1 Sauli kamlongela mwanaghe Yonasani na watumighwa wake ka kobama kumkoma Daudi. Lekeni Yonasani, mwanaghe Sauli, tsakamkunda ng'ani Daudi. 2 Kuya Yonasani kamlongela Daudi, "Aba wangu kobama yakukome, apfo walangitse. Ilupfi nemitondo, ughende wikepfise na ukakale kuko. 3 Nene nitsakutsa na aba wangu na kwima habehi ako kumghunda kwawipfisile. Kuko nitsolonga naye mbuli tsako, na chinu chochose chanitsotanga nitsokulongela."

4 Yonasani kamtunya Daudi kwa aba wake, Sauli, kamlongela, "Uleke kumtendela ghehile imtumighwa wako Daudi kwaapfila yeye ng'akutendele nzambi yoyose baye, ghose ghayakutendele ghakwapfila ghweghwe. 5 Hayamkomile Goliati Mfilisiti ayula, ng'alangitse baye ughima wake, naye IMNDEWA kawatenda Waisiraeli wahume ng'ani. Naghwe hawonile pfipfila tsakudeng'elela. Heule kwobama kutotsa kwa kumkoma Daudi iyalihela totso?"

6 Sauli kamtegheletsa Yonasani, kuya kelighita, "Nelaha kwa IMNDEWA iyali mghima, nene sitsomkoma baye Daudi." 7 Apfo Yonasani kamkema Daudi na kamlongela agho ghose. Yonasani kamghala Daudi kwa Sauli, Daudi kamtumikila Sauli ka aho mwanduso. 8 Hambele Wafilisti na Waisiraeli tsawetowa keli. Daudi kaghenda kwitowa na Wafilisti, kawakoma Wafilisti wengi, na wamwenga tsawatsuma. 9 Kuya muhe yehile kulawa kwa IMNDEWA tsakamtsila Sauli hayang'ali mg'anda mwake aku kakinda mgoha mna ghumoko ghwake, naye Daudi yang'ali yotowa ching'weng'we chake. 10 Sauli tsakabama kumuhoma Daudi kwa mghowa agho, lekeni Daudi tsakaghuhepa ghumgoha aghwo ghwa Sauli na ghughenda kuhoma kuna ubanda. Chilo chicho Daudi tsakatsuma.

11 Chilo chicho, naye Sauli kawatuma iwanu ukaye kwa Daudi wamlole ka kabaho ili wamkome nemitondo. Lekeni Mikali, pinga wa Daudi kamlongela, "Ichilo achino ka ng'utsuma baye ilupfi nemitondo kutsokomighwa." 12 Apfo Mikali kamwapfila Daudi kuhulumka kubitila mna lidilisha, naye katsuma, koka. 13 Mikali kasola chinyagho, kachiwasitsa mlunanda na mna litwi lyake kachipfatsa mighala ya mene, kuya kachighubika gholole. 14 Sauli hayawatumile iwanu wakamghoghe Daudi, Mikali kawalongela Daudi koghula. 15 Kuya Sauli kawatuma woye ako keli, kawalaghitsa, kalonga, "Ngalileni Daudi hata ka kamlunanda lwake nimkome." 16 Iwanu awala hawengile mng'anda mwa Daudi na kuchilola ichinanda, wona kuna chinyagho na mighala ya mene mwitwi mwake. 17 Kuya Sauli kamghutsa Mikali, "Heule kongutsukila apfino? Kumlekelela aduwi yangu yatsume?" Naye Mikali kamwidika Sauli, "Kanongela, ‘Undeke mbuke hela nitsokukoma.’ "

18 Apfo Daudi katsuma, kaghenda Rama kwa Samweli. Kamlongela Samweli ghose ghayamtendele Sauli. Kuya Daudi na Samweli waghenda kukala mna ing'anda ya manabii ikemighwe Nayoti. 19 Hambele Sauli kahulika ka Daudi yang'ali kuna ing'anda ya manabii ako Rama. 20 Apfo Sauli kawatuma iwanu waghende kumghogha Daudi. Lekeni hawonile iwanabii wotabili na Samweli kowalongotsa, Muhe we Imulungu kawatsila awala watumighwa wa Sauli nawo pfipfila wandusa kutabili aku wakwimba. 21 Sauli hayahulike tsimbuli atsino, kawatuma watumighwa wangi, nawo pfipfila wanza kutabili. Haipfikile lwakadatu Sauli kawatuma watumighwa wangi nawo pfipfila wandusa kutabili. 22 Kuya yeye mwenyegho kaghenda Rama. Hayapfikile mna chisima chikulu ako Seku kampfika imunu yumwe na kamghutsa, "Samweli na Daudi walikwani?" Imunu ayo kamwidika, "Wa Nayoti kuna ghumji ghwa Rama." 23 Naye Sauli kaghenda Nayoti ako Rama. Hayapfikile ako, muhe wa Imulungu kamtsila, naye kandusa kutabili na kubigha, kudalamka aku kamnzila mbaka hayapfikile Nayoti ako Rama. 24 Katsula maghwanda ghake na yang'ali yotabili hambele ha Samweli. Tsakakala chidako na kawasa pfipfio chilo na misi. Achino chicho chiwatendile iwanu walonge, "Apfi Sauli naye ka yumwe wa manabii?"