1 Kuya Hana kalomba, kalonga,

"Nomdeng'elela IMNDEWA mna ghumoyo ghwangu,

nomtunya IMNDEWA iyali ngupfu tsangu,

nowaseka awala iwonyihila nene,

kwaapfila nodeng'elela pfaunikombole.

2 Kuduhu iyali mwenzeluka ka IMNDEWA,

kuduhu wowose ka yeye,

kuduhu bambalawe ka Imulungu wetu.

3 Mleke kwitunya,

mleke kulonga mbuli tsa ukwighoda,

kwaapfila IMNDEWA ka Imulungu iyomanya ghose,

na kohigha aghala ghawotenda iwanu.

4 Minde tse iwanu iwali na ngupfu tsibeneka.

Lekeni iwanu iwaghendile wotsenzeuka sambi wana ngupfu.

5 Iwanu awala iwakalile na ipfijo bwelele,

sambi wohemela ipfijo.

Lekeni iwakalile na inzala,

sambi wahela nzala keli.

Ipinga iyakalile mghumba, sambi keleka wana saba.

Lekeni iyali na iwana wengi,

sambi kahela mwana. 6 IMNDEWA kokoma na koghala ughima:

kowahulumsa iwanu kutsimu na kowenula.

7 Imulungu kowatenda iwanu wangi wawe wahingwa,

na wangi wawe wana mali nyingi.

Iwanu wangi kowahulumsa,

na wangi kowenula.

8 Kowenula iwahingwa kulawa mna litimbwisi,

kowenula iwolomba kulawa mna lipfu,

koweka hamwe na iwakulu,

na kowatenda wakalile ipfighoda pfawokala iwakulu,

kwaapfila tsingutso tsa isi tsa kwake yeye IMNDEWA. Naye kaimitsa isi mchanya mwa tsingutso atso.

9 Katsowakinga wahenzeluka wake,

lekeni iwanu iwehile watsokala mna ichisi.

Haduhu munu iyatsohuma kwa ngupfu tsake.

10 Awala iwomwihila IMNDEWA watsobenighwabenighwa,

kulawa kulanga katsowadumila ka ladu.

IMNDEWA, katsoihigha isi yose,

na katsomwing'a ngupfu mfalume wake,

pfipfila katsakongetsa tsingupfu tsa imunu wake iyamsaghule."

11 Kuya Elikana koya ukaye yake Rama, lekeni imsongolo Samweli kakala Shilo komtumikila IMNDEWA aku kolongotsighwa na mtambika Eli.

12 Lelo iwana wa Eli tsaweha ghendo, ng'awamwalangitse ghendo IMNDEWA baye, 13 wala ing'onde yawo ya ukutambika. Iwanu hawang'ali wopilusa inyama kulawa kuna wanyama iwawasubutule wawe nambiko, imwana yumwe wa Eli yang'ali yomtumagha imtumighwa wake iyakindile lubiki lwa kuhomela nyama lwa manda ndatu, 14 naye yang'ali yohoma kwa ngupfu mna ichiha ichipiluka inyama, inyama yoyose ihomighwa na ukulapfighwa na ilubiki alwo yakuwa ya imtambika. Apfi pfipfo pfawawatendele Waisiraeli wose iwang'ali woghenda Shilo. 15 Pfipfila, ng'ana mapfuta ghalakatsighwe baye kuna imatsabahu, imtumighwa wa mtambika kakutsa komlongela imunu iyomsubutula imnyama wa inambiko, "Mlapfile mtambika inyama ya ukwoka, kwaapfila yeye ng'obokela baye inyama yako yautsopilusa, ila kobokela inyama imbisi."

16 Imunu ayo yang'amwidika apfino, "Leka tanu nilakatse ghamapfuta, kuya kutsosola chochose chaubama." Imtumighwa ayo komwidika, "Baye, ngaya sambi, ka ng'ungaya, nitsokuboka."

17 Inzambi aino ya iwasongolo awo wa Eli tsa ng'ulu ng'ani hambele ha IMNDEWA, kwaapfila iwasongolo awo tsawapfibetsa ipfinu ipfilapfighwa kwa IMNDEWA Imulungu.

