1 Samweli kamlongela Sauli, "IMNDEWA kanituma nikubakatse mapfuta uwe mfalume wa iwanu wake wa Isiraeli. Lelo tegheletsa mbuli ya IMNDEWA. 2 IMNDEWA yana ingupfu ng'ani kolonga, ‘Nitsowadununza Waamaleki kwaaapfila wawatowa Waisiraeli hawang'ali wolawa Misiri. 3 Lelo, ghenda ukawatowe na kupfihinya pfinu pfose pfawali napfo. Uleke kuwonela libatsi, uwakome wose, wamale, wapinga, iwana wadowado, iwana iwoghwawa, ng'ombe, wang'olo, ngamiya na pfihongwe.’"

4 Sauli kawakema iwanu wose, kawakaghula ako kuna ghumji ghwa Telaimu. Tsakuna maasikali laki mbili iwoghenda kwa maghulu, na elufu kumi kulawa kabila lya Yuda.

5 Kuya Sauli na iwanu wake waghenda mna isi ya Amaleki, wakala kulwanda kuwapfisiya. 6 Sauli kawalongela Wakeni, "Mke! Laweni mwibaghule na Waamaleki, ndeke kuwakoma hamwe nawo. Mlawe kwaapfila mwemwe tsamuwatendela pfinoghile Waisiraeli hawalawile Misiri."

Apfo Wakeni tsawoka, webaghula na Waamaleki. 7 Sauli kawatowa Waamaleki kwandusila Havila mbaka Shuri, ubali wa kumoso wa Misiri. 8 Tsakamghogha Agagi mfalume wa Waamaleki yang'ali ka mghima. Kawakoma iwanu wose kwa lipanga. 9 Lekeni Sauli na iwanu wake ng'awamkomile baye Agagi, wala wang'olo na wang'ombe iwanenehe, wala iwana wang'olo na iwana wa wang'ombe iwananene na chinu chochose ichoneke chinogha ng'awachihinyile baye. Lekeni pfose pfihile na ipfilihela sang'ano wapfihinya.

10 Kuya IMNDEWA kamlongela Samweli, 11 "Nakwona usungu kwa kumtenda Sauli yawe mfalume. Yeye kaleka kuniwinza na ng'oghakinda baye malaghitso ghangu." Samweli kasing'inika, kamlilila IMNDEWA chilo chose. 12 Ilupfi yake, Samweli kalamka nemitondotondo kaghenda kwitingana na Sauli, lekeni munu yumwe kamlongela, "Sauli tsakaghenda Karimeli na kuko ketsengela imwenyegho mnala ghwa kumbukumbu yake na sambi koka, kaghenda Giligali." 13 Samweli hayampfikile Sauli, Sauli kamlongela Samweli, "IMNDEWA yakubaliki! Nikinda laghitso lya IMNDEWA."

14 Samweli kamghutsa, "Mbona nohulika wang'olo na wang'ombe wolila?"

15 Sauli kamwidika, "Iwanu ng'awawakomile baye wang'olo na wang'ombe iwanenehe ng'ani iwawasolile kulawa kwa Wamaleki, wawaleka wamlapfile IMNDEWA, Imulungu wako nambiko, lekeni wangi wose tuwakoma."

16 Samweli kamlongela Sauli, "Nyamale! Nitsokulongela imbuli iyanilongele IMNDEWA leloli nechilo." Sauli kalonga, "Nongele."

17 Samweli kamlongela, "Hata ka tsakwibona kwa mdodo, apfi ghweghwe ng'utendighwe baye mkulu wa ghamakabila gha Isiraeli? IMNDEWA kakubaka mapfuta uwe mfalume wa Isiraeli. 18 Kuya IMNDEWA hayakutumile kakulongela, ‘Ghenda ukawakome ghendo awala Waamaleki, awo wose wana nzambi, witowe nawo mbaka uwakome wose!’ 19 Heule lelo, ng'umtegheletse IMNDEWA? Heule msumkila ukusola pfinu na ukutenda ghehile hambele ya IMNDEWA?"

20 Sauli kamwidika, "Nimtegheletsa IMNDEWA. Tsang'enda akula kwanitumile IMNDEWA, nimleta Agagi mfalume wa Waamaleki na niwakoma ghendo Waamaleki. 21 Lekeni iwanu wasola pfinu, wang'olo, wamene, wang'ombe na pfinu pfose ipfinoghile ipfilapfighwe pfihinyighwe ili kumtambikila IMNDEWA, Imulungu wako ako Giligali."

22 Naye Samweli kalonga, "Apfi IMNDEWA kobama ghendo nambiko tsa ukulakatsighwa na nambiko kubita ukumtegheletsa yeye? Lola, pfinogha ukumtegheletsa yeye kubita kulapfa nambiko, na pfinogha kumtegheletsa yeye kubita kumlapfila mapfuta gha mvulati. 23 Ukulema kutegheletsa kweghala na inzambi ya uhawi, na chidandali cheghala na ghehile na kutamanila pfinyagho. Kwaapfila kulema lilaghitso lya IMNDEWA naye kakulema uleke kuwa mfalume."

24 Sauli kamlongela Samweli, "Nitotsa. Nileka laghitso lya IMNDEWA na laghitso lyako, kwaaapfila niwapfuka iwanu, niwahulikitsa wawo. 25 Lekeni sambi nokulomba, undeghusile totso lyangu. Ndeke mbuye naghwe, nidahe kumtamanila IMNDEWA."

26 Samweli kamwidika, "Ndema, sidaha baye kuya hamwe naghwe. Ghweghwe kulema lilaghitso lya IMNDEWA, naye kakulema uleke kuwa mfalume wa Isiraeli."

27 Samweli hayahunduke yoke, Sauli kakindilisa libeme lya lighwanda lyake, nalo lidegheka. 28 Kuya Samweli kamlongela Sauli, "Kulawa leloli IMNDEWA kausola ufalume wa Isiraeli kulawa kuna ghweghwe na katsomwing'a munu yungi mna iwanu iwali habehi naghwe, iyanoghile kubita ghweghwe. 29 Imulungu yana ingupfu wa Isiraeli ng'oghutsuka baye, wala ng'oghalambuka baye. Yeye si munu baye mbaka yaghalambuke."

30 Sauli kamwidika, "Nitotsa. Lekeni nokulomba uleke kunihumbula hambele ha iwakulu wa iwanu wangu na Waisiraeli. Ndeke mbuye hamwe naghwe nikamtamanile IMNDEWA, Imulungu wako." 31 Apfo Samweli koya hamwe na Sauli, na Sauli kamtamanila IMNDEWA.

32 Kuya Samweli kalonga, "Ngalileni ahano Agagi mfalume wa Waamaleki." Agagi kamghendela aku kohighwa na ng'apfukile baye na kolonga,, "Usungu wa lifwa upfosa ghendo." 33 Samweli kalonga, "Ka lipanga lyako pfaliwatendile tsina mai wengi wana wawo wafe, naye mai wako imwanaghe katsakufa." Kuya Samweli kamghanaghana Agagi pfihande hande hambele ha IMNDEWA ako Giligali.

34 Kuya Samweli kaghenda Rama na mfalume Sauli koya ukaye yake ako Gibeya ya Sauli. 35 Kulawa litsuwa alyo, Samweli ng'amwonile keli baye Sauli mbaka litsuwa hayafile. Lekeni Samweli yang'ali yomdomboketsela Sauli. Naye IMNDEWA kona usungu kwaapfila kamwika Sauli yawe mfalume wa Isiraeli.