1 IMNDEWA kamghutsa Samweli, "Kutsomlilila Sauli mbaka tsuwachi? Ghweghwe komanya ka nene nimlema yaleke kuwa mfalume wa Isiraeli. Lelo, memetsa imembe mapfuta, uke. Nokutuma kwa Yese iyokala mna isi ya Betilehemu. Kwaapfila nimpata mfalume mna iwanaghe."

2 Samweli kalonga, "Nitsoghendatse? Sauli yang'ahulika imbuli aino, katsonikoma!" IMNDEWA kamlongela, "Usole ng'ombe pinga, ing'ana yeleke baye ughende naye, na ung'apfika ako ulonge, ‘Nitsa kumlapfila IMNDEWA nambiko.’ 3 Mkeme Yese yatse kuna litambiko alyo na nene nitsokulangusa cha ukutenda. Kutsonibakila mapfuta ayula yanitsokulongela."

4 Samweli katenda ka IMNDEWA pfayamlongele, kaghenda Betilehemu. Wakulu wa isi tsawalawa kumbokela aku wodedema, wamghutsa, "Pfihi kutsa tseghamba?" 5 Samweli kawedika, "Nitsa tseghamba. Nitsa kumlapfila IMNDEWA nambiko. Mwitende mwele kuya tughende kumlapfila IMNDEWA nambiko." Samweli kamtenda Yese kela hamwe na iwanaghe. Kawakema kuna inambiko.

6 Nawo hawapfikile, na Samweli hayamwonile Eliabu kelongela imwenyegho mmoyo, "Mbakighwa mapfuta wa IMNDEWA yuyo ayuno ghendo iyali hambele ha IMNDEWA!" 7 Lekeni IMNDEWA kamlongela Samweli, "Uleke kulolesa ichihanga chake, wala chimo chake. Nene nimlema, kwaapfila silolesa baye ka iwanu pfawololesa. Imunu kololesa kwakunze, lekeni nene nololesa mna ghumoyo."

8 Kuya Yese kamkema Abinadabu na kumghala hambele ya Samweli. Lekeni Samweli kalonga, "Ayu ng'asaghulighwe baye na IMNDEWA." 9 Yese tsakamghala Shama. Samweli kalonga, "Wala ayuno ng'asaghulighwe baye na IMNDEWA." 10 Yese kawaghala iwanaghe wose saba hambele ha Samweli, lekeni Samweli kamlongela, "IMNDEWA ng'amsagule baye munu wowose mna awano." 11 Kuya Samweli kamghutsa Yese, "Pfihi wanagho wose wabahano?" Yese kamwidika, "Mbe, imwana mdodo ng'alibaha baye, kaghenda kudima wang'olo." Samweli kamlongela, "Mtume munu yamkeme, twetwe ng'atutsokala hasi tuje baye mbaka hayatsakutsa ahano."

12 Apfo Yese kamlaghitsa munu, naye katsa naye. Imsongolo ayula tsamdung'u, nenge tsake tsinogha, na lukuli lwake ludegheta. IMNDEWA kamlongela Samweli, "Lelo, ayu yuyo yeye, winuke umbake ghamapfuta." 13 Samweli kasola imembe ina ghamapfuta kambaka Daudi mapfuta hambele ha ndughu tsake. Bahala Muhe wa IMNDEWA kamtsila Daudi kwa ngupfu, kakala naye tangia litsuwa alyo na kughendelela. Kuya Samweli koya Rama.

14 Baho Ghumuhe ghwa IMNDEWA kamleka Sauli, na muhe yehile itumighwe na IMNDEWA tsaimtsupfa. 15 Watumwa wake Sauli wamlongela, "Twomanya ka muhe yehile kulawa kwa IMNDEWA kokutsupfa. 16 Lelo, ghwe mtwatsa wetu, laghitsa watumighwa wako iwokutumikila wambame imunu iyodaha kutowa ching'weng'we, na ayo muhe yehile kulawa kwa Imulungu hayatsakutsa, imunu ayo katsotowa ching'weng'we, naghwe kutsohona."

17 Sauli kawalongela iwatumighwa wake, "Nibamileni imunu ayo iyodaha kutowa iching'weng'we pfinoghile, mngalile."

18 Imtumighwa wake yumwe kalonga, "Nimwona mwana wa Yese, iyokala Betilehemu, ayo kadaha kutowa ching'weng'we. Imsongolo ayo kakengela na kana ngupfu ya kwitowa mna ing'ondo, kolonga pfinoghile na kanogha, na IMNDEWA kahamwe naye."

19 Apfo Sauli kaghala nume kwa Yese, kalonga, "Ngalile imwanagho Daudi, iyodima wang'olo na wamene." 20 Yese kamghala Daudi kwa Sauli, naye kaghenda na mene mdodo na chihongwe iyamtwikile pfighate, na chiliba chimemile dipfai. 21 Daudi hayapfikile kamtumikila Sauli. Sauli kamkunda ng'ani Daudi, na kamsaghula yamghalile silaha tsake. 22 Kuya Sauli kamtumila nume Yese kalonga, "Nomkunda Daudi, mleke yakale na nene yanitumikile." 23 Chila imuhe ayula yehile kulawa kwa Imulungu hayamtsile Sauli, Daudi kasola iching'weng'we chake na kuchitowa, imuhe ayo yehile kamleka Sauli, naye kahona.