1 Wafilisti wawatinganitsa hamwe maasikali wawo ako Afeki, na Waisiraeli tsaweka indalo yawo habehi na imbwibwi ili Yezireeli. 2 Wakulu watano wa Wafilisti hawang'ali woluta na iwanu wawo iwali mamiya kwa maelfu, Daudi na iwanu wake wang'ali wowawinza kuchughu aku wolongotsighwa na mfalume Akishi. 3 Iwakulu wa ing'ondo wa Wafilisti waghutsa, "Waeburaniya awano wotenda choni ahano?" Akishi kawedika iwakulu awo wa Wafilisti, "Ayuno Daudi, mtumighwa wa Sauli mfalume wa Isiraeli, yeye kakala na nene kwa miyaka aino yose. Tangiya hayatsumile kuna nene, nene sonile lyolyose baye lihile kuna yeye mbaka leloli aino."

4 Lekeni iwakulu wa ing'ondo wa Wafilisti wamwonela maya ng'ani Akishi wamlongela, "Umuyitse yaghende yakakale hanu haumwing'ile. Yaleke kughenda na twetwe ukwitowa, hela kodaha kughalambuka, yawe munu iyotuhila kwing'ondo. Angu ng'ukona baye ka imunu ayuno katselamlitsa keli na imkulu wake kwa ukuwakoma iwanu wetu? 5 Apfi ayuno si Daudi yuyula baye iwapinga iwang'ali womwimba mna tsingoma tsawo, ‘Sauli kakoma wanu maelufu, lekeni Daudi kakoma wanu makumi elufu’?"

6 Apfo Akishi kamkema Daudi kamlongela, "Nelaha kwa IMNDEWA iyali mghima, ghweghwe kwa munu iyotogholighwa. Tsapfinogha nene na ghweghwe tuke wose kwing'ondo, kwapfila tangiya hautsumile kuna nene, nene sonile lyolyose baye lihile kuna ghweghwe mbaka leloli aino. Lekeni iwakulu ng'awokutoghola baye. 7 Lelo uye ukaye, ughende tseghamba, uleke kuwadesa iwakulu wa wafilisti."

8 Daudi kamwidika, "Lekeni nene nendile choni? Angu wonile choni chihile kuna nene mtumighwa wako tangiya hanitsile kuna ghweghwe mbaka leloli aino? Heule ndeke kughenda ukwitowa na iwanu iwomwihila mkulu wangu, mfalume?"

9 Akishi kamwidika, "Nomanya ghweghwe kunogha hambele hangu ka apfila pfayali imalaika wa Imulungu, lekeni iwakulu wa Wafilisti walonga apfino, ‘Ayuno yaleke kughenda na twetwe kung'ondo.’ 10 Lelo, ghweghwe na watumighwa wa imkulu wako Sauli iwatsile hamwe naghwe, ilupfi nemitotondo hakutsakwenzeluka, mlamke mke."

11 Apfo ilupfi yake nemitondo, Daudi na iwanu wake woka woya mna isi ya Wafilisti, lekeni Wafilisti waghenda Yezireeli.