1 Yoabu mwana wa Seruya, tsakamanya ghendo ka mfalume Daudi kobama sideke kumwona imwanaghe Absalomu. 2 Apfo kawatuma wanu waghende Tekoa wakambamile ipinga iyakengele. Hawamghalile, kamlongela, "Witende ka kuna chililo. Upfale maghwanda gha ukudomboketsa, uleke kwibaka mapfuta, witende ka ipinga iyodomboketsa kwa matsuwa mengi. 3 Kuya ughende kwa mfalume ukamlongele aghano ghanikulongela." Apfo Yoabu kamlongela cha ukulonga.

4 Ipinga ayo kalawa Tekoa kaghenda kwa mfalume, kamwinamila mbaka uhanga wake udonza hasi, kamlongela, "Ghwe mfalume unyapfile."

5 Mfalume kamlongela, "Ubama choni?" Ipinga ayula kamwidika, "Nene nachitsuka, immale wangu kafa. 6 Tsanina wana wamale weli. Tsuwa limwe hawang'ali wa kwibagho tsawesonga. Kwaapfila tsakuduhu munu wowose wa kuwalamla, mwanangu yumwe kamkoma miyaghe. 7 Lelo ndughu tsangu wose wanihundukila nene mtumighwa wako, wabama niweng'e imwanangu iyamkomile miyaghe nawo wamkome, kwaapfila pfayamkomile ndughu yake. Wang'atenda apfo, nitsokala nahela ghendo mwana wa kuhala isi yangu. Apfo watsotsima ghendo itala yangu ikalile, pfipfila litaghwa na lukolo lwa mmale wangu litsohupa ghendo mna isi."

8 Mfalume kamlongela ipinga ayula, "Uye ukaye yako, nitsolaghitsa choni chitendeke."

9 Ipinga ayula kulawa Tekoa kalonga, "Mkulu wangu mfalume, ka chanikulomba chakoneka totso, totso alyo liwe lyangu nene na lya iwanu wa ing'anda ya aba wangu, lekeni lileke kuwa lya mfalume na ufalume wako."

10 Mfalume kamlongela, "Imunu wowose iyatsokutsupfa mghale kuna nene, naye ng'atsokuyila keli baye."

11 Ipinga ayula kamlongela, "Nokulomba mfalume, umkumbuke IMNDEWA, Imulungu wako, uwaghome ndughu tsangu iwobama kumkoma imwanangu kwa kumkoma miyaghe, waleke kumwagha keli idamu." Mfalume Daudi kamwidika, "Nelaha kwa IMNDEWA iyali mgima, kuduhu hata lupfili lumwe lwa imwanagho ilutsolaghala hasi."

12 Ipinga ayula kamlongela, "Nokulomba, nene mtumighwa wako, nonge chinu chimwe kuna ghweghwe," Mfalume kamlongela, "Longa." 13 Ipinga ayula kamlongela, "Hebali utendile chinu achino chihile kwa iwanu wa Imulungu? Ng'aumlekelele baye imwanagho yoye kulawa kwayatsumile, lelo kwehigha ghumwenyegho kwa achila chaulongile. 14 Twetwe ka ghamatsi ighakwitika hasi, kuduhu yodaha kughatsola, wose twakufa. Hata Imulungu ng'owoyitsa baye iwanu wafile wawe wagima, ila mfalume kodaha ukubama inzila ya ukumuyitsa ayula iyatsumile kutali, yoye. 15 Nene nitsa kulonga na ghweghwe mkulu wangu mfalume, kwaapfila iwanu wanenda nipfuke, tsanonga, ‘Lelo nene mtumighwa wako tsanonga, leka ng'ende nikalonge na mfalume songaa katsongaya chanibama nene mtumighwa wake. 16 Yeye katsonitegheletsa na kunikombola kulawa kwa imunu iyobama kunikoma nene na imwanangu kulawa kuna isi iyatwing'ile Imulungu.’ 17 Lelo nene mtumighwa wako nolonga, ‘Imbuli ya mkulu wangu mfalume itsongaya ingupfu mmoyo mwangu kwaapfila ghweghwe mfalume kweghala na imalaika wa Imulungu mna ukumanya ighanoghile na ighehile. Naye IMNDEWA, Imulungu wako yawe hamwe naghwe.’" 18 Kuya mfalume kamwidika ipinga ayula, "Uleke kunipfisa chinu chochose chanikughutsa." Ipinga ayula kalonga. "Longa mkulu wangu mfalume."

