1 Sauli hayafile, Daudi na wayaghe tsawoya kulawa kuwatowa Waamaleki, na kakala Sikilagi kwa matsuwa meli. 2 Tsuwa lya kadatu, munu yumwe kulawa kuna indalo ya Sauli, aku maghwanda ghake kaghadegha kwa usungu, aku kemwaghila timbwisi mwitwi kamghendela Daudi. Hayampfikile Daudi kamghwila hambele hake kamtamanila. 3 Daudi kamghutsa, "Kwaulawa kwani?" Naye kamwidika, "Nitsuma kulawa kuna indalo ya Waisiraeli." 4 Daudi kamlongela, "Nongele aghala ighalawilile ako." Imunu ayula kamwidika, "Wanu wengi watsuma kulawa kung'ondo na wengi wakomighwa. Pfipfila Sauli na imwanaghe Yonasani nawo wakomighwa."

5 Daudi kamghutsa imsongolo ayula, "Umanyiletsa ka Sauli na Yonasani mwanaghe wakomighwa?" 6 Imsongolo ayula kamwidika, "Hanili mna ichidunda cha Giliboa, tsanimwona Sauli keghamila mgoha ghwake na mituka ya wadina falasi ing'ali imsoghelela habehi ng'ani. 7 Sauli hayahunduke kuchisogho, tsakambona kanikema. Na nene nyidika, ‘Oo, na ahano.’ 8 Yeye kangutsa, ‘Ghweghwe uli nani?’ Nene nimwidika, ‘Nene na Mmaleki.’ 9 Baho kanongela, ‘Seghela habehi unikome kwaapfila wanitowa ng'ani. Lekeni ning'ali mgima.’ 10 Apfo nimghendela nimkoma, kwapfila tsanimanya yang'aghwa hasi ng'ohona baye. Kuya nisola litaji alila ilikalile mwitwi mwake na likung'u lili mmoko mwake, pfose nikughalila ghweghwe mkulu wangu."

11 Baho Daudi na iwanu wake waghadegha maghwanda ghawo kwa usungu. 12 Walila na ukudomboketsa na waleka ukuja mbaka nemihe kwa ukukomighwa kwa Sauli, na Yonasani imwanaghe, na ukukomighwa kwa iwanu wa Waisiraeli, iwali wanu wa IMNDEWA, kwaapfila wanu wengi tsawakomighwa kung'ondo. 13 Daudi kamghutsa imsongolo ayula iyamlongele agho, "Ulawile kwani?" Naye kamwidika, "Nene na Mmaleki, lekeni nokala muisi mwako ka mgheni." 14 Daudi kamghutsa, "Tsayuiletsa ghweghwe ng'upfukile baye kugholosa ghumoko ghwako na kumkoma imunu iyasaghulighwe na IMNDEWA kwa kubakighwa mapfuta?" 15 Kuya Daudi kamkema msongolo wake yumwe kamlongela, "Mkome imunu ayuno!" Naye imsongolo ayula kamtowa Imuamaleki ayula, naye kafa. 16 Daudi kalonga, "Ukukomighwa kwako kwiyonza ghumwenyegho, kwaapfila ghweghwe mwenyegho kulonga kwa mlomo ghwako, ‘Nimkoma imunu iyasaghulighwe na IMNDEWA kwa kubakighwa mapfuta.’ "

17 Daudi kawembila Sauli na Yonasani imwanaghe wila wa ukudomboketsa. 18 Na kalaghitsa iwanu wa Yuda wafundighwe wila auno, nawo wandikighwa mna ichitabu cha Yashari.

19 "Gwe Isiraeli,

iwanu wighodela,

wakomighwa mna ipfidunda pfako.

Lola, iwanu iwadahile ukwitowa pfawakomighwe!

20 Mleke kuwalongela iwanu wa isi ya Gati imbuli aino,

wala mleke kulalatsa mna tsikaye tsa Ashikeloni.

Hela neghe tsawo Wafilisti watsoseka.

Na neghe tsawo awo ing'awengile ngoma watsodeng'elela.

21 Mwemwe pfidunda pfa Giliboa mleke kuwa na tungwe wala mvula mna mwemwe.

Wala imighunda yenu ileke kwota chinu chochose.

Kwaapfila ako ingawo ya ayula yana ingupfu ighwa,

ingawo ya Sauli ng'aibakighwe keli mapfuta baye.

22 Kwa idamu ya awala iwakomighwe,

na ng'uli tsa awala wana tsingupfu,

imishale ya Yonasani ng'ayuyile hela baye,

wala lipanga lya Sauli ng'alyuyile hela baye.

Liwakoma wanu wengi.

Ona, liwakoma iwanu iwadahile ukwitowa.

23 Sauli na Yonasani, hawakalile waghima iwanu wawakunda na wawadeng'elela.

Tsawakala hamwe, na hawafile,

wafa hamwe.

Tsawabewe kubita magengele,

ona, tsawana ngupfu ghendo kubita simba.

24 Mwemwe wapinga wa Isiraeli,

mlilileni Sauli!

Tsakawapfatsa maghwanda madung'u ighanoghile,

kaghahamba maghwanda ghenu kwa nzahabu.

25 Lola iwanu wana ingupfu pfawaghwile kung'ondo!

Yonasani kakomighwa mna ipfidunda.

26 Nokwonela usungu ndughu yangu Yonasani,

matsuwa ghose kunikunda,

ukunikunda kwako kunikangawatsa,

ukunikunda kwako kunikangawatsa kubita iwapinga pfawokunda.

27 Lola iwanu iwadahile ukwitowa pfawaghwile,

na tsisilaha tsawo tsilekighwa, tsahela sang'ano."