1 Tsuwa limwe, Yonasani mwana wa mfalume Sauli kamlongela msongolo yamghalile ipfinu pfa ukwitowela, "Utse, tughende kumwambu kuna indalo ya Wafilisti." Lekeni Yonasani ng'amlongele baye aba wake. 2 Sauli tsakakala mna ichimbeho cha mbiki ghwa mkomamanga ako Migironi, kunze mwa isi ya Gibea, na iwanu iwakalile hamwe naye tsa miya sita. 3 Mna wawo tsakabaho Ahiya iyapfalile chitsibao cha mtambika, yeye tsakakala mwana wa Ahitibu ndughu yake Ikabodi, iyakalile imwana wa Fenehasi, na mtsukulu wa Eli, mtambika wa IMNDEWA mna ghumji ghwa Shilo. Kuduhu munu wowose iyamanyile ka Yonasani tsakoka.

4 Mna ing'alo iyabamile kubita Yonasani yapfike ndalo ya Wafilisti, tsahana mabambalawe meli ighasongoke, ubali auno na ubali ungi. Bambalawe limwe tsalikemighwa Bosesi na lingi tsalikemighwa Sene. 5 Bambalawe limwe tsalikala ubali wa kasikazini lyelolesa na ghumji ghwa Mikimashi, na lingi tsalikala ubali wa kusini lyelolesa na ghumji ghwa Gibea.

6 Yonasani kamlongela imsongolo ayula iyaghalile ipfinu pfa ukwitowela "Utse, tughende ubali wa keli kuna indalo ya iwanu awano ing'awengile ngoma, songaa IMNDEWA katsotwapfila, kwaapfila kuduhu chinu cha kumtenda IMNDEWA yaleke kukombola, iwe kwa wanu wengi au wanu chidogho."

7 Imsongolo ayula kamlongela, "Tenda chochose chaubama, nene na hamwe naghwe kwa chochose chautenda."

8 Yonasani kamlongela, "Tutsoloka kuwaghendela iwanu awala ili watwone. 9 Wang'atulongela, ‘Mbete baho mbaka twetwe tuwatsile,’ tutsakwima bahano hatuli na wala ng'atutsowaghendela baye. 10 Lekeni wang'alonga ‘Mwemwe mtse kwatuli twetwe,’ baho tutsowaghendela, kwaapfila acho chitsakuwa chitango ka IMNDEWA katsowaghela mna ghamoko ghetu."

11 Apfo Yonasani na imsongolo ayula tsawalawa ili Wafilisti wawone. Kuya Wafilisti walonga, "Lola, Waeburaniya awala, wolawa mna ghamapondo mwawepfisile." 12 Wafilisti iwakalile mna indalo tsawamkema Yonasani na imsongolo ayula walonga, "Mgheluke akuno kuna twetwe, namwe mtsochona."

Yonasani kamlongela imsongolo ayula, "Haya niwinze, kwaapfila IMNDEWA kawaghela mna ghamoko gha Isiraeli!" 13 Kuya Yonasani kagheluka uchanya kwa kukwalina na imsongolo ayula kamuwinza kuchughu. Wafilisti waghwa hambele ha Yonasani, na imsongolo ayula yang'ali yowakoma. 14 Apfo Yonasani na imsongolo wake, wawakoma wanu iwopfika ishilini mna ichibwalu ichipfika nusu heka. Ayo tsaikala ng'ondo ya mwanduso. 15 Mna isi yose ya Wafilisti, iwanu wose wandusa ukupfuka, asikali iwali kuna tsindalo, iwanu iwali mna imighunda, na iwanu iwali mna tsingome, na awala iwoboka ipfinu, nawo tsawadedema, na isi ihighisika. Apfo iwanu tsawapfuka ng'ani.

