1 Absalomu tsakana lumbu wake iyanoghile sideke iyakemighwe Tamari. Amnoni mwana yungi wa Daudi, tsakamkunda sideke Tamari. 2 Amnoni tsakaghanzika sideke kwa kumkunda Tamari, mbaka ketenda yoneke koghula, kwaapfila ghendo Tamari tsang'ana yawase na mmale baye, na ng'aidahike baye kwa Amnoni kutenda naye chinu chochose. 3 Lekeni Amnoni tsakana sale yake iyakemighwe Yonadabu, mwana wa Shama, ndughu yake Daudi. Yonadabu yeye tsakakengela sideke. 4 Yonadabu kamghutsa Amnoni, "Ghweghwe kwa mwana wa mfalume, heule usoka chila hakukucha? Heule ng'aubama baye kunongela?" Amnoni kamlongela apfino, "Nomkunda sideke Tamari, lumbu wa ndughu yangu Absalomu."

5 Yonadabu kamlongela, "Uwase mwisatsi mwako, utende ka koghula, na aba wako hayatsakutsa kukulola, mlongele, ‘Nokulomba, umleke Tamari, yatse yangaye chighate ndiye, na yanyikile chijo hambele hangu ili nichone naye mwenyegho yanyang'itse kwa ghumoko ghwake.’"

6 Apfo Amnoni kaghendelela kawasa mlili. Mfalume hayaghendile kumlola, Amnoni kamlongela, "Nokulomba umleke Tamari yatse ahano yanyambikile pfighate hambele hangu, kuya yeye mwenyegho yanyang'itse."

7 Apfo Daudi katuma wanu wakamlongele Tamari yaghende ukaye kwa Amnoni yakamwambikile ichijo. 8 Naye Tamari kaghenda ako, kampfika Amnoni kawasa. Kasola utimbo kaupfulugha koka pfighate aku Amnoni kolola. 9 Tamari kahula ichiya china ipfighate kamghalila Amnoni, lekeni Amnoni tsakalema kuja, kalonga, "Chila munu yalawe kunze," na wose tsawoka. 10 Kuya Amnoni kamlongela Tamari, "Lelo ngalile ipfighate apfo kuna ichiheleto changu, kuya unyang'itse." Tamari kasola ipfighate pfayambike kapfighala kuna ichiheleto cha Amnoni. 11 Hayang'ali yomwang'itsa ipfighate apfo, Amnoni kamghogha Tamari, kamlongela, "Utse uwase na nene."

12 Tamari kamlongela, "Baye lumbu wangu, uleke kuninanahitsa. Chinu achino ng'achibamighwa baye chitendeke mna Isiraeli. Uleke kutenda chinu achino cha ubotsi. 13 Lelo nene, chihanga changu nitsochika kwani kwa chinyala acho? Naghwe ng'ambe kutsakuwa yumwe wa wabotsi mna isi ya Isiraeli. Lelo nokulomba ulonge na mfalume, yeye ng'atsokughoma baye kunikwela." 14 Lekeni Amnoni ng'abamile baye kumtegheletsa kwaapfila tsakana ngupfu kubita yeye, kamnanahitsa kawasa naye.

15 Kuya Amnoni kamwihila ng'ani Tamari. Tsakamwihila Tamari kubita pfayang'ali yomkunda aho mwanduso. Kamlongela Tamari, "Lawa uke."

16 Tamari kamwidika, "Si pfipfo baye lumbu wangu, ukuniwinga nene kwakuwa kwiha kubita apfila pfaunitendele." Lekeni Amnoni ng'abamile baye kumtegheletsa. 17 Kamkema msongolo wake iyang'ali iyomtumikila, kamlongela, "Mlapfe ipinga ayuno hambele hangu. Na uhinde ghumlango." 18 Imsongolo ayula kamlapfa kunze, kahinda ghumlango. Tamari tsakapfala joho tali likighwe unzolingo lina ghamoko matali kwaapfila apfo pfipfo pfawapfalile neghe tsake mfalume iwali ng'ana wawase na mmale baye mna matsuwa agho. 19 Baho, Tamari kebaka lipfu mwitwi, kadegha lijoho lyake, keka ghamoko ghake mwitwi, kuya koka aku kangula chililo.

20 Lumbu wake Absalomu hayamwonile kamghutsa, "Angu Amnoni kawasa na ghweghwe? Nyamale lumbu wangu. Yeye ka ndughu yako. Imbuli aino ileke kukutama ng'ani mmoyo." Apfo Tamari tsakakala ukaye kwa Absalomu, aku kana usungu mkulu.

