1 Haghamalile aghano, Daudi kamlomba IMNDEWA, kalonga, "Pfihi ngeluke kuna ghumji ghumwe ghwa isi ya Yuda?" IMNDEWA kamlongela, "Ghenda!" Daudi kamghutsa, "Ng'ende mji ghwachi?" IMNDEWA kamwidika, "Ghenda kuna ghumji ghwa Hebroni." 2 Apfo Daudi kaghenda Hebroni, yeye na wapinga wake weli, Ahinoamu kulawa isi ya Yezireeli, na Abigaili, chitsuka wa Nabali, iyalawile ghumji ghwa Karimeli. 3 Pfipfila koka na iwanu iyakalile nawo, chila munu na wanu wa kaye yake, nawo tsawakala mna imiji ili mmbalimbali mwa Hebroni. 4 Iwanu wa Yuda wamghendela Daudi ako Hebroni wambaka mapfuta yawe mfalume wawo. Daudi hayahulike ka iwanu wa Yabeshi Gileadi wawo iwamtsikile Sauli, 5 kawatuma wasenga waghende wakawalongele iwanu wa Yabeshi Gileadi apfino, "IMNDEWA yawabaliki kwaapfila mtenda ghoya kwa kumtsika Sauli mfalume wenu. 6 IMNDEWA naye yawatendele uluso na yatogholeke kuna mwemwe. Na nene nitsowatendela ighanoghile kwa aghano ghamtendile. 7 Lelo mgangamale na mleke kutenyuka. Mfalume wenu Sauli kafa na iwanu wa Yuda wanisaghula nene na kunibaka mapfuta niwe mfalume wawo."

8 Abineri mwana wa Neri, mkulu wa maasikali wa Sauli tsakamsola Ishibosheti mwana wa Sauli kamghala ako Mahanaimu. 9 Ako, Abineri kamtenda Ishibosheti yawe mfalume wa Gileadi, Ashuru, Yezireeli, Efraimu, Benjamini na isi yose ya Isiraeli. 10 Ishibosheti hayanduse kuitawala Isiraeli tsakana miyaka alubaini, naye tsakatawala kwa miyaka mili. Lekeni likabila lya Yuda tsalimuwinza Daudi ka mfalume wawo. 11 Daudi tsakawa mfalume wa likabila lya Yuda kwa miyaka saba na miyetsi sita, ukaye yake tsa ako Hebroni.

12 Abineri mwana wa Neri, hamwe na iwakulu wa Ishibosheti, imwana wa Sauli tsawalawa Mahanaimu waghenda Gibeoni. 13 Yoabu mwana wa Seruya na watumighwa wangi wa Daudi, nawo walawa wetingana na Abineri na iwanu iyakalile nawo habehi na tsimbu ilili ako Gibeoni. Nawo wakala hasi, wangi kumwambu akuno kwa litsimbu, na wangi kumwambu akula. 14 Abineri kamlongela Yoabu, "Waleke iwasongolo wetowe hambele hetu!" Yoabu kamlongela, "Pfinogha."

15 Apfo wasoghela hambele wasongolo kumi na weli wa likabila lya Benjamini wa Ishibosheti mwana wa Sauli, na wasongolo kumi na weli wa Daudi. 16 Chila yumwe kamghogha mwitwi iyetowa naye, kamhoma kwa lipanga mlubapfu, apfo iwasongolo wose weli waghwa hasi wafa. Apfo hanu hao hakemighwa Helikati Hazurimu, ako Gibeoni, mana yake, "Mghunda ghwa mapanga."

17 Litsuwa alila tsawetowa ng'ani. Abineri na iwanu wa Isiraeli watowighwa ng'ani na iwanu wa Daudi. 18 Iwana wadatu wa Seruya, Yoabu, Abishai na Asaheli tsawabahala. Asaheli yang'ali yotsuma ka dondolo. 19 Asaheli kamuwinga Abineri na ng'ahunduke baye kumoso wala kujilo. 20 Abineri hayahunduke kuchisogho na kumwona Asaheli, kamghutsa, "Pfihi ghweghwe kwa Asaheli?" Asaheli kamwidika, "Ona, nene."

21 Kuya Abineri kamlongela, "Leka kuniwinga, hunduka umghoghe msongolo yumwe umboke tsisilaha tsake." Lekeni Abineri ng'alekile baye kumuwinga.

22 Abineri kamlongela keli Asaheli, "Leka kuniwinzilitsa! Hebali nikukome? Angu ichihanga changu nitsochika kwani hambele ha ndughu yako Yoabu?" 23 Lekeni Asaheli kalema kuhunduka. Apfo Abineri kamhoma munda chisengele nyuma na mgoha, na ghumgoha agho ghumlawila Asaheli kumghongo. Asaheli kaghwa hasi, na bahala kafa. Iwanu wose hawapfikile hanu hayafilile Asaheli wema.

24 Lekeni Yoabu na Abishai wamuwinza Abineri. Litsuwa haling'ali litsama tsawapfika mna ichidunda cha Ama, ichili ubali wa mashaliki wa Gia mna inzila ighendile mna inyika ya Gibeoni.

25 Iwanu wa likabila lya Benjamini tsawetingana, hamwe na Abineri, na wakala kingili limwe nawo tsawema mchidando. 26 Baho Abineri kamkemelela Yoabu, "Apfi twitsetowa ghamatsuwa ghose? Angu ng'aukwona baye ka kwatutsighila kuna usungu? Angu tsuwachi utsowalaghitsa iwanu wako waleke kuwawinzilitsa ndughu tsawo?"

27 Yoabu kamwidika, "Nelaha kwa Imulungu yana mgima, ung'alekile kulonga mbuli aino, iwanu wangu wang'aghendelele ghendo kuwawinzilitsa ndughu tsawo mbaka ilupfi nemitondo." 28 Apfo Yoabu katowa malati, baho iwanu wose waleka kuwawinzilitsa Waisiraeli, wala ng'awetowile keli baye.

29 Chilo chose Abineri na iwanu wake tsawaluta mna ulwanda wa Araba. Tsawaloka ghumto Yoridani, wanga isi yose ya Bitironi mbaka wapfika Mahanaimu.

30 Yoabu hayoile kumuwinzilitsa Abineri, kawatinganitsa iwanu wake wose, na katanga ka wanu kumi na tisa wa Daudi ng'awali baho baye, ung'aleka kumpeta Asaheli.

31 Lekeni wanu wa Daudi wawakoma wanu miya ndatu na sitini wa Abineri, iwalawile mna likabila lya Benjamini. 32 Yoabu na iwanu wake walusola ilukuli lwa Asaheli, walutsika mna likabuli lya aba wake, lili Betilehemu. Yoabu na iwanu wake wanga chilo chose, na hakuchele wapfika Hebroni.