16 Wapelembi wa Sauli ako Gibea mna isi ya Benjamini tsawawona iwanu wengi wotsuma akuno na akuno. 17 Sauli kawalongela iwanu iwakalile naye, "Mwipete tulole nani ing'ali baha." Hawepetile tsawamanya ka Yonasani na imsongolo ayula iyaghalile ipfinu pfa ukwitowela tsa ng'awalibaho baye. 18 Sauli kamlongela mtambika Ahiya, "Lighale ahano lisanduku lya Imulungu." Ghamatsuwa agho alyo tsawenalyo Waisiraeli. 19 Sauli hayang'ali yolonga na mtambika, tsakahulika iwanu woghendelela ukwowela kuna indalo ya Wafilisti. Apfo Sauli kamlongela mtambika Ahiya, "Wime, uleke kutenda chochose." 20 Apfo Sauli na iwanu wake wetanda kwitowa na Wafilisti. Lekeni Wafilisti wandusa ukwitowa wenyegho kwa wenyegho, na tsahana hengele kulu. 21 Waeburaniya awala iwakalile na Wafilisti kulawa ghumwande na iwaghendile nawo kuna indalo, waghalambuka na welunga na Waisiraeli iwakalile na Sauli na Yonasani. 22 Pfipfila Waisiraeli wangi iwepfisile mna isi ya ipfidunda ya Efraimu, hawahulike ka wafilisti wang'ali wotsuma, nawo pfipfila wawawinza na kuwakoma.

23 Apfo IMNDEWA kawatenda Waisiraeli wahume. Ing'ondo tsayenela mbaka kubita Beti Aveni.

24 Litsuwa alila, Waisiraeli tsawaghanzika ng'ani kwaapfila Sauli kawalighita iwanu, kalonga, "Munu wowose iyatsakuja chijo ng'ana litsuwa liswe na ng'ana niwatowe iwanu wangu iwonihila, ayo yalighitighwe." Apfo tsuwa lyose kuduhu imunu iyajile chijo chochose. 25 Na iwanu wose hawengile mna ghumuhulo tsawona uki wodwena chila hanu. 26 Ila haduhu munu iyajile uki awo kwaapfila tsawapfuka ukulighitighwa akula kwawalighitighwe.

27 Lekeni Yonasani ng'amhulike baye aba wake ahala hayawalighite iwanu. Apfo kasola ng'weku kaipfabika mna lisegha lya uki, kuya kaja uki awo. Na baho kapata ngupfu. 28 Baho munu yumwe kamlongela, "Aba wako kawalighita iwanu kalonga, ‘Imunu wowose iyatsakuja ichijo leloli, ayo yalighitighwe.’ " Apfino pfipfo iwanu pfawatsilike.

29 Yonasani kalonga, "Aba wangu kawadununza iwanu. Lelo nene nina ngupfu kwaapfila ndiya uki auno chidogho. 30 Iwanu wetu wang'ajile chidogho leloli kulawa mna ipfinu pfawabokile kwa awala iwowahila, tung'apatile ngupfu na Wafilisti wengi wang'akomighwe."

31 Litsuwa alila, Waisiraeli wawatowa Wafilisti kulawa Mikimashi mbaka Aiyaloni. Lekeni waghendelela bila kuwa na ngupfu kwaapfila tsawepfa ng'ani. 32 Apfo watsumila ipfinu pfawabokile. Tsawawasola wang'olo, ng'ombe na ngo'mbe wadodo, wawasubutula, waja inyama na idamu. 33 Iwanu wangi wamlongela Sauli, "Lola iwanu womtotsela IMNDEWA kwa ukuja inyama ine idamu."

Sauli kawalongela iwanu, "Mwemwe mtenda pfihile, bimbiliseni libwe kulu litse ahano hana nene." 34 Kuya kawalongela, "Ghendeni mkawalongele iwanu wose wangalile ahano wang'ombe wawo au wang'olo wawo, wawasubutule na kuwaja ahano. Waleke kumtotsela IMNDEWA kwa ukuja inyama ina idamu." Apfo chilo achila tsawawaghala aho wang'ombe wawo na wawasubutula baho. 35 Sauli tsakamtsengela IMNDEWA matsabahu. Ayo tsaikala matsabahu ya mwanduso Sauli iyamtsengele IMNDEWA. 36 Kuya Sauli kawalongela iwanu, "Lelo nechilo tukeni tuwawinze Wafilisti, tukawapfamile na kuwaboka tsimali tsawo mbaka nemitondo, na tuleke kumleka munu wowose yawe mghima."

