1 Mna ghamatsuwa agho, Wafilisti wawatinganitsa maasikali wao waghende waketowe na Waisiraeli. Akishi kamlongela Daudi, "Umanye ghendo ghweghwe na iwanu wako mwobamighwa mghende na nene ukwitowa."

2 Daudi kamwidika Akishi, "Ona! Kutsakwona ghumwenyegho ichinu chayodaha kutenda mtumighwa wako." Akishi kamlongela, "Pfinogha, nitsokutenda unibetetseghe nene ghamatsuwa ghose."

3 Lelo Samweli ma tsakafa na Waisiraeli wose wamdomboketsela na kumtsika mna ghumji ghwake ghwa Rama. Sauli tsakawawinga kulawa muisi watowa lamli na iwahawi wose.

4 Wafilisti wetingana hamwe na weka ndalo yawo ako Shunemu, na Sauli kawatinganitsa hamwe Waisiraeli wose na weka ndalo yawo ako kuna ichidunda cha Giliboa. 5 Sauli hayawonile maasikali wa Wafilisti tsakapfuka, kanza kudedema, ghomoyo ghwake ghupfuka ng'ani. 6 Tsakamlomba IMNDEWA yatende choni, lekeni IMNDEWA ng'amwidike baye, kwa ndoto, wala kwa ghamabwe gha Urimu na thumuni, wala kwa manabii. 7 Kuya Sauli kawalaghitsa watumighwa wake, "Nibamileni pinga iyodaha kutowa lamli, nimghendele yakanitowele lamli." Watumighwa wake wamwidika, "Kakuko pinga yumwe mtowa lamli ako Endori."

8 Apfo Sauli tsaketenda ka munu yungi na kapfala maghwanda ghangi, kaghenda ako na iwanu wake weli. Tsawapfika nechilo kwa ipinga ayo, kamlongela, "Nokubama ulonge na ghumtsimu, na unyinulile ayula yanitsokulongela taghwa lyake."

9 Ipinga ayula kamlongela, "Ghweghwe kwomanya ghendo achila chayatendile mfalume Sauli. Kawawinga watowa lamli na wahawi wose mna isi ya Isiraeli. Heule lelo kwobama unyonze na unikome?"

10 Sauli kelaha kwa taghwa lya IMNDEWA, kalonga, "Nelaha kwa IMNDEWA iyali mghima, ng'utsohighighwa baye kwa ichinu achino."

11 Ipinga ayula kamghutsa, "Kobama nikwinulile nani kulawa ako kutsimu?" Sauli kamwidika, "Unyinulile Samweli." 12 Ipinga ayula hayamwonile Samweli keduka, kalonga, "Wenye ghwee!" Kuya kamlongela Sauli, "Hebali ungutsukile? Ghweghwe kwa Sauli!"

13 Mfalume Sauli kamlongela, "Uleke kupfuka! Ukwona choni?" Ipinga ayula kamwidika, "Nakona mtsimu ghogheluka kulawa mdongo."

14 Sauli kamghutsa ipinga ayula lwakeli, "Ghukonekatse?" Ipinga ayula kamwidika, "Nomwona munu kalala kogheluka, naye kapfala lijoho." Baho Sauli tsakatanga ka imunu ayo Samweli. Sauli kamwinamila mbaka chihanga chake chidonza hasi.

15 Samweli kamlongela Sauli, "Heule konitsupfa kwa kunighelusa uchanya?" Sauli kamwidika, "Nene noghanzika sideke! Wafilisti wetowa na nene, na Imulungu kandeka. Ng'onyidika keli baye kwa kubitila manabii wala kwa ukulota. Apfo nikukema unongele nende choni."

16 Samweli kalonga, "Heule unighutsa nene akuno IMNDEWA kakuleka, naye kokuhila? 17 IMNDEWA kakutendela achila chayakulongele kubitila nene. IMNDEWA kauboka ufalume kulawa mna ghamoko ghako, na kamwing'a Daudi, imunu wa habehi yako yumwihila. 18 IMNDEWA kakutendela aghano leloli kwaapfila ghweghwe ng'umtegheletse baye IMNDEWA wala ng'utendile baye achila ichibamighwa ahala IMNDEWA hayakulaghitse ukawakome Waamaleki. 19 IMNDEWA katsokughela ghweghwe na Waisiraeli wose mna ghamoko gha Wafilisti. Ilupfi ghweghwe na iwanagho mtsakuwa ahano hamwe na nene. Pfipfila IMNDEWA katsowaghela maasikali wa Isiraeli mna ghamoko gha Wafilisti."

20 Bahala Sauli kaghwa hasi, kegholosa, akuno kodedema kwa achila chayalongile Samweli. Ng'awile na ngupfu baye, kwaapfila tsang'ajile chinu baye litsuwa lyose, chilo na misi. 21 Baho ipinga ayula kamsoghelela Sauli na kamwona Sauli koghudema ng'ani, kamlongela, "Nene mtumighwa wako tsa natiyali nife kwa ukutenda aghala ghaunongele nikutendele. 22 Lelo tanu unitegheletse nene mtumighwa wako, undeke nikwing'e chijo uje, naghwe upate ngupfu tsa ukughendelela na ghumwanza ghwako."

23 Lekeni Sauli kalema, kalonga, "Sikuja baye." Lekeni iwatumighwa wake na ipinga ayula, wamdedetsa yaje, naye kawatogholela. Apfo kenuka na kakala mnanda. 24 Ipinga ayula tsakana ng'ombe wake yumwe mdoghodogho iyanenehe ukaye yake, katenda himahima kamchinja, kasola utimbo, kaukanda na kambika chighate ichilihela hamila. 25 Kamwing'a Sauli na iwanu wake, nawo waja. Kuya wenuka woka chilo chicho.