1 Tsakulawila nzala ng'ulu ya miyaka midatu mna ghamatsuwa ghayalongotse mfalume Daudi. Apfo Daudi tsakamlomba IMNDEWA, naye kamwidika kalonga, "Inzala ilawila kwaapfila Sauli na iwanu wa ikaye yake wonung'a idamu ya iwanu, wawo wawakoma Wagibeoni." 2 Wagibeoni tsa si wana wa Isiraeli baye, lekeni tsa watsukulu wa Waamoni iwawalekile. Waisiraeli tsawelighita ka ng'awatsowakoma baye, lekeni Sauli tsakabama kuwakoma, kwaapfila tsakabama isi yose iwe yawo iwanu wa Isiraeli na Yuda. Apfo mfalume Daudi kawakema Wagibeoni, kalonga nawo. 3 Kawaghutsa Wagibeoni, "Nimtendeleni choni ili iwanu wa IMNDEWA waleghusighwe inzambi aino kwa aghala ighehile ghamtendelighwe?"

4 Wagibeoni wamwidika, "Twetwe ng'atubama baye munu wowose yatulihe fetsa wala nzahabu kwa lighomba lyetu na Sauli na iwanu wa ikaye yake, wala twetwe ng'atubama baye kumkoma munu wowose mna isi ya Isiraeli." Mfalume kawaghutsa keli, "Angu lelo mwobama niwatendele choni?"

5 Wawo wamwidika imfalume, "Sauli tsakabama kutukoma twetwe, tuhupe ghendo na ng'abamile baye munu wowose mna twetwe yawe na hanu ha ukukala mna isi ya Isiraeli. 6 Lelo twing'e wanaghe saba iwamale tuwakome hambele ha IMNDEWA mna ichidunda cha Gibea, kuna ghumji ghwa Sauli, iyasaghulighwe na IMNDEWA." Naye mfalume kawedika, "Nitsomwing'ani." 7 Lekeni mfalume ng'aweng'ile baye Mefibosheti mwana wa Yonasani, iyali mtsukulu wa Sauli, kwaapfila Daudi na Yonasani mwana wa Shauli tsaweka laghano hambele ha IMNDEWA. 8 Lekeni mfalume kawasola Arimoni na Mefibosheti, iwana weli wa Risipa neghe Ahiya, iyeleke na Sauli. Pfipfila kawasola iwana wose watano iwamale wa Mikali, neghe Sauli iyamwelekele Adirieli mwana wa Barizilai, Mmeholati. 9 Daudi kawaghala iwanu awo saba kwa Wagibeoni, nawo wawakondeka mna ichidunda habehi na hanu hawamtambikile IMNDEWA. Wose saba wafa hamwe. Wawakoma iwanu awo mna ghamatsuwa gha ukwanza ukupfuna ishayili.

10 Kuya Rispa neghe Ahiya, kasola maghunila katandika mna libambalawe. Kakala aho tangiya msimu ghwa ukupfuna haghwanzile mbaka msimu ghwa imvula haghupfikile, nayo imvula iwatowela iwanu awo iwafile. Matsuwa agho ghose yang'ali yowawinga wapfideghe na iwanyama wa kwibagho chilo na misi waleke kupfika hana iwanu iwafile.

11 Daudi hayahulike aghala ghayatendile Risipa neghe Ahiya, pinga mdodo wa Sauli, 12 kaghenda kuisola imipate ya Sauli na Yonasani, imwanaghe, kulawa kuna iwanu wa Yabeshi Gileadi, iwebile imipate ayo kulawa hana ichibwalu cha ukwitinganila iwanu wose ako Beti Shani, hanu wafilisti hawawakondeke Sauli na Yonasani mna litsuwa alila Wafilisti hawamkomile Sauli kuchidunda cha Giliboa. 13 Apfo Daudi kayuitsa imipate ya Sauli na mwanaghe Yonasani, kuya wasola imipate ya iwanu saba iwakondekighwe. 14 Kuya iwanu wa Daudi waitsika imipate ya Sauli na Yonasani, imwanaghe, mna Isi ya Benjamini, mna likabuli lya Kishi aba wake Sauli ako Sela. Tsawatenda chila chinu chayawalaghitse mfalume. Haghamalile agho, Imulungu kahulika ichililo cha isi yawo.

15 Wafilisti waghenda kwitowa keli na Waisiraeli. Daudi na iwanu wake wahulumka waghenda kwitowa nawo. Kuko Daudi tsakepfa sideke.

16 Tsinu limwe likemighwe Ishibi Benobu, kulawa mna ilukolo lwa Warefai, tsakana mgoha ghuna utsito wa kilo ndatu na nusu, na tsayeyohile lipanga lya sambi, kalonga yang'amkomile Daudi.

17 Lekeni Abishai mwana wa Seruya kaghenda kumwapfila Daudi. Abishai kamtowa Mfilisti ayula mbaka kamkoma. Apfo iwanu wa Daudi welaha hambele hake walonga, "Ghweghwe ng'utsoghenda keli na twetwe baye kung'ondo, ng'atubama baye itala ya Isiraeli itsimike."

18 Haghamale agho kulawila keli ng'ondo na Wafilisti ako Gobu. Baho Sibekai, Mhushati kamkoma Safu, wa ilukolo lwa Warefai, imitsinu.

19 Waisiraeli tsawetowa keli na Wafilisiti ako Gobu. Naye Elihanani mwana wa Yaareo Regimu, Mbetilehemu kamkoma Goliati, iyolawa Gati iyana mgoha ka mfundatsi ghwa chinanda.

20 Hambele chidogho Waisiraeli wetowa na Wafilisti ako Gati, tsahana tsinu tali lina pfidole sita chila ghumoko, na pfidole sita chila mghulu, pfosepfose pfidole ishilini na pfine. Pfipfila yeye tsakalawa mna ilukolo lwa Warefai. 21 Ayo kawaligha Waisiraeli, apfo Yonasani mwana wa Shama ndughu yake Daudi kamkoma.

22 Wose awo wane tsawalawa mna liukolo lwa Warefai ako Gati, nawo wakomighwa na Daudi hamwe na maasikali wake.