1 Sauli hayawile mfalume tsakana miyaka selasini. Na kawalongotsa Waisiraeli kwa miyaka alubaini na mili. 2 Sauli kawasaghula Waisiraeli elufu ndatu. Mna wawo, wanu elufu mbili tsawakala na Sauli ako Mikimashi mna isi ya pfidunda pfa Beteli. Na wanu elufu imwe wakala na Yonasani mna ghumji ghwa Gibea kuna isi Benjamini. Na awala iwasighale kawaleka chila munu yoye ukaye yake.

3 Yonasani kawatowa maasikali wa Wafilisti wose iwekile ndalo ako Gibea. Nawo Wafilisti wahulika imbuli ayo. Apfo Sauli katowa malati mna isi yose kalonga, "Lelo Waeburaniya wahulike!" 4 Waisiraeli wose wahulika ka Sauli kowatowa maasikali wa Wafilisti, na ka lelo Wafilisti wowehila ng'ani Waisiraeli. Apfo iwanu wakemighwa waghende wakelunge na Sauli ako Giligali.

5 Apfo Wafilisti wetingana hamwe waitowe Isiraeli, aku wana mituka ya ng'ondo elufu ndatu, maasikali elufu sita iwodina falasi, na maasikali iwoghenda kwa maghulu tsa wawengi ka msanga ghwa kumwani. Awano wose tsawagheluka na kwika ndalo yawo Mikimashi ubali wa mashaliki mwa ghumji ghwa Beti Aveni. 6 Waisiraeli hawonile woghaya, kwaapfila wang'ali wotowighwa ng'ani, tsawanza kwipfisa. Wamwenga wepfisa mna tsimango, wamwenga mwibagho, wamwenga mna ghamabambalawe, wamwenga mna ghamapondo, na wamwenga twepfisa mna ipfisima ipfilihela ghamatsi. 7 Wamwenga waloka ghumto Yoridani mbaka wapfika mna isi ya Gadi na mna isi ya Gileadi.

Lekeni Sauli tsayang'ali ako Giligali, na iwanu wose iwamuinzile wang'ali woghudema. 8 Sauli kambeta Samweli kwa matsuwa saba ka Samweli pfayalongile. lekeni Samweli ng'atsile baye ako Giligali na iwanu wandusa kumleka Sauli. 9 Kuya Sauli kawalongela iwanu, "Ngalileni nambiko tsenu tsa ukulakatsighwa na nambiko tsa ukukala tseghamba." Naye kalapfa nambiko tsa ukulakatsighwa.

10 Naye hayamalitse ukulapfa inambiko, Samweli kapfika. Sauli kaghenda kumbokela Samweli na kumlamsa. 11 Samweli kaghutsa, "Utendile choni?"

Sauli kamwidika, "Hambonile iwanu wondeka, naghwe ng'utsile baye mna ghamatsuwa saba ghaulongile, na hambonile Wafilisti wetanda kwa ing'ondo ako Mikimashi, 12 nyalangula watsakutsa kunitowa ako Giligali. Tsasina nilombe baye IMNDEWA yatutendele uluso. Apfo nilamla nilapfe nambiko ya ukulakatsighwa."

13 Samweli kamwidika Sauli, "Kutenda ubotsi. Ng'umhulikitse baye IMNDEWA, Imulungu wako. Ung'amhulikitse, yang'akulekile ghweghwe na watsukulu wako muilongotse isi ya Isiraeli ghamatsuwa ghose. 14 Lekeni lelo ufalume wako ng'utsoghendelela baye, kwaapfila ng'umhulikitse baye IMNDEWA. IMNDEWA kebamila munu yungi iyomnoghela mmoyo, ayo yuyo iyamsaghule yawe mtawala wa iwanu wake."

15 Baho Samweli kalawa Giligali kaghenda Gibeya mna isi ya Benjamini. Na Sauli hayawapetile iwanu iwakalile hamwe naye, tsawapfika wanu miya sita. 16 Sauli na Yonasani imwanaghe, hamwe na iwanu iwakalile hamwe nawo, wakala ako Gibeya mna isi ya Benjamini, na Wafilisti weka ndalo ako Mikimashi. 17 Wafilisti tsawalawa kuna indalo yawo na waghenda kuwatowa aku wa makingili madatu. Kingili limwe tsalighenda Ofura mna isi ya Shuali. 18 Kingili lingi tsalighenda Beti Horoni, na kingili lingi tsalighenda ulwanda lwa Seboimu kughenda kunyika.

19 Ghamatsuwa agho tsakuduhu muhunzi mna isi yose ya Isiraeli, kwaapfila Wafilisti wang'ali wowaghoma Waeburaniya waleke kwitengenetsela mapanga au migoha. 20 Waisiraeli wose tsakaghenda kwa Wafilisti kunola ghembe lyake, maghembe gha ukukweghighwa na wang'ombe, hoya yake, au nyengo. 21 Waisiraeli wang'ali woliha pfihande pfili pfa fetsa kwa kunola ghembe na sululu. Na tsawaliha chihande chimwe kwa kunola hoya na nyengo. 22 Apfo mna litsuwa lya ing'ondo kuduhu munu mna iwanu iwakalile hamwe na Sauli na Yonasani imwanaghe yaghalile lipanga au mgoha ila Sauli na Yonasani imwanaghe waliyeka.

23 Wafilisti waghala kingili lya maasikali waghenda kubetetsa ing'alo ya Mikimashi.