1 Daudi kaghenda Nobu, kwa mtambika Ahimeleki. Ahimeleki kaghenda kumbokela Daudi aku koghudema, kamghutsa, "Heule utsile uliyeka? Na ng'wilongotse na munu baye?"

2 Daudi kamwidika, "Mfalume yuyo iyanilaghitse nitse ahano, kanongela ndeke kumlongela imunu wowose achila chayanitumile. Twilaghana na iwanu wangu twitingane hanu hangi. 3 Angu una chinu chachi mmoko chaukuja? Ungaye pfighate pfitano au chochose chauli nacho ahano."

4 Mtambika Ahimeleki kamwidika, "Ahano nahela chighate chatujagha. Ninapfo pfighate ipfienzeluke pfiliyeka. Mwodaha kwing'ighwa pfighate apfo ka ng'amuwasile baye na iwapinga mna matsuwa aghano chidogho."

5 Daudi kamwidika, "Nene wanu wangu ng'atawasile ghendo baye na wapinga mna matsuwa aghano madatu. Iwanu wangu wela, ng'awawasagha baye na wapinga hata hatughendagha kusang'ana chila tsuwa. Apfi ng'awenzeluke ng'ani baye mna isang'ano aino ng'ulu?"

6 Apfo imtambika kamwing'a Daudi pfighate pfienzeluke kwaapfila tsakuduhu pfighate pfingi ila apfo ipfienzeluke ipfikwikighwa hambele ha IMNDEWA. Mna litsuwa alyo imtambika tsakalapfa pfighate kulawa hambele ha IMNDEWA na keka pfighate pfingi ipfokighwe sambi. 7 Mna litsuwa alyo tsahana mtumighwa yumwe wa Sauli iyobamighwa kutendighwa yele hambele ha IMNDEWA. Imtumighwa ayo tsakakemighwa Doegi, Mwedomi, chilongotsi wa iwadimi iwang'ali womdimila wanyama wake Sauli. 8 Daudi kamlongela Ahimeleki, "Apfi ahano kuna panga au mgoha ungaye? Kwaapfila ing'onde iyangayile mfalume inenda mbuke himahima, na nene tsambuka aku sisolile baye lipanga lyangu wala chinu chochose achila."

9 Ahimeleki kamwidika, "Ninalyo lipanga lya Mfilisti Goliati yumkomile mna lwanda lwa Ela, lya kuchughu mwa chitsibao lyohighwa na ichitambala. Ung'abama kulisola, lisole kwaapfila ahano haduhu panga lingi ila lilyo liliyeka." Daudi kamwidika, "Haduhu ka alino, ungaye lilyo."

10 Kuya Daudi katsuma litsuwa lilila, kaghendelela kumpfuka Sauli, kaghenda kwa mfalume Akishi wa Gati. 11 Watumighwa wamlongela mfalume wawo Akishi, "Angu ayuno si Daudi baye, mfalume wa isi? Apfi ayu si yuyula baye iwanu iwang'ali womwimbila apfino mna tsingoma tsawo, 'Sauli kakoma maelufu na Daudi kakoma wanu makumi elufu?"

12 Daudi katsika tsimbuli atso mmoyo mwake, na kampfuka ng'ani Akishi mfalume wa Gati. 13 Apfo Daudi ketenda yoneke ka mkalukwale, hawabamile wamghoghe yeye yang'ali yokwalatula imilango, na kaghaleka ghamate ghasulule mna tsindepfu tsake. 14 Akishi kawalongela iwatumighwa wake, "Mwomanya imunu ayuno ka mkalukwale, heule mngalila nene? 15 Apfi nene nahela iwanu wane lukwale mbaka mwongalila imunu ayuno yanidese hambele hangu? Apfi imunu ayuno katsakwingila mng'anda mwangu?"