Iwanu wamlongela, "Tenda chochose chaukwona chinogha." Lekeni mtambika kawalongela, "Leka tanu tumghutse IMNDEWA."

37 Apfo Sauli kamghutsa IMNDEWA, "Pfihi ng'ende kuwatowa Wafilisti? Apfi kutsotutenda tuwahume Wafilisti?" Lekeni IMNDEWA ng'amwidike baye mna tsuwa alila. 38 Kuya Sauli kalonga, "Mtse ahano mwe muwakulu ili tulole nzambi yachi itendighwe leloli. 39 Nelaha kwa IMNDEWA iyali mgima na iyoikombola isi ya Isiraeli, hata ka imwanangu Yonasani, ayo yakomighwe." Lekeni kuduhu munu iyalongile chinu. 40 Apfo Sauli kawalongela Waisiraeli wose, "Mwemwe mwose mwime akula, kuya nene na mwanangu Yonasani tutsakwima akuno." Wawo wamwidika, "Utende chochose chaukwona chinogha." 41 Sauli kalonga, "Ghwe IMNDEWA wa Isiraeli, hebali ng'unyidika baye nene mtumighwa wako? Ghwe IMNDEWA wa Isiraeli, ka yanitotsile nene au mwanangu Yonasani, lelo ulamle kwa libwe lya Urimu. Lekeni ka iwatotsile iwanu wako wa Isiraeli, ulamle kwa libwe lya Thumimu." Apfo Yonasani na Sauli woneka watotsa, lekeni iwanu woneka ng'awatotsile baye. 42 Kuya Sauli kalonga, "Haya lelo utowe simbi tsitulamle nene na mwanangu Yonasani, tulole yatotsile nani." Na ghamabwe ghalangusa, iyatotsile Yonasani. 43 Baho Sauli kamlongela Yonasani, "Nongele chautendile." Yonasani kamwidika, "Tsandiya uki chidogho kwa ng'weku yangu. Lelo nobamighwa nife."

44 Sauli kalonga, "IMNDEWA yanidununze ng'ani ka ghweghwe Yonasani ng'autsakufa baye."

45 Lekeni iwanu wamlongela Sauli, "Hebali Yonasani yakomighwe, imunu iyaitendile isi ya Isiraeli ihume ghendo? Baye! Twelaha kwa IMNDEWA iyali mghima, hata lumvili lumwe lwa litwi lyake ng'alutsolaghala hasi baye. Chayatendile leloli, katenda kwaapfila IMNDEWA kamwapfila." Apfo iwanu wamkombola Yonasani naye ng'akomighwe baye. 46 Kuya Sauli kaleka kuwawinza Wafilisti, nawo Wafilisti woya kuna isi yawo.

47 Sauli hayawile mfalume wa Isiraeli, tsaketowa na aduwi tsake chila hanu, Wamoabu, Waamoni, Waedomu, na wafalume wa Soba na Wafilisti. Na chila hanu hayetowile nawo, tsakawahuma. 48 Tsakadaha ukwitowa nawo bila kuwapfuka, na kawahuma Waamaleki, na kawakombola Waisiraeli kulawa kwa iwanu wose iwawaghoghile.

49 Iwana wamale wa Sauli wawo awano: Yonasani, Ishivi na Maliki Shua. Iwanaghe wapinga tsa waweli; chaudele tsakakemighwa Merabu na mdodo wake tsakakemighwa Mikali. 50 Ipinga wa Sauli tsakakemighwa Ahinoamu neghe Ahimaasi. Mkulu wa maasikali wa Sauli tsakakemighwa Abineri, mwana wa Neri, ayo Neri tsa mtumba wa Sauli. 51 Aba wa Sauli tsakakemighwa Kishi, na aba wa Abineri tsakakemighwa Neri, awo wose weli tsawana wa Abieli.

52 Matsuwa ghose Sauli hayawile mfalume, tsaketowa ng'ani na Wafilisti. Sauli hayamwonile munu wowose kana ngupfu na kakengela tsakamwika mna maasikali wake.