1 Ishibosheti mwana wa Sauli hayahulike Abineri kakomighwa ako Hebroni, katenyuka ghumoyo na iwanu wose wa Isiraeli wengilighwa na wogha. 2 Ishibosheti mwana wa Sauli, tsakana wanu weli iwali wakulu wa makingili gha wabapfi, yumwe tsakakemighwa Baana na yungi tsakakemighwa Rekabu. Wose weli tsawana wa Rimoni, imunu wa likabila lya Benjamini iyalawile mna ghumji ghwa Beeroti. Ghumji ghwa Beeroti pfipfila tsaghukala mji ghwa wanu wa kabila lya Benjamini. 3 Iwanu wa Beeroti tsawatsumila Gitaimu na wokala ako mbaka leloli.

4 Yonasani mwana wa Sauli, tsakana mwana yaholole maghulu ghose meli, imwana ayo tsakakemighwa Mefibosheti. Mefibosheti tsakana miyaka mitano ahala tsimbuli tsa ukufa kwa Sauli na Yonasani hatsipfikile kulawa Yezireeli. Ipinga iyang'ali yomlela hayahulike Sauli na Yonasani wakomighwa ako Yezireeli, kamsola Mefibosheti katsuma naye. Lekeni hayang'ali yotsuma naye himahima, imwana ayo kaghwa, kawa chimbete.

5 Rekabu na Baana, iwana wa Rimoni iyolawila Beeroti, waghenda ukaye kwa Ishibosheti. Wapfika ako nemisi, Ishibosheti hayang'ali yobwihila ukaye yake. 6 Wengila mng'anda watenda ka wobama kusola ngano, wampfika Ishibosheti kawasa mlusatsi mna ichiheleto chake, wamuhoma mgoha munda. 7 Hawengile mng'anda kwayawasile Ishibosheti mlusatsi, wamkoma, wamgana litwi lyake, kuya Rekabu na Baana watsuma woka nalyo chilo chose kwa nzila ya Araba. 8 Kuya wamghalila mfalume Daudi litwi lya Ishibosheti ako Hebroni, wamlongela mfalume Daudi, "Alino ahano litwi lya Ishibosheti, mwana wa Sauli, iaduwi wako iyabamile kukukoma. Leloli ghwe mkululu wangu mfalume, IMNDEWA kamliha Sauli na watsukulu wake kwa aghala ghayakutendele."

9 Lekeni Daudi kawedika Rekabu na Baana, iwana wa Rimoni, imunu wa Beeroti, "Nelaha kwa litaghwa lya IMNDEWA iyali mgima, yeye iyanikombole mna ghamadununziko ghose! 10 Imunu ayula iyatsile kunongela ako Sikilagi, ka Sauli kafa, tsakaghamba ka kongalila mbuli inoghile, nimghogha na kumkoma. Acho chicho chanimghwekile kwa tsimbuli tsake tsayangalile! 11 Lelo imunu yehile yang'amkoma imunu yanoghile mng'anda mwake na mna ilusatsi lwake, pfihi ng'apfinoghile baye na nene nimkome naye yahupe muisi?" 12 Daudi kawalaghitsa asikali wake, wawakoma Rekabu na Baana. Wawagana ghamoko ghawo na ghamaghulu ghawo na wakondeka ng'uli tsawo mmbalimbali mwa litsimbu lili Hebroni. Lekeni walisola litwi lya Ishibosheti walitsika mna likabuli lya Abineri ako Hebroni.