1 Daudi mwana wa Yese imunu iyatendighwe na Imulungu yawe mkulu, iyabakighwe ghamapfuta na Imulungu wa Yakobo. Waisiraeli wang'ali wodeng'elela ukwimba wila tsake. Apfo Daudi kamalitsa kwa ukwimba wila auno:

2 Muhe wa IMNDEWA tsakalonga kubitila nene,

na malonga ghake kagheka mna ghumlomo ghwangu.

3 Imulungu wa Isiraeli kalonga,

bambalawe lya Isiraeli kanilongela:

"Mfalume iyowatawala iwanu pfaibamighwa,

iyotawala aku kompfuka Imulungu,

4 yeye pfayali ka ghumwanga ghwa nemitondo,

na litsuwa ililawa nemitondo lilihela bingu,

na ka imvula itenda imitsani yote."

5 Apfo pfipfo pfaili ing'anda yangu hambele ha Imulungu,

kwa apfila katenda laghano na nene ilikala matsuwa ghose, na laghano ing'alighaluka.

Naye katsongaya chochose chanibama.

6 Lekeni iwanu iwehile weghala na tsimiwa itsikwasighwa,

kwaapfila ng'atsidaha baye ukusolighwa na ghumoko.

7 Imunu iyatsotsisola kobamighwa yatumile chuma au mhini ghwa mgoha.

Iwanu awo watsolakatsighwa ghendo mna ghumoto.

8 Aghano ghaho mataghwa gha wakulu wa ing'ondo wayakalile nawo Daudi: Yoshebu Bashebeti na Mtakimoni iyakalile chilongotsi wa awala wadatu, yeye tsaketowa kwa mgoha ghwake na kakoma wanu miya nane mna ng'ondo imwe.

9 Imunu wa keli kulawa mna maasikali awo wadatu, tsa Eleazari mwana wa Dodo, wa lukolo lwa Mwahohi. Tsuwa limwe Eleazari na Daudi wawaligha Wafilisti iwetingane wetowe nawo. Baho Waisiraeli wawatsuma Wafilisti, 10 lekeni Eleazari kaghangamala ghendo ketowa na Wafilisti mbaka ghumoko ghwake ghwipfa ghendo mbaka ghubemba, na ghukala ghukindilisa lipanga lyake. Mna litsuwa alyo IMNDEWA kahuma ghendo. Kuya Waisiraeli woya hanu hayakalile Eleazari, wasola ipfinu pfawawabokile Wafilisti iwakomighwe.

11 Mkulu wa ing'ondo wa kadatu, yuyo Shama mwana wa Agee iyalawile mna ghumji ghwa Harari. Tsuwa limwe Wafilisti wetingana Lehi hana ghumghunda ighumemile idengu, nawo Waisiraeli wawatsuma Wafilisti. 12 Lekeni yeye kema ghoya haghati ghati ha ghumghunda ketowa nawo waleke kughusola ghumghunda aghwo, naye kawakoma Wafilisti. Apfo IMNDEWA kahuma ghendo.

13 Kuya wakulu wadatu mna iwakulu selasini wa ing'ondo, wamghendela Daudi kuna imango ya Adulamu mna msimu ghwa ukupfuna, nawo Wafilisti tsaweka ndalo kuna lwanda lwa Refaimu. 14 Chipindi achila Daudi tsakakala kuna ingome na maasikali wa Wafilisti tsawakala mna ghumji ghwa Betilehemu. 15 Daudi kona ng'ilu ghendo kalonga, "Munu yang'angayile ghamatsi gha ukunwa kulawa kuna ichisima cha Betilehemu ichili habehi na lilango lya ghumji!"

16 Iwakulu awala wadatu webemenyeka wapfosa haghatighati hana indalo ya maasikali wa Wafilisti waghenda kudegha ghamatsi kuna ichisima cha Betilehemu habehi na lilango lya ghumji, wamghalila Daudi. Lekeni Daudi kalema ukughanwa, naye kaghakutula hasi ka nambiko kwa IMNDEWA. 17 Kalonga, "Sidaha baye ukunwa ghamatsi aghano, ghwe IMNDEWA! Angu ghamatsi aghano si ka idamu ya awala iwehonzile iwenyegho wakomighwe?" Apfo Daudi ng'anwele baye ghamatsi agho. Agho ghagho ghawatendile iwakulu awala wadatu wa ing'ondo.

18 Abishai ndughu yake Yoabu tsakakala mkulu wa maasikali awala selasini. Tsakawakoma wanu miya ndatu na mgoha ghwake. Apfo tsakamanyika ka pfawamanyike iwakulu wa ing'ondo awala wadatu. 19 Tsakamanyika ng'ani kwa wakulu wa ing'ondo awala wadatu, na tsakawa chilongotsi wawo, lekeni tsang'amanyike baye ka awala wadatu.

20 Benaya mwana wa Yehoyada kulawa kuna ghumji ghwa Kabizeeli tsakakala asikali mkulu yane ngupfu na katenda pfinu pfingi pfa ukukangawatsa. Tsakawakoma maasikali weli kulawa Moabu, na chipindi cha ibalafu kahulumka mna lipondo kamkoma simba.

21 Pfipfila kalikoma tsinu lya Misiri ilikindile mgoha, lekeni Benaya tsakaghenda na ng'weku iliyeka, kamboka mgoha agho, kamkoma nagho. 22 Apfo pfipfo pfayatendile Benaya mwana wa Yehoyada, tsakawa asikali mkulu mna awala wadatu. 23 Lelo tsakawa munu iyomanyika mna maasikali awala selasini hata ka ng'awile ka awala wadatu. Na Daudi kamtenda yawe mkulu wa maasikali wake mwenyegho. 24 Asaheli ndughu yake Yoabu tsakakala yumwe wa iwakulu selasini. Iwakulu wangi wa Daudi wawo awano: Elihanani, mwana wa Dodo wa Betilehemu. 25 Shama na Elika kulawa Harodi, 26 Helesi kulawa Paliti, Ira mwana wa Ikeshi kulawa Tekoa, 27 Abiezeri kulawa Anatoti, Mebunai kulawa Hushati, 28 Salimoni kulawa Ahohi, Maharai kulawa Netofati, 29 Helebu mwana wa Baana kulawa Netofati, Itai mwana wa Ribai kulawa Gibea mna isi ya Benjamini, 30 Benaya, kulawa Piratoni, Hidai kulawa pfikolongo pfa Gaashi, 31 Abialiboni kulawa Araba, Azimaweti kulawa Bahurimu, 32 Eliaba, kulawa Shaaliboni wana wa Yasheni, na Yonasani. 33 Pfipfila Shama kulawa Harari, Ahimu mwana wa Sharari, kulawa Harari, 34 Elifeleti mwana wa Ahasibahi kulawa Maaka, Eliamu mwana wa Ahitofeli kulawa Gilioni, 35 Hesirawi kulawa Karimeli, Paarai kulawa Mwaribi, 36 Igali mwana wa Natani kulawa Msoba, Bani kulawa Gadi, 37 Seleki kulawa Amoni, Naharai kulawa Beeroti iyang'ali yoghala tsisilaha tsa Yoabu imwana wa Seruya, 38 Ira na Gerebu iwolawa Yatiri, 39 na uria iyolawa Hiti. Maasikali wose iwadahile ukwitowa ghoya tsa selasini na saba.