19 Mfalume kamghutsa, "Apfi si Yoabu baye iyakulongele utende apfino?" Ipinga ayula kalonga, "Nelaha kuna ghweghwe mkulu wangu mfalume iyuli mgima, kuduhu imunu iyodaha kubela kukulongela achila ichilongesa kwa acho chaulonga mkulu wangu mfalume. Yeye Yoabu ghendo mtumighwa wako iyanongele nonge apfino. 20 Yoabu tsakatenda apfo ili walangule chinu chingi keli. Lekeni ghweghwe mkulu wangu, kukengela na komanya chila chinu ichitendeka muisi ka imalaika wa Imulungu."

21 Kuya mfalume kamkema Yoabu, kamlongela, "Pinogha, lelo nitoghola kutenda chaubama. Ughende ukamuyitse imsongolo Absalomu."

22 Yoabu kenama mbaka uhanga wake udonza hasi, kambaliki mfalume, kalonga, "Leloli kunendela uluso nene mtumighwa wako, ghweghwe mkulu wangu mfalume, kwaapfila kunitogholela achila chanikulombile." 23 Apfo Yoabu koka Geshuri, kamuyitsa Absalomu mna isi ya Yerusalemu. 24 Lekeni mfalume kalonga, "Absalomu yoke yakakale kutali, kuna ing'anda yake, yaleke kwona ichihanga changu." Apfo Absalomu kaghenda ukaye yake, naye ng'achonile baye ichihanga cha mfalume.

25 Mna Isiraeli yose tsakuduhu munu wowose yatunyighwe kwa ukunogha ka Absalomu. Kwanzila kwitsayo kwake mbaka kuchihanga tsakahela ng'opfu yoyose baye. 26 Yang'ali yobeyagha tsimvili tsake chila ghumwaka hatsiwile ng'ulu na nito, na hayatsilingile tsing'ali tsipfikagha kilo mbili kwa kulingila ipfinu pfawalingile wafalume. 27 Absalomu tsakana wana wamale wadatu, na mwana pinga yumwe iyakemighwe Tamari, naye Tamari tsakanogha sideke.

28 Lelo, Absalomu tsakakala mna ghumji ghwa Yerusalemu kwa miyaka mili, na ng'onile baye chihanga cha mfalume Daudi. 29 Kuya, Absalomu kamkema Yoabu yamtume yaghale usenga kwa mfalume, lekeni Yoabu kalema. Kamkema lwakeli lekeni Yoabu kalema keli ukutsa. 30 Baho Absalomu kawalongela iwatumighwa wake, "Lola, Yoabu kana mghunda ghwa ishayili habehi na mghunda ghwangu. Ghendani mkaghulakatse." Apfo iwatumighwa wa Absalomu waghenda kughulakatsa mghunda ghwa Yoabu.

31 Yoabu kaghenda ukaye kwa Absalomu kamghutsa, "Hebali watumighwa wako waghulakatsa ghumghunda ghwangu?"

32 Absalomu kamwidika, "Lola, tsanikukema utse akuno nikutume kwa mfalume, ukamghutse, ‘Heule mbuyile kulawa Geshuri? Tsapfinogha nene nikale kuko.’ Lelo unyapfile mbone ichihanga cha mfalume. Ka nenda totso yanikome!"

33 Apfo Yoabu kaghenda kwa mfalume, kamlongela agho ghose. Kuya mfalume kamkema Absalomu, naye kaghenda kwa mfalume, kenama mbaka uhanga wake udonza hasi. Na mfalume kamnonela Absalomu.