1 Iwanu wa Sauli na iwanu wa Daudi tsawetowa kwa matsuwa mengi. Ingupfu tsayongetseka na kongetseka kwa iwanu wa Daudi. Lekeni iwanu wa Sauli waghendelela kuwa nyonde nyonde.

2 Awano wawo iwana wa Daudi iwelekighwe ako Hebroni: mwanaghe chaudele tsakakemighwa Amnoni, mai wake yang'ali yokemighwa Ahinoamu kulawa Yezireeli, 3 mwanaghe wa keli tsakakemighwa Kileabu, mai wake yang'ali yokemighwa Abigaili, ichitsuka wa Nabali kulawa Karimeli, mwanaghe wa kadatu tsakakemighwa Abusalomu, mai wake yang'ali yokemighwa Maaka imwana wa Talimai mfalume wa Geshuri, 4 mwanaghe wa kane tsakakemighwa Adoniya, mai wake tsakakemighwa Hagiti, imwanaghe wa tano tsakakemighwa Shefatia, mai wake yang'ali yokemighwa Abitali, 5 na imwanaghe wa sita tsakakemighwa Itireamu, mai wake yang'ali yokemighwa Egila, mwehe wake Daudi. Wehe tsake Daudi tsawamwelekela iwana awano wose hayali ako Hebroni.

6 Iwanu wa Daudi na iwanu wa Sauli hawang'ali woghendelela ukwitowa, Abineri tsakawa na ngupfu ng'ani mna iwanu wa Sauli.

7 Sauli tsakana pinga mdodo iyakemighwe Risipa, neghe Aya. Lelo tsuwa limwe Ishibosheti kamghutsa Abineri, "Hebali uwasile na pinga wa aba wangu?" 8 Abineri kaghudubuka kwa aghala ghayalongile Ishibosheti, kalonga, "Apfi kwakwalangula nene nodaha kumbiduka Sauli na kuwa ubali wa Yuda? Lola, nene nowatendela ghanoghile ikaye ya aba wako Sauli, ndughu tsake, sale tsake na sikwikile baye mna ghamoko gha Daudi mbaka leloli. Hata apfo leloli kombona ka nene nina totso kwa ipinga ayo! 9 Imulungu yandiye ka sighatendile aghala ghose ghayamwilahile Daudi." 10 Imulungu tsakamwilahila Daudi ka katsousola ufalume wa Sauli na kumwing'a yeye. Naye katsotawala Isiraeli na Yuda kulawa Dani mbaka Beeri Sheba. 11 Ishibosheti ng'amwidike keli baye Abineri kwaapfila tsakampfuka.

12 Kuya Abineri kawatuma wasenga kwa Daudi ako Hebroni, wakamlongele, "Angu nani iyatsotawala isi aino? Wilaghane na nene, na nene nitsokwapfila kuitenda Isiraeli iwe yako."

13 Daudi kamwidika, "Pfinogha. Nitsotenda laghano na ghweghwe. Ila nokulomba chinu chimwe: Ahala hautsakutsa kumbona, uleke kutsa mbaka unighalile Mikali neghe Sauli."

14 Kuya Daudi kawatuma wasenga kwa Ishibosheti mwana wa Sauli kalonga, "Mbuyitsile pinga wangu Mikali yanimkwelile kwa mali ya magopfi miya gha Wafilisti." 15 Baho Ishibosheti kawatuma wanu wakamsole Mikali kulawa kwa mmale wake Palitieli imwana wa Laishi. 16 Lekeni Palitieli kaghenda hamwe na ipinga wake aku kolila mnzila mbaka ako Bahurimu. Abineri kamlongela Palitieli, "Uye ukaye." Naye koya.

17 Abineri kaghenda kuna wapfilongotsi wa Isiraeli, kawalongela, "Kwa matsuwa mengi ighapfosile mng'ali mbama Daudi yawe mfalume wenu. 18 Lelo muighale hatselu imbuli ayo kwaapfila IMNDEWA tsakamlongela Daudi apfino, ‘Kwa kubitila Daudi mtumighwa wangu, nitsowakombola iwanu wangu wa Isiraeli kulawa mna ghamoko gha Wafilisti na kulawa mna awala wose iwowehila.’" 19 Pfipfila Abineri kalonga na iwanu wa likabila lya Benjamini, kuya kaghenda mbaka Hebroni kumlongela Daudi aghala ghawelaghane ukutenda iwanu wose wa Isiraeli na kabila lyose lya Benjamini.

