1 Daudi kawakema keli maasikali iwadahile ukwitowa pfinoghile mna Isiraeli, nawo tsawapfika elufu selasini. 2 Daudi hamwe na iwanu wake waghenda Baala Yuda, kulisola lisanduku lya laghano ilikemighwa kwa taghwa lya IMNDEWA yana ingupfu, iyokala mna chighubiko cha lisanduku lya lilaghano ichili haghati ha wapfilumbe iwana ghamabawa iwakemighwe makelubi. 3 Apfo walisola lisanduku lya IMNDEWA kulawa mna ing'anda ya Abinadabu ili mchidunda, walidinitsa mna ghumtuka ghwa sambi ghwa ukukweghighwa. Uza na Ahio iwana wa Abinadabu wang'ali woghwendesa ghumtuka aghwo, 4 ighudutile lisanduku alyo lya Imulungu, naye Ahio tsakalongola hambele ha lisanduku alyo. 5 Daudi na iwanu wose wa Isiraeli, wang'ali wakwimba na kubigha kwa ngupfu tsawo tsose hambele ha IMNDEWA. Tsawatowa pfilimba, pfimbeta, pfigoma, keyamba na matari.

6 Hawapfikile kuna ichibwalu cha ukubetela ingano cha Nakoni, Uza kagholosa ghumoko ghwake kalikinda lisanduku lya Imulungu, kwaapfila wang'ombe awala tsawekwala. 7 Baho IMNDEWA kamghudubukila Uza. Apfo Imulungu kamkoma Uza, na bahala Uza kafa hambalimbali ha lisanduku lya Imulungu. 8 Naye Daudi tsakona usungu kwaapfila IMNDEWA kamghudubukila Uza kamkoma. Apfo hanu aho hokemighwa Peresi Uza mbaka leloli.

9 Litsuwa alyo Daudi kampfuka IMNDEWA kalonga, "Lelo lisanduku lya IMNDEWA litsopfikatse kuna nene?" 10 Apfo, Daudi kaleka ukulighala lisanduku lya IMNDEWA mna ghumji ghwa Daudi, ila kalighala ukaye kwa Obedi Edomu, imunu wa ghumji ghwa Gati. 11 Lisanduku alyo lya IMNDEWA tsalikala ukaye kwa Obedi Edomu kwa miyetsi midatu, naye IMNDEWA kambaliki Obedi Edomu, iwanu wa ikaye yake, na chila chinu chayenacho.

12 Mfalume Daudi hayahulike ka IMNDEWA kawabaliki iwanu wa ikaye ya Obedi Edomu na pfinu pfose pfayali napfo kwaapfila kana sanduku lya Imulungu, kaghenda kulisola lisanduku lya laghano ukaye kwa Obedi Edomu kalighala mna ghumji ghwa Daudi kwa ukudeng'elela. 13 Iwanu awala iwalighalile lisanduku lya IMNDEWA chila hawaghendile maghulu sita, Daudi kalapfa nambiko, kalapfa ng'ombe yumwe na ndama iyanenehe. 14 Daudi kabigha kwa ngupfu tsake tsose hambele ha IMNDEWA, aku keyoha chitsibao cha mtambika. 15 Apfo, Daudi na Waisiraeli wose walihilika lisanduku lya IMNDEWA kwa ukudeng'elela na kwa kutowa tsimalati.

16 Lisanduku lya IMNDEWA haling'ali likwingila mna ghumji ghwa Daudi, Mikali neghe Sauli kasungulila mdilisha, kamwona mfalume Daudi kodalukadaluka na kubigha hambele ha IMNDEWA, naye kambetsa mmoyo mwake. 17 Kuya walighala lisanduku lya IMNDEWA mna lihema ilitindimikighwe na Daudi na kulika hanu hake. Naye Daudi kalapfa nambiko tsa ukulakatsighwa na nambiko tsa ukukala tseghamba hambele ha IMNDEWA.

18 Daudi hayamalitse ukulapfa nambiko tsa ukulakatsighwa na tsa ukukala tseghamba, kawabaliki iwanu kwa taghwa lya IMNDEWA yana ingupfu ng'ani, 19 na kamgholela chila munu mna ghumtingano ghose ghwa Waisiraeli, wamale kwa wapinga, chila yumwe chighate, chitomo cha nyama na chighate cha nzabibu. Kuya iwanu wose woka, chila munu koya ukaye yake.

20 Daudi hayoile ukaye yake ili yawabaliki iwanu wake, Mikali neghe Sauli, kaghenda kumbokela, kalonga, "Lola, mfalume wa Isiraeli pfayatunyighwe leloli! Kepambula ghamaghwanda hambele ha iwatumighwa wake mapinga na iwamale, ka imunu mbotsi pfayotsula maghwanda ghake hambele ha iwanu bila kwona chinyala!"

21 Daudi kamlongela Mikali, "Ning'ali nimbighila IMNDEWA, iyanisaghule nene na kumleka aba wako na iwanu wa ilukolo lwake, yeye kanenda niwe mkulu wa iwanu wake wa Isiraeli. Apfo nitsoghendelela kubigha hambele ha IMNDEWA. 22 Nitsehulumsa kubita sambi. Ghweghwe kwombona si chinu baye, lekeni iwatumighwa mapinga awala yaulongile watsonitoghola."

23 Apfo Mikali neghe Sauli ng'eleke mwana baye mbaka kafa.