1 Wazifu wamghendela Sauli ako Gibea wamlongela apfino, "Daudi kepfisa mna ichidunda cha Hakila, mashaliki mwa ghumji ghwa Yeshimoni." 2 Baho, Sauli kenuka, kaghenda nyika tsa Zifu kumbama Daudi akuno kelongotsa na masikali elufu ndatu, iwasaghulighwe mna Isiraeli. 3 Sauli keka indalo yake mmbalimbali mwe nzila, kuna chidunda cha Hakila, ichilolesa na ghumji ghwa Yeshimoni. Lekeni Daudi yang'ali yokala kunyika. Daudi hayamanyile Sauli katsa kunyika kumbama, 4 kawatuma wapelembi na kamanya ka Sauli kapfika ghendo. 5 Daudi kalawa, kaghenda hanu Sauli hayekile ndalo. Tsakona hanu haywasile Sauli na Abineri mwana wa Neri, asikali wa Sauli yeye tsakawasa habehi na Sauli. Sauli tsakawasa haghati ghati mwa indalo aku maasikali wake wamtsunguluka.

6 Daudi kamghutsa Ahimeleki iyakalile Mhiti, na Abishai ndughu yake Yoabu, mai wawo tsakakemighwa Seruya, "Nani yatsoghenda na nene kuna indalo ya Sauli?" Abishai kamwidika, "Nene nitsoghenda naghwe."

7 Apfo nechilo, Daudi na Abishai wengila kuna indalo ya Sauli, wampfika Sauli kawasa haghatighati ha indalo ayo, na mgoha ghwake kaghuhomeka habehi na litwi lyake. Abineri na maasikali wangi tsawawasa kumtsunguluka Sauli. 8 Abishai kamlongela Daudi, "Leloli Imulungu kamwika imunu iyokuhila mna ghamoko ghako. Lelo ndeke nimuhome mala lumwe hela, mbaka ghumgoha ghupfike hasi, nene simhoma mala mbili baye."

9 Lekeni Daudi kamlongela Abishai, "Leka kumkoma, kwaapfila nani iyodaha kugholosa ghumoko ghwake yamtowe imunu IMNDEWA iyamsaghule kwa kumbaka ghamapfuta, kuya yoneke kahela totso?" 10 Daudi kalonga, "Nelaha kwa IMNDEWA iyali mghima, IMNDEWA yuyo iyatsomkoma Sauli. Katsomkoma ahala litsuwa lyake lya ukufa halipfika, au ahala hayoghenda kwing'ondo ukwitowa katsakukufila kuko. 11 Lekeni IMNDEWA yangome ndeke kumgholosela ghumoko ghwangu nimtowe imunu iyamsaghule kwa kumbaka ghamapfuta. Lekeni tusole ghumgoha ghwake ighuli habehi na litwi lyake, hamwe na ichibuyu chake cha ghamatsi, kuya tuke." 12 Apfo Daudi kasola ghumgoha aghula na ichibuyu cha ghamatsi, ipfikalile habehi na litwi lya Sauli nawo woka. Lekeni kuduhu munu iyonile wala iyamanyile achila ichilawile, wala kuduhu imunu iyalamke, kwaapfila IMNDEWA kawaghela nongo ndito.

13 Kuya Daudi kaloka ulwanda alwo, kaghenda kumwambu, kema mchidando kutali na iwanu wa Sauli. 14 Naye Daudi kawakemelela iwanu wa Sauli na kamkema Abineri mwana wa Neri kalonga, "Abineri, kwonihulika?" Abineri kamghutsa, "Ghweghwe uli nani yumkema mfalume?"

15 Daudi kamwidika, "Angu ghweghwe kwa mmale ghendo au pfihi? Nani iyeghala naghwe mna isi ya Isiraeli? Heule lelo ng'umkalitse baye mkulu wako imfalume? Munu yumwe katsa ako na kengila aho kumkoma mkulu wako mfalume. 16 Abineri alyino lyautendile ng'alinoghile baye. Nelighita kwa IMNDEWA iyali mghima, ghweghwe na wanu mwobamighwa mfe, kwaapfila ng'amumkalitse baye imkulu wenu iyabakighwe ghamapfuta na Imulungu. Lelo mlole aho hamli. Ghuli kuhi ghumgoha ghwa mfalume na ichibuyu chake cha ghamatsi, ipfikalile habehi na litwi lyake?"

17 Sauli tsakalimanya litsi lya Daudi, kamghutsa, "Alyo litsi lya imwanangu Daudi?" Daudi kamwidika, "Ona, alino litsi lyangu, ghwe mkulu wangu, mfalume."

18 Kuya kaghendelela kulonga, "Lekeni heule ghweghwe mkulu wangu ughendelela kuniwinza nene mtumighwa wako? Nitendile choni? Nikutotsele choni? 19 Lelo ghweghwe mfalume, mkulu wangu, nokulomba uhulike mbuli ya mtumwa wako. Ka Imulungu yuyo yakuswangitse utse unikome, Lelo, na yabokele nambiko ilapfighwa, na uleke kuniwinzilitsa. Lekeni ka iwanu iwakuswangitse, IMNDEWA yawalighite iwanu awo, kwaapfila waniwinga kulawa mna isi iyatwing'ile IMNDEWA na walonga, Ghenda ukaitambikile milungu ingi. 20 Uleke kundeka nifile mna isi ya iwagheni, kutali ne IMNDEWA. Ule ghweghwe mfalume wa Isiraeli kutsa kunibama nene inili ka ndana? Ule konisaka nene ka apfila imunu iyomsaka ing'wale iyali mpfidunda?"

21 Kuya Sauli kamwidika, "Nene nitotsa. Uye mwanangu Daudi. Sitsokulagha baye kwaapfila leloli kuwona ughima wangu chinu chikulu ghendo. Nene nambotsi ghendo na nitotsa ng'ani."

22 Daudi kamwidika, "Ghwe mfalume, ghumgoha ghwako ghwa ahano. Mtume asikali wako yumwe yatse yaghusole. 23 IMNDEWA komliha chila munu kwa aghala ighanoghile ghayotenda, na apfila pfayotogholighwa. Leloli Imulungu kakughela mna ghamoko ghangu, lekeni nene sigholose baye ghumoko ghwangu nikukome kwaapfila Imulungu kakusaghula kwa kukubaka ghamapfuta. 24 Lelo IMNDEWA yawone ugima wangu ka chinu chikulu ghendo ka apfila nene pfaniwonile leloli ugima wako ka chinu chikulu, naye yang'ombole kulawa mna ghamaghayo ghose."

25 Sauli kamlongela Daudi, "Daudi mwanangu, Imulungu yakubaliki, ghweghwe kutsotenda ighali makulu, naghwe kutsohuma ghendo." Kuya Daudi koka, naye Sauli koya ukaye yake.