18 Ghamatsuwa agho, Samweli kaghendelela kumtumikila IMNDEWA, yang'ali yopfalagha chitsibao chitselu.* 19 Chila mwaka mai wake tsakamdadatsila Samweli kanzu ndodo, na kamghalila hawang'ali wogheluka kulapfa nambiko yeye na mmale wake. 20 Eli kambaliki Elikana na pinga wake, kalonga, "Kubitila ipinga ayuno, IMNDEWA yakwing'e iwana wangi ili wasole hanu ha imwana ayuno iyamlapfile ipinga wako yawe wa IMNDEWA." Kuya Elikana na Hana woya ukaye. 21 IMNDEWA kamtendela uluso Hana, naye keleka iwana watano, wadatu wamale na weli wapinga. Msongolo Samweli kakula na kaghendelela kumtumikila IMNDEWA Imulungu.

22 Eli tsakalala ng'ani. Na kahulika ghose iwanaghe ghawawatendele Waisiraeli na pfawawasile na wapinga iwang'ali wosang'ana mna ghumlango ghwa Lihema lienzeluke. 23 Kawaghutsa, "Heule mwotenda apfino? Nohulika kulawa kwa iwanu ka mwemwe mwotenda ghehile. 24 Mleke ukutenda apfo wanangu, kwaapfila aghala ghanihulika kulawa kwa iwanu wa IMNDEWA, gheha. 25 Imunu yang'amtendela miyaghe nzambi, munu yungi kodaha komlombela kwa Imulungu. Lekeni imunu yang'amtendela inzambi Imulungu, yuhi iyodaha kumlombela?" Lekeni iwana awo ng'awamuhulikitse baye aba wawo, kwaapfila IMNDEWA mwenyegho tsakabama ukuwakoma.

26 Imsongolo Samweli kaghendelela kukula, IMNDEWA na iwanu wamkunda ng'ani.

27 Tsuwa limwe, munu wa Imulungu kamghendela Eli, kamlongela, "IMNDEWA kolonga apfino, ‘Apfi nene silanguse nimwenyegho baye kwa ikaye ya Aruni na iwakulu wako hawang'ali watumwa wa Farao mna isi ya Misiri? 28 Tsanimsaghula Aruni na ikaye yake kulawa mna ghamakabila ghose gha Isiraeli kuwa watambika wangu, wanitumikile mna imatsabau, wadusule upfumba na kupfala chitsibao hambele hangu. Tsaniweng'a iwanu wa ikaye ya aba wako nambiko tsangu tsawanilapfile Waisiraeli kwa moto. 29 Heule lelo mwotsonela basu tsinambiko tsa iwanyama na ipfinu pfaniwalaghitse iwanu wangu wangalile? Naghwe heule kuwategheletsa iwanagho kubita nene, na sambi mnaneha kwa ukuja tsinambiko tsinoghile itsilapfighwe na iwanu wangu wa Isiraeli?’ 30 Apfo IMNDEWA, Imulungu wa Isiraeli kolonga apfino, ‘Ona tsanonga ikaye yako na lukolo lwako mtsakutsa hambele hangu kunitumikila ghamatsuwa ghose.’ Lekeni sambi nene Imulungu nolonga apfino, ‘Sitsotenda keli apfo baye.’ Nowatunya awala iwonitunya, na awala iwonibetsa na nene nowabetsa. 31 Tegheletsa, ghamatsuwa ighakutsa nitsowakoma iwasongolo wose mna ikaye yako na mna ilukolo lwako, apfo mna ikaye yako ng'akutsakuwa na mmale wowose iyatsokala mbaka yalale. 32 Kutsoghaya na kutsowonela gele wayagho kwa aghala ighanoghile ghanitsoweng'a iwanu wangi wa Isiraeli, na kwa ghamatsuwa ghose, kutsakuwa kuduhu munu mna ikaye yako iyatsokala mbaka yalale. 33 Ka nitsomleka imtsukulu wako yumwe yawe mgima, na yasang'ane hana imatsabahu yangu, nene nitsombofula tsinenge, kuya katsakona usungu na katsoghanzika, na iwatsukulu wako wose watsakufa pfihile. 34 Achila ichitsowalawila iwanagho weli, Hofini na Finehasi, chitsakuwa chitango kuna ghweghwe. Wose weli watsakufa tsuwa limwe. 35 Kuya nitsomwinula mtambika yungi yanimtoghola, yawe wangu, yeye katsotenda ka apfila pfanibama nene. Nitsomtenda yawe na watsukulu wengi, nawo kwa matsuwa ghose watsomsang'anila imfalume yanimsaghula. 36 Pfipfila, munu wowose iyatsokala mghima mna ikaye yako katsomghendela imtambika ayo na kumlomba sendi na chijo, na kumlongela, ‘Chonde chonde nokulomba nyike mna isang'ano ya ukutambika ili mbate chijo ndiye.’ "