1 Tsuwa limwe, Daudi kaghutsa, "Angu hana munu wowose iyasighale mgima mna kaye ya Sauli? Ka kabaho, nobama nimtendele ghanoghile kwaajili ya Yonasani."

2 Tsahana mtumighwa yumwe ukaye kwa Sauli iyakemighwe Siba. Naye tsakakemighwa yaghende kwa Daudi. Mfalume Daudi kamghutsa, "Angu ghweghwe kwa Siba?" Naye kamwidika, "Ona, nene na yuyo mtumighwa wako."

3 Mfalume kamghutsa, "Hana munu wowose iyasighale mgima ukaye kwa Sauli? Ka kabaho nobama nimtendele uluso wa Imulungu."

Siba kamwidika, "Kabaho mwana wa Yonasani, lekeni yeye chimbete."

4 Mfalume kamghutsa, "Yalikwani?" Siba kamwidika, "Ka ukaye kwa Makiri mwana wa Amieli ako Lo Debari." 5 Apfo mfalume Daudi kawatuma wanu wakamsole, naye kaghalighwa kulawa ukaye kwa Makiri mwana wa Amieli ako Lo Debari.

6 Apfo Mefibosheti mwana wa Yonasani, mtsukukulu wa Sauli kaghenda kwa mfalume, kenama mbaka chihanga chake chidonza hasi hambele ha mfalume Daudi. Daudi kamkema, "Mefibosheti." Naye kamwidika, "Oo! Nene ahano mtumighwa wako."

7 Daudi kamlongela, "Uleke kupfuka. Nene nitsokutendela uluso kwaajili ya aba wako Yonasani. Nitsokuyitsila imighunda yose ya sekulu wako Sauli. Naghwe kutsakuja na nene matsuwa ghose."

8 Mefibosheti kenama mbaka chihanga chake chidonza hasi, kuya kalonga, "Nene na yumbwa yafile, heule unitendele apfino?"

9 Kuya mfalume Daudi kamkema Siba mtumighwa wa Sauli, kamlongela, "Ipfinu pfose pfikalile pfa Sauli na kaye yake, nimwing'a mtsukulu wa mkulu wako. 10 Ghweghwe na iwanagho na watumighwa wako mtsomlimila Mefibosheti na mtsomghalila mapfuno ili mtsukulu wa mkulu wako yawe na chijo matsuwa ghose. Lekeni yeye katsakuja na nene." Ghamatsuwa agho, Siba tsakana wana wamale kumi na watano na watumighwa ishilini. 11 Kuya Siba kamlongela mfalume, "Nene mtumighwa wako, nitsotenda ghose ka pfaulongile." Apfo Mefibosheti yang'ali yakujagha na Daudi ka yumwe wa iwana wa mfalume.

12 Mefibosheti tsakana mwana mdodo mmale iyakemighwe Mika. Iwanu wa kaye ya Siba tsawawa watumighwa wa Mefibosheti. 13 Apfo Mefibosheti, chimbete yang'ali yokala Yerusalemu na ukuja na mfalume matsuwa ghose.