamwinamila Daudi mbaka chihanga chake chidonza hasi. 24 Keghwisa hana maghulu gha Daudi kamlongela, "Mkulu wangu, agho ghehile ghose ghawe ghakwangu nene. Nene mtumighwa wako nokulomba nonge naghwe. Nokulomba unitegheletse nene mtumighwa wako. 25 Nokulomba uleke kumwalangula Nabali, imunu yehile ka apfila pfalili taghwa lyake, naye ka pfipfo. Yeye kokemighwa Nabali, naye ka imunu mbotsi ghendo. Mkulu wangu, hauwatumile iwatumighwa wako awala, nene mtumighwa wako siwonile baye. 26 Mkulu wangu, IMNDEWA kakughoma uleke kuwakoma kwa ghamoko ghako mwenyegho na kuwoyitsila ghehile, lelo nene nelaha kwa IMNDEWA iyali mghima, na nelaha hambele hako, awala wose iwokubamila ghehile na maaduwi wako wose wawe wabotsi ka Nabali. 27 Mkulu wangu, nokulomba ubokele ipfinu apfino pfanikughalile nene mtumighwa wako, na uweng'e iwatumighwa wako iwokuwinza. 28 Nokulomba undeghusile aghala ghanitotsile. Yeye MNDEWA katsokutenda uwe mfalume, pfipfila na lweleko lwako, kwaapfila ghweghwe mkulu wangu, kwetowa ng'ondo tsa IMNDEWA. Ghamatsuwa ghose ghaukala mghima, lihile lileke kwoneka kuna ghweghwe. 29 Kung'alawila munu iyokuwinza na iyobama yakukome, IMNDEWA, Imulungu wako katsokukinga uwe mghima ka apfila imunu pfayokalitsa chinu chake cha bei ng'ulu. Lekeni ughima wa maaduwi wako utsakwasighwa kutali, ka imunu pfayolyasa libwe kwa ng'umbewe. 30 IMNDEWA hayatsokutendele ighanoghile ka pfayakulongele, na kukusaghula kuwa mfalume wa Isiraeli, 31 kuya ghweghwe mkulu wangu, ng'utsakwalangula wala ghumoyo ghwako ng'aghutsokutama baye kwa ukuwakoma hela iwanu hautsowoyitsila ghehile ghawakutendele. Lekeni ghwe mkulu wangu, IMNDEWA hayatsokutendela ghanoghile, nokulomba uleke kunisemwa nene mtumighwa wako."

32 Daudi kamlongela Abigaili, "Yatunyighwe IMNDEWA, Imulungu wa Isiraeli, iyakutumile leloli witingane na nene. 33 Imulungu iyakwing'ile tsimbutsi itsingomile nene ndeke kughenda kukoma na kuyitsa ghehile kwa ghamoko ghangu yakubaliki. 34 IMNDEWA, kangoma ndeke kukulagha. Lekeni nelaha ghendo kwa IMNDEWA, Imulungu wa Isiraeli iyali mghima, ka ng'usumke baye kutsa kwitingana na nene, ilupfi nemitondo kuduhu munu mmale wowose, wala Nabali mwenyegho, yang'akalile mghima." 35 Kuya Daudi kabokela pfinu pfose Abigaili pfayamghalile, kamlongela Abigaili, "Uke ukaye yako na uleke kupfuka. Lola nighahulika aghala ghaulongile, na nitsotenda achila chaubama."

36 Abigaili hayoyile ukaye, kampfika Nabali kotenda chihungo chikulu ukaye yake, ka chihungo cha wafalume. Nabali tsakasangalala sideke mna ghumoyo ghwake kwaapfila tsakapatika ghendo. Apfo Abigaili ng'amlongele lyolyose mbaka nemitondo. 37 Nemitondo, imbwali haimkungutsuke Nabali, mwehe wake kamlongela chila chinu ichilawile, baho ghumoyo ghwa Nabali ghwiduka, na kaholola, kawa ka libwe. 38 Matsuwa kumi hambele, IMNDEWA kamtowa Nabali, naye kafa.

39 Daudi hayahulike Nabali kafa, kalonga, "IMNDEWA Imulungu yatunyighwe iyamtendele ghehile Nabali kwa kundigha nene, naye IMNDEWA kangoma ndeke ukutenda ghehile. IMNDEWA kamuhigha Nabali kwa ghehile ghake." Kuya Daudi katuma wasenga waghende wakamlombe Abigaili yawe mwehe wake. 40 Wasenga wa Daudi hawapfikile kwa Abigaili ako Karimeli, wamlongela, "Daudi katutuma tutse kukusola ukawe mwehe wake."

41 Abigaili kenuka, kuya kenama mbaka chihanga chake chidonza hasi, kalonga, "Nene na mtumighwa wako, na ahano kuhopfugha maghulu gha iwatumighwa wa iwakulu wangu." 42 Abigaili kenuka himahima, kadina chihongwe wake, kelongotsa na iwatumighwa wake watano mapinga, koka na wasenga wa Daudi, naye kawa mwehe wa Daudi.

43 Kuya Daudi kamkwela Ahinoamu kulawa Yezireeli. Apfo wose weli wawa wehe wake. 44 Ghamatsuwa agho, Sauli kamlapfa mwanaghe Mikali, iyawile mwehe wa Daudi, yakwelighwe na Paliti mwana wa Laishi, iyolawa mna ghumji ghwa Galimu.