1 Haghwanduse ghumwaka ghungi, msimu ghwa wafalume kughenda kung'ondo, Daudi tsakamtuma Yoabu yakawatowe Waamori, akuno kelongotsa na wakulu wa ing'ondo, na maasikali wose Waisiraeli. Nawo wawatowa na waghupfingila ghumji ghwa Raba. Lekeni Daudi mwenyegho yeye kakala Yerusalemu.

2 Tsuwa limwe nemihe, Daudi kalamka mnanda kadina mchanya mwe ing'anda yake ya chifalume. Kulawa kuko kamwona pinga yumwe kakogha, na ipinga ayo tsakanogha sideke. 3 Daudi kamtuma munu yaghutse ipinga ayo tsa nani. Imunu ayo kamlongela Daudi, "Ipinga ayo Batisheba neghe Eliabu, na mlume wake Uria, kulawa likabila lya Wahiti." 4 Daudi kawatuma wasenga wamghale. Kuya Batisheba katsa kwa Daudi naye Daudi kawasa naye, ipinga ayo tsakalawa sambi kumto, na tsakela, kuya koya ukaye yake.

5 Ipinga ayo tsakakinda inda, naye katuma munu yakamlongele Daudi ka kana inda yake.

6 Kuya, Daudi katuma nume kwa Yoabu kalonga, "Mtume Uria, wa likabila lya Hiti yatse kuna nene." Naye Yoabu kamtuma Uria yaghende kwa Daudi. 7 Uria hayapfikile, Daudi kamghutsa ka Yoabu kamgima, na iwanu wose ka wawagima, na ing'ondo pfaighendelela. 8 Kuya Daudi kamlongela Uria, "Uye ukaye yako ukabwihile chidogho." Uria koka kulawa kuna ing'anda ya chifalume. Kuya mfalume Daudi kamtuma munu yamghalile nzawadi Uria. 9 Lekeni Uria ng'oyile ukaye yake baye, tsakawasa hamwe na watumighwa wose wa mfalume wake hane ghumlango ghwa ing'anda ya mfalume. 10 Daudi hayahulike ka Uria ng'okile baye ukaye yake, kamghutsa, "Ghweghwe kulawa kutali. Heule ng'aukile baye ukaye yako?"

11 Uria kamwidika Daudi "Sanduku lya laghano, hamwe na wamale we ng'ondo wa Isiraeli na Yuda wokala mna ipfibumbulika. Imkulu wangu Yoabu na watumighwa wa mfalume wokala kune mighunda. Apfi pfinogha nene ng'ende ukaye nikaje na ukunwa na kuwasa na ipinga wangu? Nene nelighita hambele hako sitenda baye chinu ka acho."

12 Kuya Daudi kamlongela Uria, "Ukale ahano mbaka ilupfi, kuya nitsokuleka uke." Apfo litsuwa lilyo, Uria tsakakala Yerusalemu na ilupfi yake, 13 Daudi kamkema Uria. Naye kaja na kunwa hamwe naye. Kuya Daudi kamnwesa Uria mbaka kapaitika. Hata apfo, chilo achila Uria ng'okile baye ukaye yake, ila kawasa mna chilagho chake hamwe na watumighwa wa mfalume wake. 14 Nemitondo, Daudi kandika baluwa, kamwing'a Uria yamghalile Yoabu. 15 Mna ibaluwa ayo Daudi tsakandika apfino; "Umwike Uria yeme hane msululo ghwa hambele, aho hane ng'ondo ng'ulu, kuya mumleke baho na muye kuchughu aho katsotowighwa na kakufa." 16 Apfo Yoabu hayang'ali koghupfingilila ghumji, kamwika Uria yeme hanu hayamanyile hana maasikali iwowehila iwadahile ukwitowa. 17 Iwanu wa ghumji agho walawa na kwitowa na Yoabu. Watumighwa wangi wa Daudi tsawakomighwa, Uria, Mhiti naye pfipfila kakomighwa.

18 Baho Yoabu katuma munu yakamlongele Daudi chila chinu ichilawile kung'ondo, 19 naye kamlaghitsa apfino, "Haumalitsa kumlongela mfalume chila chinu ichilawile kung'ondo, 20 na mfalume yang'aghudubuka na kukughutsa, ‘Heule msoghelele habehi hamghendile kughutowa ghumji? Angu ngammanyile baye ka wang'awatowile na imishale kulawa mna imibanda ya ghumji ghwao? 21 Nani iyamkomile Abimeleki mwana wa Yerubesheti? Apfi si pinga yumwe baye iyasile libwe lya kuhondela kulawa mbanda, nalyo limkoma Abimeleki mna isi ya Tebesi? Heule msoghelele habehi na ubanda?’ Yang'akughutsa apfo, ghweghwe kutsomlongela apfi, ‘Hata mtumighwa wako Uria, Mhiti naye kafa.’"

22 Imsenga ayula kaghenda kwa Daudi kamlongela ghose ghayatumighwe na Yoabu yaghalonge. 23 Imsenga ayula kamlongela Daudi, "Maduwi tsetu tsawana ngupfu kubita twetwe, walawa mna tsikaye tsawo na watutsila kuna imighunda, lekeni twetwe tuwawinga mbaka kuna lilango lya ghumji. 24 Kuya watwasila imishale twetwe watumighwa wako kulawa mwibanda. Watumighwa wako wangi tsawakomighwa, hata mtumighwa wako Uria, Mhiti, naye pfipfila kafa."

25 Daudi kamlongela imunu ayula, "Ukamlongele apfino Yoabu, ‘Imbuli aino ileke kukutenyula ghumoyo, kwaapfila lipanga lyahela nenge, lyokoma wowose ayula. Mwongetse ngupfu mna kughutowa ghumji mbaka ghughwe’. Pfipfo pfautsomlongela Yoabu yaleke kutenyuka ghumoyo."

26 Batisheba mwehe wake Uria, hayahulike ka mmale wake kafa, kamlilila mmale wake. 27 Ichililo hachimalile, Daudi kalaghitsa Batisheba yasolighwe yaghalighwe ukaye yake. Batisheba kawa pinga wa Daudi, naye kamwelekela Daudi mwana mmale. Lekeni ichinu acho chayatendile Daudi chimwihila IMNDEWA.