1 Haghamalile agho, mfalume Daudi kawatowa na kawahuma Wafilisti. Kaghusola ghumji ghwa Metegi Ama kulawa mna ghamoko gha Wafilisti.

2 Kuya kawahuma Wamoabu. Kawawasitsa hasi mna misululo, kawalinga kwa lutsabi. Chila iyawalingile utali wa ilutsabi mala mbili, iwanu awo kawakoma, na awala iyawalingile mala lumwe kwa utali wa ilutsabi alwo kawaleka wagima. Apfo Wamoabu wawa watumighwa wa Daudi na wang'ali womliha kodi.

3 Pfipfila Daudi hayang'ali mnzila koghenda kuyuitsa isi ili habehi na ghumto ghwa Efurate iwe yake keli, kamtowa Hadadezeri imwana wa Rehobu, mfalume wa Soba. 4 Daudi kamboka wadina falasi wake elufu imwe na miya saba na masikali iwoghenda kwa maghulu elufu ishirini. Kuya Daudi kawaghana nyughe tsa mmaghulu falasi wose wa mituka ya ukukweghighwa, ila kawaleka falasi miya imwe iwokwegha mituka. 5 Waaramu wa Damasko hawaghendile kumwapfila Hadadezeri, mfalume wa Soba, Daudi kawakoma Waaramu elufu ishilini na weli.

6 Kuya Daudi tsakeka ndalo tsa maasikali mna ghumji ghwa Waaramu wa Damasko. Apfo Waaramu tsawawa watumighwa wake na wang'ali womliha kodi. IMNDEWA kamtenda Daudi yahume kokose kwayaghendile. 7 Daudi tsakatsisola tsingawo tsa nzahabu tsawaghalile wakulu wa maasikali wa Hadadezeri katsighala Yerusalemu. 8 Pfipfila kasola shaba nyingi kulawa mna imiji ya Beta na Berotai, imiji ya Hadadezeri.

9 Mfalume Toi wa Hamati, hayaulike Daudi kawahuma maasikali wose wa Hadadezeri, 10 kamtuma Yoramu imwanaghe kwa mfalume Daudi yakamlamse, kwaapfila tsaketowa na Hadadezeri na kumuhuma. Kwaapfila Hadadezeri tsaketowa na Toi mala nyingi. Yoramu kamghalila nzawadi tsa pfinu pfa fetsa, nzahabu na shaba. 11 Tsinzawadi atso, hamwe na ifetsa na inzahabu tsayasolile mna tsiisi tsose tsatsitowile, katsilapfa tsiwe tsa IMNDEWA.

12 Tsiisi atso tsitso atsino: Edomu, Moabu, Amoni, Filistia, Amaleki, hamwe na pfinu pfasolile kwa mfalume Hadadezeri, mwana wa Rehobu mfalume wa Soba.

13 Ukumanyika kwa Daudi tsakongetseka ng'ani. Hayang'ali yakuya ahala hayalawile kumtowa Hadadezeri, tsakawakoma Waedomu elufu kumi na nane mna Lwanda lwa Munyu. 14 Daudi keka ndalo ya maasikali mna isi yose ya Edomu. Nawo Waedomu wose wawa watumighwa wake. IMNDEWA kamtenda Daudi yawahume iwanu kokose kwayaghendile.

15 Apfo Daudi tsakatawala Isiraeli yose, tsakalamla iwanu wake wose watendelighwe ka pfaibamighwa na bila kubaghula munu baye. 16 Yoabu mwana wa Seruya, tsa mkulu wa maasikali. Yehoshafati mwana wa Ahiludi, yang'ali yakwandikagha aghala ighalawile ili ghaleke ukusemwighwa. 17 Sadoki mwana wa Ahitubu na Ahimeleki mwana wa Abiatari wawo tsa watambika, Seraya yeye tsa mwandishi. 18 Benaya mwana wa Yehoyada tsa mkulu wa Wakereti na Wapeleti, nawo iwana wa Daudi wakala wakulu iwomwapfilagha mfalume.