1 Kuya Samweli kasola supa ya ghamapfuta kamghidila Sauli mwitwi, kamnonela kamlongela, "IMNDEWA kakubaka ghamapfuta uwe mtawala wa iwanu wake. 2 Leloli hatwitsehagha, kwitsetingana na wanu weli habehi na likabuli lya Raheli ako Selisa mna isi ya Benjamini. Iwanu awo watsokulongela ka wapfihongwe awala waung'ali uwabama woneka. Aba wako kaleka kuwalangula wapfihongwe iwaghile na sambi kokwalangula ghweghwe, na keghutsa ‘Nendetse nimpate mwanangu?’ 3 Kulawa aho kutsoghenda kuna ghumbiki ghwa mwaloni ighuli Tabori, kuko kwitsetingana na wamale wadatu mnzila woghenda kumlapfila Imulungu nambiko ako Beteli. Munu yumwe kana mene wadowado wadatu, wakeli kakinda pfighate pfidatu, na wakadatu kakinda supa ya dipfai. 4 Nawo watsokulamsa na kukwing'a pfighate pfili, naghwe kutsopfibokela. 5 Kuya hautsopfika ako Gibea ya Imulungu kuna indalo ya maasikali wa Wafilisti, hautsopfika habehi na ghumji, kwitsetingana na manabii wengi iwohulumka kulawa hanu henulighwe ha ukutambikila aku wotowa pfinubi, pfigoma, pfimbeta na zeze, aku wotabili. 6 Ghumuhe ghwa IMNDEWA katsokutsila kwa ngupfu, naghwe kutsotabili hamwe nawo, naghwe kutsoghalambuka na kuwa munu yungi. 7 Aho haghatsolawila agho, utende chochose chaukona chinogha, kwaapfila Imulungu ka hamwe naghwe. 8 Kuya unongolele, uhulumke, ughende kuna ghumji ghwa Giligali, na nene nitsakutsa kuko kulapfa nambiko tsa ukulakatsighwa na nambiko tsa ukukala tseghamba. Kutsonibeta kuko kwa matsuwa saba mbaka nitse nikulanguse cha ukutenda."

9 Sauli hayahunduke yoke, Imulungu kaghutenda ghumoyo ghwa Sauli ghughalambuke. Aghala ghose ghayalongile Samweli ghalawila mna litsuwa lilyo. 10 Sauli na mtumighwa wake hawapfikile ako Gibea, kabokelighwa na manabii wengi. Ghumuhe ghwa Imulungu kamtsila kwa ngupfu na Sauli kandusa kutabili hamwe na manabii awo. 11 Iwanu wose iwammanyile Sauli kulawa ghumwande hawamwonile kotabili, weghutsa, "Chinu chachi ichimpatile mwana wa Kishi? Angu Sauli naye kayumwe wa manabii?" 12 Imunu yumwe, iyang'ali yokala aho, kalonga, "Apfi aba wawo nani?" Apfo kulawila ng'ungo ilongile, "Apfi naye Sauli kayumwe wa manabii?" 13 Sauli hayamalitse ukutabili, kaghenda hanu henulighwe ha ukutambikikila.

14 Aba wake mdodo Sauli hayamwonile Sauli na mtumwa wake, kawaghutsa, "Tsamghendile kwani?" Sauli kamwidika, "Tsatughenda kuwabama pfihongwe, na hatwonile ng'atuwona baye, tughenda kwa Samweli."

15 Aba mdodo wa Sauli kamlongela, "Chonde chonde, nongele chayakulongele Samweli."

16 Sauli kamwidika, "Katulongela ka wapfihongwe woneka." Lekeni Sauli ng'amlongele ka Samweli tsakamlongela katsakuwa mfalume.

17 Apfo Samweli kawakema iwanu wose wetingane hambele ha IMNDEWA ako Mispa. 18 Hawapfikile kawalongela, "IMNDEWA, Imulungu wa Isiraeli, kolonga apfino, ‘Niwalapfa mwemwe Waisiraeli mna isi ya Misiri, niwakombola kulawa kwa Wamisiri na iwanu wose iwawadununze. 19 Lekeni leloli mndema nene Imulungu wenu yaniwakombole kulawa mna ukughaya kwenu na mna ukudununzika kwenu, namwe mlonga, baye! Twing'e mfalume yatulongotse. Lelo mtse hambele hangu kwa makabila ghenu, na kwa kolo tsenu.’"

20 Kuya Samweli kaghaghala habehi makabila ghose gha Isiraeli, na IMNDEWA kalisaghula likabila lya Benjamini kwa kwasa simbi. 21 Kalighala hambele likabila lya Benjamini, kwa kulola tsikolo tsake, pfatsili na lukolo lwa Matiri lusaghulighwa kwa kwasa simbi. Kuya kawaghala hambele iwana wamale wa Matiri. Na Sauli imwana wa Kishi kasaghulighwa. Lekeni hawambamile ng'awamwonile baye. 22 Wamghutsa keli IMNDEWA, "Pfihi imunu ayo ma kapfika ahano?" IMNDEWA kawedika, "Ona kabaha, lekeni kepfisa ahala hana imitsigho."

23 Apfo watsuma, wambama Sauli na hawamwonile wamghala kuna iwanu. Sauli hayemile mghati mwa iwanu, tsamtali kubita iwanu wose. 24 Samweli kawalongela iwanu wose, "Mwomwona? Ayu yuyo imunu iyasaghulighwe na IMNDEWA, mna iwanu wose, kuduhu imunu iyali ka yeye." Iwanu wose wakemelela, "Imulungu yakwike mfalume!"

25 Kuya Samweli kawalongela iwanu tsing'onde tsayatsotenda imfalume na aghala ghayatsobama wamtendele, kuya katsandika tsing'onde atso mchitabu na kachika hambele ya Imulungu. Kuya Samweli kawaleka iwanu woke, na chila munu koya ukaye yake. 26 Pfipfila, Sauli koya ukaye yake ako Gibea, aku kelongotsa na iwanu iwadahile ukwitowa, awala Imulungu iyalongile nawo mna imimoyo yawo. 27 Lekeni wanu wangi mbughilambughila, walonga, "Apfi imunu ayuno katsodaha kutukombola?" Tsawambetsa Sauli na ng'awamwing'ile nzawadi baye. Lekeni yeye kenyamala tulu.