1 Hambele chidogho mfalume Nahasi kafa, na mwanage iyakemighwe Hanuni kawa mfalume.

2 Imfalume Daudi kalonga, "Nitsomtendela Hanuni uluso, imwana wa Nahashi ka aba wake pfayanitendele nene." Apfo Daudi kawatuma wasenga wakamkanze Hanuni. Nawo wasenga wa Daudi hawapfikile mna isi ya Waamoni, 3 wakulu wa Waamoni wamlongela mkulu wawo Hanuni, "Apfi koghamba Daudi pfayawatumile iwanu watse kukukanza konoghelwa na aba wako? Daudi kawatuma iwasenga waghupelembe ghumji na waghusole."

4 Apfo Hanuni kawaghogha iwasenga awala iwatumighwe na Daudi, kawagheta ndepfu tsawo ubali umwe, kaghadegha maghwanda ghawo mbaka mmadako, kuya kawaleka woke. 5 Iwanu hawamlongele Daudi imbuli ayo, Daudi kawatuma wanu waghende waketingane nawo kwaapfila tsawaghumighwa chinyala ng'ani. Naye mfalume Daudi kawalongela, "Mkale Yeriko mbaka tsindepfu tsenu hatsitsakota keli, baho muye ukaye."

6 Waamoni hawonile ka wamdesa Daudi, wawasola asikali Waaramu elufu ishilini iwoghenda kwa maghulu tangiya Beti Rehobu na Soba, pfipfila mfalume Maaka kasola asikali elufu imwe, na kulawa Tobu wasola asikali elufu kumi na weli. 7 Naye Daudi hayahulike tsimbuli atso, kamlaghitsa Yoabu yaghende na maasikali wose iwadahile ukwitowa pfinoghile. 8 Waamoni tsawalawa na kwitanda ukwitowa mna lilango lya ghumji ghwa Raba, ghumji ghwao mkulu, nawo Waaramu kulawa Soba na Rehobu na iwanu kulawa Tobu na Maaka wetanda kunyika.

9 Yoabu hayonile maasikali wema mna misululi yawo hambele na hachughu yake, kawasaghula maasikali wangi Waisiraeli iwadahile ukwitowa, kaweka wetowe na Waaramu.

10 Maasikali awala wangi iwasighale kamsaghula ndugu yake Abishai yawalongotse, kaweka wetowe na Waamoni. 11 Yoabu kamlongela Abishai, "Waaramu wang'awa na ngupfu kubita twetwe, utse unyapfile, lekeni Waamoni na ngupfu kubita ghweghwe, nitsakutsa kukwapfila. 12 Wighangamitse! Twitowe nawo kwa ngupfu ili tuwakombole iwanu wetu, na imiji ya Imulungu wetu, naye IMNDEWA katsotutendela aghala ighomnoghela."

13 Apfo Yoabu na iwanu wake waghendelela ukwitowa na Waaramu, nawo Waaramu watsuma. 14 Waamoni hawonile Waaramu watsuma, nawo pfipfila watsuma hambele ha Abishai waghenda kuna ghumji. Apfo Yoabu kaleka ukwitowa na Waamoni, koya Yerusalemu.

15 Waaramu hawonile watowighwa na Waisiraeli, wetingana hamwe. 16 Hadadezeri kawalaghitsa Waaramu iwali kumwambu mwa ghumto Eufurate watse ako Helamu aku Shobaki mkulu wa maasikali wa Hadadezeri kowalongotsa. 17 Daudi hayahulike tsimbuli atso, kawatinganitsa hamwe maasikali wose wa Waisiraeli, kaloka ghumto Yoridani kaghenda Helamu. Nawo Waaramu wetanda ghoya ili wetowe na Daudi, nawo wandusa ukwitowa naye.

18 Lekeni Waaramu watsuma hambele ha Waisiraeli. Daudi kawakoma Waaramu miya saba iwang'ali wakwendesa mituka ya ng'ondo, na wadina falasi elufu alubaini. Pfipfila kamtowa Shobaki mkulu wa maasikali wawo, naye kafila kuko.

19 Kuya wafalume wose iwali watumighwa wa Hadadezeri hawonile watowighwa na Waisiraeli, tsawelaghana na Waisiraeli waleke ukwitowa, nawo wawa watumighwa wa Waisiraeli. Apfo Waaramu wapfuka ukuwapfila keli Waamoni.