1 Daudi kalawa ako Gati katsumila kuna imango habehi na imango ya Adulamu. Ndughu tsake ne iwanu wa kaye ya aba wake hawahulike mbuli ayo, wose tsawamghendela ako. 2 Iwanu wose wane usungu, na awala iwodaighwa, na awala iwabunzighwe tsawamghendela Daudi. Iwanu awo wapfika miya nne, naye Daudi kawa chilongotsi wawo.

3 Kulawa ako, Daudi tsakaghenda mbaka ako Mispa mna isi ya Moabu. Kamlongela mfalume wa Moabu, "Nokulomba, aba wangu na wenye wangu wakale ahano naghwe mbaka nimanye Imulungu yatsonitendela choni" 4 Apfo Daudi kamleka aba wake na wenye wake wakale na mfalume wa Moabu. Nawo tsawakala kuna yeye matsuwa ghose Daudi hayang'ali kepfisa mmango.

5 Kuya nabii Gadi kamlongela Daudi, "Uleke kukala ahano mmango, uke sambi baha, ughende mna isi ya Yuda." Apfo Daudi kalawa, kaghenda kuna ghumuhulo ghwa Hereti. 6 Lelo Sauli tsakahulika ka Daudi na iwanu wake woneka. Sauli aku kakinda ghumgoha, tsakakala hane chimbeho cha ghumbiki ghwa ghumkwaju kune chidunda ako Gibea kuno pfilongotsi wake we ng'ondo wamtsunguluka. 7 Naye Sauli kawalongela watumighwa wake, "Lelo mwemwe iwanu wa kabila lya Benjamini mnitegheletse, apfi mwoghamba ayu Daudi imwana wa Yese katsomwing'a chila yumwe wenu mighunda ya minzabibu na mighunda ingi? Apfi mwoghamba katsomsaghula chila yumwe wenu yawe chilongotsi mna iwamale elufu we ng'ondo au chilongotsi we wamale miya we ng'ondo? 8 Ule mwemwe wose mnitendela tsengwe? Kuduhu hata yumwe wenu iyanongele tsa tsuwachi mwanangu hayekile lilaghano na Daudi, mwana wa Yese. Kuduhu imunu hata yumwe mna mwemwe yambonele libatsi na kunongela ka mwanangu kamtsongetsa mtumwa wangu Daudi yanipfisiye, ka apfila pfoyotenda leloli."

9 Baho Doegi, Mwedomu, iyakalile kema na watumighwa wa Sauli kalonga, "Tsanimwona Daudi, mwana wa Yese katsa Nobu kwa mtambika Ahimeleki, imwana wa Ahitubu. 10 Ahimeleki kamlombela Daudi kwa IMNDEWA, na kamwing'a chijo na lipanga lya ayula Mfilisiti Goliati."

11 Apfo mfalume Sauli katuma wanu wakamkeme mtambika Ahimeleki imwana wa Ahitubu, hamwe na iwanu wake wose na kaye ya aba wake iwawile watambika ako Nobu. Wose tsawamghendela mfalume Sauli. 12 Sauli kalonga, "Lelo unitegheletse ghwe imwana wa Ahitubu." Ahimeleki kamwidika, "Ona, nokutagheletsa mkulu wangu."

13 Sauli kamghutsa, "Heule ghweghwe na Daudi, imwana wa Yese mna tsengwe na nene? Heule tsakumwing'a pfighate na lipanga kuya kumlombela kwa Imulungu? Lelo kaghalambuka konipfisiya yang'ome."

14 Ahimeleki kamwidika mfalume, "Mna iwatumighwa wako wose, nani wakutogholeka kubita Daudi? Yeye kakwela neghe wako, yeye ka mkulu wa iwanu iwokukalitsa, yeye kotegheletsighwa kubita iwanu wose wa ukaye yako. 15 Angu nyanza leloli kumlombela yeye kwa Imulungu? Mfalume uleke kundolesa pfihile, nene wala imunu wowose mna ikaye ya aba wangu. Nene mtumwa wako simanyile lyolyose baye, liwe dodo au kulu."

16 Lekeni mfalume Sauli kamlongela, "Ahimeleki, kutsokomighwa ghweghwe na iwanu wa ikaye ya aba wako." 17 Kuya Sauli kawalongela iwanu iwang'ali womkalitsa iwemile habehi yake, "Hundukeni na muwakome iwatambika wa IMNDEWA, kwaapfila wawo tsawelaghana na Daudi, na wamanya ka Daudi tsakatsuma wala ng'awanongele baye." Lekeni iwanu awo ng'awenule baye ghamwoko ghawo wawakome iwatambika wa IMNDEWA. 18 Kuya mfalume Sauli kamlaghitsa Doegi, "Ghweghwe hunduka uwakome iwatambika." Doegi, Mwedomu kaghenda kuwakoma iwatambika wose. Litsuwa alyo, Doegi tsakawakoma iwatambika samanini na watano iwapfalile pfitsibao pfitselu pfa iwatambika. 19 Kuya kwa lipanga lyake ilitema kosekose, kawakoma iwanu wose iwakalile Nobu, ghumji ghwa iwatambika, kakoma wamale, wapinga, iwana wadowado na iwoghwawa, na ng'ombe, pfihongwe na wang'olo.

20 Lekeni Abiatari, imwanaghe mmale Ahimeleki, imwana wa Ahitubu, kasulupuka, katsumila kwa Daudi. 21 Abiatari kamlongela Daudi apfila Sauli pfayawakomile iwatambika wa IMNDEWA. 22 Naye Daudi kamlongela Abiatari, "Litsuwa alila hanimwonile Doegi, Mwedomu, tsanimanya ghendo ka yang'amlongele Sauli. Apfo nene niwahonza iwanu wa ikaye ya aba wako wakomighwe. 23 Kala na nene, uleke kupfuka, kwaapfila imunu iyobama kung'oma nene, ayo pfipfila kobama yakukome ghweghwe. Ung'akala na nene ng'utsokomighwa baye."