1 Apfo iwanu wa Kiriati Yearimu waghenda kulisola lisanduku lya IMNDEWA, walighala ukaye kwa Abinadabu, iyakalile mchidunda. Wamhimika imwanaghe mmale iyakemighwe Eleazari yalilolese lisanduku alyo lya IMNDEWA.

2 Sanduku lya IMNDEWA likala mna isi ya Kiriati Yearimu kwa miyaka mingi, ka miyaka ishilini. Mna ghamatsuwa ghose agho Waisiraeli wose wamlilila IMNDEWA yawapfile.

3 Samweli kawalongela Waisiraeli, "Ka mwomuyila IMNDEWA kwa imimoyo yenu yose, mwobamighwa muilapfe imilungu ya chigheni na ipfinyagho pfa Ashitaroti. Mwilapfe kwa IMNDEWA kwa ghumoyo ghose na kumtumikila yeye yaliyeka, naye katsowakombola kulawa mna ghamoko gha Wafilisti." 4 Apfo Waisiraeli wapfasa kutali ipfinyagho pfa Mabaali na Maashitaroti, nawo wamtumikila IMNDEWA yaliyeka.

5 Kuya Samweli kalonga, "Muwakeme Waisiraeli wose wetingane ako Mispa, na kuko nitsowalombela kwa IMNDEWA." 6 Apfo Waisiraeli wose wetingana ako Mispa. Wadegha matsi na kughaghida hambele ha IMNDEWA, litsuwa alila lyose wafunga ukuja walonga, "Tutenda nzambi hambele ha IMNDEWA." Samweli tsa mlamtsi wa wanu wa Isiraeli ako Mispa.

7 Wafilisti hawahulike ka Waisiraeli wetingana ako Mispa, wakulu wa tano wa Wafilisti waghenda kuwatowa. Waisiraeli hawahulike imbuli aino wawapfuka Wafilisti. 8 Waisiraeli wamlongela Samweli, "Ghendelela ukutulombela kwa IMNDEWA, Imulungu wetu yadahe kutukombola kulawa kwa Wafilisti." 9 Apfo Samweli kamsola ng'olo mdodo kamlapfila IMNDEWA ka nambiko ya ukulakatsighwa. Kuya kamlomba IMNDEWA yawapfile Waisiraeli, na IMNDEWA kamwidika ukulomba kwake.

10 Samweli hayang'ali yolapfa inambiko, Wafilisti wasoghela habehi kuwatowa Waisiraeli. Lekeni litsuwa alyo IMNDEWA kawadumila Wafilisti kwa mdumo mkulu, nawo Wafilisti waweghela na wawingighwa na Waisiraeli. 11 Waisiraeli walawa Mispa wawawinza Wafilisti mbaka habehi na ghumji ghwa Beti Kari, kuko wawakoma.

12 Kuya Samweli kasola libwe na kulihimika haghatighati ha Mispa na Sheni, kalikema libwe alyo Ebenezeri, kalonga, "IMNDEWA katwapfila mbaka sambi." 13 Apfo Wafilisti watowighwa, nawo ng'awengile keli baye mna isi ya Isiraeli. Na IMNDEWA yang'ali yowadununza wafilisiti mna ghamatsuwa ghose Samweli ghayakalile mgima. 14 Imiji yose ya Waisiraeli isolighwe na Wafilisti kulawa Ekironi mbaka Gati yuya kwa Waisiraeli, nawo waikombola isi yawo kulawa kwa Wafilisti. Kuya Waisiraeli na Waamori wakala bila ukwisonga.

15 Samweli kaghendelela kuwa mlamtsi wa Isiraeli matsuwa ghake ghose ghayakalile mgima. 16 Chila mwaka Samweli kayangila imiji ya Beteli, Giligali na Mispa na kuwalamlitsa Waisiraeli iwang'ali wokala mna imiji ayo. 17 Kuya yang'ali yakuyagha Rama, kwaapfila ako tsa ukaye yake, tsakawalamlitsa Waisiraeli, na kuko kamtsengela IMNDEWA matsabahu.