1 Daudi kelongela mwenyegho, "Tsuwa limwe, Sauli katsong'oma. Lelo chinu chinoghile cha ukutenda nene nitsumile isi ya Wafilisti. Sauli katsoleka kunibama nene mna isi ya Isiraeli, apfo nitsosulupuka kulawa mna ghamoko ghake." 2 Apfo Daudi na iwanu wake miya sita waghenda kwa Akishi, mwana wa Maoki, mfalume wa Gati. 3 Daudi na iwanu wake wakala na Akishi ako Gati, chila munu kakala na iwanu wa ikaye yake. Daudi tsakana wehe weli, Ahinoamu kulawa Yezireeli na Abigaili chitsuka wake Nabali, iyolawa isi ya Karimeli. 4 Sauli hayahulike Daudi katsumila Gati ng'ambamile keli baye.

5 Tsuwa limwe, Daudi kamlongela Akishi, "Ka konitogholela, nokulomba ungaye ghumji ghumwe mna isi yako ghuwe hanu hangu ha ukukala. Nene sibama baye nikale na ghweghwe mna ghumji aghuno ghoyokala mfalume." 6 Litsuwa alyo, Akishi kamwing'a ghumji ghwa Sikilagi. Apfo, kulawa mna litsuwa alyo ghumji ghwa Sikilagi ghuwa ghwa wafalume wa Yuda. 7 Daudi kakala mna isi ya Wafilisiti kwa mwaka ghumwe na miyetsi mine.

8 Ghamatsuwa agho, Daudi na iwanu wake tsawawatowa Wageshuri, Wagirizi na Waamaleki. Kulawa ghumwande iwanu awo tsawakala mna isi ikwanzila Shuri na kutsighila Misiri. 9 Chila Daudi hayaghutowile ghumji na isi, ng'amlekile baye munu wowose iyali mghima, yawe mmale au pinga wose kawakoma, kaboka wang'olo wawo, wang'ombe wawo, pfihongwe wawo, ngamiya wawo na maghwanda ghawo, kuya koya, kapfika kwa Akishi. 10 Chila Akishi hayamghutsile, "Leloli ughendile kuwatowa tsina nani?" Na Daudi yang'ali yomwidikagha kalonga, "Niitowa isi ya kusini ya Yuda," mala ingi, "Niitowa isi ya kusini iwokala Wayerameeli," mala ingi, "Niitowa isi ya kusini iwokala Wakeni." 11 Daudi ng'amlekile mgima munu wowose baye, yawe mmale au pinga yaghalighwe Gati, kwaapfila tsakalangula mmoyo mwake, "Hela watsolonga mbuli tsetu ka Daudi katenda apfinoa apfila." Apfi pfipfo Daudi pfayang'ali yotendagha ghamatsuwa ghose hayakalile mna isi ya Wafilisti. 12 Apfo Akishi kamtogholela Daudi na kelongela imwenyegho, "Waisiraeli wayaghe womwihila ghendo, apfo katsakuwa mtumighwa wangu ghamatsuwa ghose."