1 Lelo, Imulungu kamtuma nabii Nasani kwa Daudi. Nasani kamghendela Daudi kamlongela, "Tsakuna wanu weli mna ghumji ghumwe, yumwe tsakana mali nyingi na yungi tsa muhingwa. 2 Ayula iyana tsimali tsakana ng'olo wengi na ng'ombe wengi. 3 Lekeni umuhingwa ayula tsakana ng'olo pinga yumwe mdodo iyamghulile. Tsakamlela, naye kakulila ukaye yake hamwe na iwanaghe. Ichijo chayakuja yeye naye ing'olo wake kakuja chicho, na ichikombe chayang'ali yakunwela chicho chayanwele ing'olo ayo, pfipfila yang'ali yomuhaghatilagha mmambagha. Ing'olo ayo tsakawa ka neghe wake imuhingwa ayo. 4 Tsuwa limwe kapfika mgheni yumwe ukaye kwa imunu ayula yana tsimali. Lelo ayula yana tsimali ng'abamile baye kusola ing'olo wake yumwe au ng'ombe wake yamchinjile mgheni wake, ila kaghenda kumboka imuhingwa ayula ing'olo wake, yakamchinjile imgheni wake."

5 Daudi hayahulike agho, kamghudubukila imunu ayula yana tsimali, kamlongela nabii Nasani, "Nelaha kwa IMNDEWA iyali mgima, imunu iyatendile chinu achino kobamighwa yafe ghendo! 6 Kobamighwa yamlihe imuhingwa ayula ng'olo wane kwa ayula yumwe iyambokile, kwaapfila chayatendile chiha na kahela libatsi."

7 Nasani kamlongela Daudi, "Ghweghwe yuyo imunu ayo! Lelo apfi pfipfo IMNDEWA, Imulungu wa Isiraeli pfayolonga, ‘Nene nikubaka mapfuta uwe mfalume wa Isiraeli na nikukombola mna ghamoko gha Sauli. 8 Tsanikwing'a ing'anda yake, na wehe wake wawe wako, kuya tsanikwing'a iwanu wa Isiraeli na Yuda uwatawale. Ka aghano ghanikwing'ile tsa chidogho kuna ghweghwe, ning'akongetse keli kubita agho. 9 Ule lelo, kubetsa laghitso lyangu nene IMNDEWA, na kutenda alino lihile hambele hangu? Kumkoma Uria, Mhiti kung'ondo, kumsola pinga wake yawe pinga wako. Kuwatumila Waamoni kumkoma Uria kung'ondo! 10 Lelo iwanu wa ikaye yako nawo ng'awatsoleka ukukomighwa baye, kwaapfila ghweghwe kunibetsa na kumsola pinga wa Uria, Mhiti yawe pinga wako.’ 11 Lelo tegheletsa chayolonga IMNDEWA, ‘Lola, nitsokughalila maghayo kuna ing'anda yako mwenyegho. Nitsowasola wapinga tsako aku mwenyegho kolola kwa nenge tsako na nitsomwing'a mmale yungi, naye katsowasa nawo hatselu. 12 Ghweghwe tsakutenda chinu achino kwa kwipfisa, lekeni nene nitsotenda aghano nemisi ghendo aku Waisiraeli wose wolola.’ "

13 Lelo Daudi kamlongela Nasani, "Nimtendela nzambi IMNDEWA." Nasani kamlongela, "IMNDEWA kakuleghusila nzambi tsako, naghwe ng'utsakufa baye. 14 Lekeni kwaapfila kumbetsa ghendo IMNDEWA, imwanagho yautsomweleka katsakufa." 15 Kuya Nasani koya ukaye yake.

IMNDEWA kamtenda imwana wa Betisheba, ipinga wa Uria iyeleke Daudi yaghule. 16 Daudi kamlomba Imulungu imwana yahone. Tsakafunga ukuja, kengila kuna ichiheleto chake, kawasa hasi chilo chose. 17 Iwanzehe wa ing'anda yake wema habehi naye, wabama yenuke, lekeni yeye kalema na ng'ajile baye chijo chochose hamwe nawo. 18 Mna litsuwa lya saba hambele, imwana ayo kafa. Watumighwa wa Daudi tsawapfuka kumlongela ka imwana kafa, kwaapfila tsawaghamba, "Imwana hayang'ali kamgima tsatulonga naye lekeni ng'atutegheletse baye. Lelo tutsomlongelatse ka imwanaghe kafa? Ng'ambe katselagha."

19 Daudi hayawonile watumighwa wake wenong'onetsa tsakamanya ka imwanaghe kafa. Apfo kawaghutsa, "Apfi imwana kafa?" Nawo wamwidika, "Ona kafa."

20 Kuya Daudi kenuka ahala hasi, kogha, kebaka ghamafuta na kapfala maghwanda ghake ghangi. Kuya tsakaghenda kuna ing'anda ya Imulungu na kutambika. Pfipfila tsakoya ukaye na kalomba ichijo, keng'ighwa, naye tsakaja. 21 Iwatumighwa wake wamghutsa, "Angu achi chinu chachi chautendile? Imwana hayawile ka mgima ghweghwe kufunga ukuja na kumlilila. Lekeni hayafile, ghweghwe kwinuka na kuja ichijo."

22 Daudi kawedika, "Ona imwana hayakalile mgima tsanifunga na kulila. Tsanitenda apfo kwaapfila tsanonga nani iyomanya? Songaa IMNDEWA katsombonela libatsi ili imwana yawe mgima. 23 Lekeni sambi kafa, heule nene nifunge? Apfi nene nodaha kumuyitsa muisi? Tsuwa limwe nitsoghenda ako kwayaghendile, lekeni yeye ng'odaha baye ukuya kuna nene."

24 Kuya Daudi kamkanza ipinga wake Batisheba. Kawasa naye, naye kakinda inda na keleka mwana mmale, Daudi kamkema taghwa lyake Selemani. IMNDEWA tsakamkunda imwana ayo. 25 Naye IMNDEWA tsakamtuma nabii Nasani yaghende yakamlongele Daudi yamkeme imwana ayo Yedidia, mana yake, iyakundighwe na IMNDEWA.

26 Ichipindi acho Yoabu ketowa na iwanu wa Raba, ghumji ghwa Waamoni, naye kaghuboka ghumji agho ghwa chifalume. 27 Yoabu katuma nume kwa Daudi kalonga, "Nighuboka ghumji ghwa Raba, na niliboka litsimbu lyawo lya ghamatsi. 28 Lelo wakeme maasikali wose iwasighale, ukale baho ughutsunguluke na ughuboke. Hela ning'aghuboka nene ghutsokemighwa kwa taghwa lyangu." 29 Apfo, Daudi kawakema asikali wose kaghenda Raba, kaghutowa na kaghuboka ghumji agho. 30 Kuya kasola litaji lya mfalume wawo kulawa mna litwi lyake. Utsito wa litaji alyo lya nzahabu kilo selasini na tano, mghati mwake tsa mna libwe lya bei ng'ulu. Naye Daudi kasola libwe alyo kalika mna litaji lyake na kalipfala mna litwi lyake. Pfipfila tsakaboka pfinu pfingi ng'ani mna ghumji agho. 31 Kuya kawasola iwanu wa isi ayo kaweka wasang'ane kwa kutumila misumeno, sululu tsa chuma, hoya tsa chuma na kuwatumila wasang'ane mna tanuri lya ghamatofali, apfo pfipfo pfaitendile isi yose ya Waamoni. Kuya Daudi na maasikali wose woya Yerusalemu.