1 Lelo Wafilisti tsawetowa na Waisiraeli kuna ichidunda cha Giliboa. Waisiraeli wengi wakomighwa kuko, lekeni Sauli na iwanaghe na Waisiraeli wamwenga wawatsuma Wafilisti. 2 Wafilisti wawawinzilitsa Sauli na wanaghe, kuya wamkoma Yonasani, Abinadabu na Malikishua, iwanaghe Sauli. 3 Ing'ondo ya Wafilisti na Sauli tsaiwa ng'ulu ghendo, na iwanu iwakwasa imishale kwa minde tsawamwona na wamwasila Sauli imishale yawo, na wamlagha pfihile. 4 Baho Sauli kamlongela imunu ayula iyamdutile imigoha na imishale yake, "Somola limaghe lyako unihome nife, hela iwanu awano ing'awengile ngoma baye watsonihoma na limaghe na kunibetsa." Lekeni imunu ayo kalema, kapfuka ghendo. Apfo Sauli kasola lipanga lyake mwenyegho, kalighwila. 5 Kuya imunu ayula hayonile Sauli kafa, pfipfila naye kaghwila lipanga lyake, naye pfipfila kafa. 6 Apfi pfipfo Sauli na iwanaghe wadatu na imunu ayula iyamdutile ghumgoha na imishale na iwanu wake wose pfawafile litsuwa lilyo limwe. 7 Waisiraeli iwakalile mmbalimbali mwa likonde, na awala iwakalile kumwambu mwa ghumto Yoridani hawonile Waisiraeli watsuma, naye Sauli na iwanaghe wafa, waileka imiji yawo, watsuma. Wafilisti waghenda na kukala mna imiji yawo.

8 Ilupfi yake, Wafilisti hawaghendile kusola ipfinu pfa iwanu awala iwakomighwe, wona lukuli lwa Sauli na tsing'uli tsa iwanaghe mna chidunda cha Giliboa. 9 Wamghana litwi Sauli na wamtsula ipfinu pfake pfa ukwitowela, kuya wawatuma iwanu waghende mna isi yose ya Filisti wakakemelele ukufa kwa Sauli kuna tsing'anda tsa imilungu yawo na kuna iwanu wawo. 10 Pfinu pfake pfa ing'ondo wapfika kuna ing'anda ya imulungu Ashitaroti, kuya walukondeka ilukuli lwake kuna ubanda wa ghumji ghwa Beti Shani.

11 Lekeni iwanu wa Yabeshi Gileadi hawahulike Wafilisti chawamtendele Sauli, 12 iwanu wose wana tsingupfu tsawoka, waghenda chilo chose, wahulumsa ilukuli lwa Sauli na tsing'uli tsa iwanaghe kulawa kuna ubanda wa Beti Shani, watsa nayo mbaka Yabeshi na watsilakatsa ako. 13 Hambele, waisola mipate yawo na kuitsika kuhisi kwa mbiki ghwa mkwaju ako Yabeshi, nawo wafunga ukuja kwa matsuwa saba.