1 Mna ghamatsuwa agho imsongolo Samweli yang'ali yomtomikila IMNDEWA aku kolongotsighwa na Eli. Usenga na ghamaono kulawa kwa IMNDEWA pfing'ali pfilawila mala lumwelumwe. 2 Eli tsakalala mbaka tsinenge tsake tsanza ukuleka kwona pfinoghile. Chilo chimwe tsakawasa mna ichiheleto chake, 3 naye Samweli tsakawasa mna ing'anda ya IMNDEWA habehi na Lisanduku la laghano lya Imulungu. Na ichitasa cha Imulungu tsaching'ali chikwaka kwaapfila tsakung'ali ng'ana kuche baye. 4 Apfo IMNDEWA kakema, "Samweli!" Naye Samweli kedika, "Oo, na ahano!" 5 Kuya Samweli katsuma kamghendela Eli, kamlongela, "Nitsa, ghweghwe kung'ema." Lekeni Eli kamwidika, "Nene sikukemile baye, ghenda ukawase." Samweli koka kaghenda kuwasa.

6 IMNDEWA kamkema keli Samweli, "Samweli!" Baho Samweli kalamka, kamghendela Eli, kamlongela, "Nitsa, ghweghwe kung'ema." Lekeni Eli kamlongela, "Mwanangu sikukemile baye, ghenda ukawase keli." 7 Samweli tsang'ana yamtange baye IMNDEWA, na usenga wa IMNDEWA ng'ana umlawile baye.

8 IMNDEWA kamkema Samweli lwa kadatu, Samweli kalamka, kamghendela Eli, kamlongela, "Nitsa ghweghwe kung'ema." Baho Eli katanga ka iyamkemile Samweli tsa IMNDEWA. 9 Apfo Eli kamlongela Samweli, "Ghenda ukawase na yang'akukema, ulonge apfino, ‘Longa ghwe IMNDEWA, nene mtumighwa wako nokutegheletsa!’ " Kuya Samweli kaghenda kuwasa hanu hake.

10 Hambele IMNDEWA katsa kamwimila habei na kamkema Samweli ka pfayamkemagha, "Samweli! Samweli!" Samweli kalonga, "Longa, nene mtumighwa wako nokutegheletsa."

11 Baho IMNDEWA kamlongela Samweli, "Lola, nene nobama nende chinu mna isi ya Isiraeli, na chila munu hayatsohulika katsakwiduka. 12 Mna litsuwa alyo nitsomtendela Eli na ikaye yake aghala ghose ghanongole ukulonga. 13 Nimlongela ka nitsoidununza kaye yake ghamatsuwa ghose, kwa ighehile ghayamanyile kwaapfila iwanaghe wandigha nene, naye ng'awaghomile baye. 14 Apfo nilaha ghendo, ka inzambi ya Eli na iwanaghe ng'aileghusighwa baye kwa nambiko ya mnyama au ya pfinu."

15 Samweli kawasa ahala mbaka nemitondo, kuya kalamka, kapfughula imilango ya ing'anda ya IMNDEWA. Lekeni kapfuka ukumlongela Eli achila chayahulike kulawa kwa Imulungu. 16 Eli kamkema Samweli, "Mwanangu Samweli." Samweli kamwidika, "Oo, mkulu wangu!"

17 Eli kamghutsa, "Angu IMNDEWA yakulongele choni? Uleke kunipfisa chayakulongele. Ka kutsonipfisa, Imulungu katsokudununza ng'ani." 18 Apfo Samweli kamlongela ghose, ng'ampfisile chinu chochose baye. Naye Eli kalonga, "Yeye yuyo IMNDEWA, yatende chochose chayakona chinogha."

19 Samweli kakula na IMNDEWA tsakahamwe naye, na aghala ghose ghayalongile kuduhu hata limwe ing'alitimile. 20 Iwanu wose mna isi ya Isiraeli kulawa ghumji ghwa Dani ubali wa Kasikazini mbaka Beeri Sheba ubali wa kusini watanga ka Samweli tsa nabii ghendo wa IMNDEWA. 21 IMNDEWA kaghendelela ukwilangusa ako Shilo, kwayamlawile Samweli na ukulonga naye. Naye Samweli hayalongile chinu Waisiraeli wose wang'ali womtegheletsa.