20 Abineri hayamghendele Daudi, tsakana wanu ishilini, naye Daudi kawatendela chihungo cha ipfijo. 21 Abineri kamlongela Daudi, "Lelo nene nitsoghenda nikakughalile wanu wose wa Isiraeli, ghweghwe mndewa wangu mfalume. Watsakutsa mwilaghane, ili uwe mfalume wawo, naghwe kutsowatawala wose ka pfubama." Baho Daudi kamuwagha Abineri, naye koka tseghamba.

22 Hambele, Yoabu na iwanu wangi wa Daudi woya kulawa kung'ondo, waghala pfinu pfingi pfawabokile. Lekeni Abineri tsa ng'ali hamwe baye na Daudi ako Hebroni, kwaapfila Daudi tsakamuwagha koka, naye Abineri koka tseghamba. 23 Yoabu hayoile na maasikali wake, kalongelighwa ka Abineri mwana wa Neri tsakatsa kumwona mfalume Daudi, naye kamuwagha yoke, naye koka tseghamba. 24 Yoabu kamghendela mfalume kamlongela, "Lelo utendile choni? Abineri katsa kuna ghweghwe, lelo heule umlekile yoke? 25 Ghweghwe kommanya ghoya Abineri mwana wa Neri, miyagho katsa kukubugha, katsa yamanye pfaukala, na chila chinu chautenda."

26 Yoabu hayamlekile Daudi, kawatuma wasenga wakamuyitse Abineri, nawo wampfika kuna ichisima cha Sira na wambweletsa, lekeni Daudi tsang'amanyile baye ichinu acho.

27 Abineri hayoile Hebroni, Yoabu kamsola hambalimbali ha lilango kwaapfila tsaketenda ka kobama yalonge naye chinyele. Kuya Yoabu kamuhoma munda Abineri, kwaapfila tsakamkoma ndughu yake Asaheli, naye kafa. 28 Hambele Daudi hayahulike tsimbuli atso kalonga, "Nene na ufalume wangu twahela totso hambele ha IMNDEWA kwa ukukomighwa kwa Abineri mwana wa Neri. 29 Na yahighighwe Yoabu na ikaye yose ya aba wake! Ikaye ya Yoabu matsuwa ghose ileke kukala bila munu yana utamu wa chisonono, au ukoma, au yoghendela ng'weku, au yokomighwa kwa lipanga, au yalihela chijo!"

30 Yoabu na ndughu yake Abishai wamkoma Abineri kwaapfila tsakamkoma ndughu yawo Asaheli mng'ondo ako Gibeoni.

31 Kuya mfalume Daudi kamlongela Yoabu na iwanu wose iwakalile hamwe naye wadeghe maghwanda ghao, wapfale maghunila wamlilile Abineri. Ichipindi cha ukutsika, mfalume Daudi yang'ali yoghenda kuchughu kwa lijenetsa.

32 Abineri katsikighwa ako Hebroni, na mfalume katula ndilo mmbalimbali mwa likabuli, kuya iwanu wangi nawo watenda pfipfo. 33 Mfalume kamlila Abineri kalonga,

"Tsayuiletsa Abineri yafe ka mbotsi?

34 Ghamoko ghako ng'aghohighwe baye.

Na ghamaghulu ghako ng'aghohighwe baye.

Tsakufa ka imunu yakomighwe na iwanu wehile!"

Na iwanu wose wongetsa ukumlilila.

35 Kuya iwanu wose waghenda kumlongela Daudi yaje chighate kung'ali misi. Lekeni Daudi kelaha kalonga, "Imulungu yandiye ka nitsakuja chighate au chinu chochose ng'ana litsuwa liswe!" 36 Iwanu wose waghona agho, apfo tsawatoghola chila chinu chayatendile mfalume pfachiwanoghele. 37 Apfo mna litsuwa alyo, Waisiraeli wose wamanya ka mfalume Daudi ng'abamile baye kumkoma Abineri mwana wa Neri. 38 Mfalume Daudi kawalongela watumighwa wake, "Apfi ng'ammanya baye ka leloli munu mkulu na yomanyika ng'ani kafa mna isi ya Isiraeli? 39 Hata ka mnibaka mapfuta niwe mfalume, lekeni leloli nene nitenyuka. Na iwana awano wa Seruya nene siwadaha baye. IMNDEWA yawahighe kwa ghamatendo ghawo ghehile ghawatendile."