21 Mfalume Daudi hayahulike aghala ighatendeke tsakona maya ng'ani. 22 Absalomu tsakamwihila sideke Amnoni, ng'alongile naye baye kwa chochose chila chiwe chiha au chinogha, kwaapfila tsakamghogha kwa ngupfu lumbu wake na kuwasa naye.

23 Miyaka mili hambele, Absalomu na watumighwa wake wang'ali wowaghana imighala wang'olo wake ako Baali Hasori habehi na ghumji ghwa Efraimu. Kawakema iwana wamale wose wa mfalume waghende kuna ichihungo.

24 Absalomu kamghendela mfalume Daudi, kamlongela, "Lola nene mtumighwa wako ninawo iwanu iwowaghana wang'olo imighala. Nokulomba ghweghwe mfalume hamwe na watumighwa wako, tukeni hamwe na nene mtumighwa wako."

25 Mfalume kamwidika, "Baye mwanangu, tuleke kughenda wose, hela tutsakuwa mtsigho kuna ghweghwe." Hata ka Absalomu yang'ali yomdedetsa aba wake yaghende, lekeni mfalume kalema ukughenda, ila kambaliki.

26 Kuya Absalomu kamlongela, "Ka ng'aughenda baye, lelo mleke ndughu yangu Amnoni tughende naye." Mfalume kamwidika,

"Lekeni hebali yaghende hamwe na mwemwe?" 27 Lekeni Absalomu kaghendelela kumdedetsa, mbaka mfalume kamlekelela Amnoni na wanaghe wangi waghende kuna ichihungo acho. 28 Absalomu kawalongela watumighwa wake, "Mloleseni Amnoni, hayatsakunwa na ukupatika, na nene hanitsowalongela, ‘Mtoweni Amnoni,’ mwemwe mkomeni ghendo. Alyo laghitso lyangu. Muwe na ngupfu na mleke ukupfuka." 29 Apfo, watumighwa wa Absalomu wamtendela Amnoni ka pfawalaghitsighwe na Absalomu. Kuya iwana wangi wamale wa mfalume woka, na chila yumwe kadina punda falasi wake katsuma.

30 Hawang'ali wamnzila, Daudi tsakahulika ka Absalomu kawakoma wanaghe wose, na kuduhu hata yumwe iyalekighwe mgima. 31 Mfalume Daudi kenuka, kadegha maghwanda ghake kwa usungu, kawasa hasi. Hata watumighwa wake iwemile habehi naye wadegha maghwanda ghawo. 32 Lekeni baho katsa Yonadabu mwana wa Shimea ndughu wa Daudi kamlongela, "Mkulu wangu, uleke kughamba ka wanagho wose wakomighwa. Amnoni yaliyeka yuyo iyakomighwe. Absalomu tsakabama kughatenda aghano kulawa matsuwa aghala Amnoni hayamghoghile Tamali ndughu yake na kuwasa naye kwa ngupfu. 33 Apfo, mkulu wangu mfalume uleke kughamba mna ghumoyo ghwako ka iwanagho wose wafa. Amnoni yaliyeka yuyo yakomighwe."

34 Lekeni Absalomu tsakatsuma koka. Baho imbetetsi wa ing'anda ya mfalume kona wanu wengi wakutsa kulawa mchidunda mna inzila ilawa Horonaimu. Apfo Kaghenda kumlongela mfalume aghala ghayonile. 35 Yonadabu kamlongela Daudi, "Lola mfalume, iwanagho wakutsa ka pfanikulongele nene mtumighwa wako." 36 Imtumighwa ayula hayamalitse ukulonga, iwana wamale wa mfalume wengila, wangula chililo. Mfalume na iwatumighwa wake wose nawo walila kwa usungu. 37 Lekeni Absolamu tsakatsumila kwa mfalume wa ghumji ghwa Geshuri iyakemighwe Talimai, mwana wa Amihudi. Mfalume Daudi kamlilila mwanaghe Amnoni kwa matsuwa mengi. 38 Apfo Absalomu hayatsumile kuna ghumji ghwa Geshuri, kakala ako kwa miyaka midatu. 39 Lekeni hambele, usungu wa ukufa imwanaghe Amnoni haumalile, mfalume Daudi kabama sideke kumwona imwanaghe Absalomu.