1 Daudi hayatsingile chidogho kunzingo kwa ichidando, baho ketingana na Siba, mtumighwa wa Mefibosheti kombeta, tsakana pfihongwe weli iwadutile pfighate miya mbili, pfikungwi miya pfa nzabibu tsinyalile, na matunda miya imwe gha msimu ghwa chiyangatsi, na mkoba ghwa ngotsi ighumemile dipfai. 2 Mfalume kamghutsa Siba, "Hebali ughalile pfinu apfino?" Siba kamwidika, "Wapfihongwe watsowadina iwanu wa ikaye yako, ipfighate na tsinzabibu watsakuja wasongolo wose, idipfai watsakunwa iwanu iwatsotsilika kunyika."

3 Mfalume kamghutsa, "Mefibosheti, imwana wa mkulu wako, yalikwani?" Siba kamlongela mfalume, "Yeye kakala Yerusalemu kwaapfila kalonga, ‘Leloli iwanu wa Isiraeli wombuyitsila ufalume wa sekulu wangu Sauli.’ "

4 Baho mfalume kamlongela Siba, "Lelo chila chinu cha Mefibosheti cha kwako." Siba kamlongela, "Mighede mkulu wangu mfalume, Nene nolomba unitendele wende wako wa ghamatsuwa ghose."

5 Daudi hayapfikile Bahurimu, tsakalawila munu yumwe wa lukolo lwa Sauli, taghwa lyake Shimei mwana wa Gera, kandusa kumlighita Daudi aku koghenda mmbalimbali mwa inzila. 6 Yang'ali yomwasila ghamabwe mfalume Daudi hamwe na watumighwa wake. Iwatumighwa wake wose, na iwakalitsi wake tsawamtsunguluka Daudi kujilo na kumoso. 7 Shimei kamlighitia Daudi, kalonga, "Ghenda ako, ghenda ako, ghweghwe mkoma wanu, ghweghwe ng'uli minu ghendo baye! 8 IMNDEWA kakuyitsila ghautendile kwa kuwakoma iwanu wose wa ikaye ya Sauli, na sambi MNNDEWA kamsaghula imwanagho Absalomu yawe mfalume. Lelo, koghaya kwaapfila ghweghwe kukoma wanu wengi."

9 Kuya Abishai mwana wa Seruya, kamlongela mfalume, "Hebali yumbwa ayuno yafile yokulighita ghweghwe mkulu wangu mfalume? Undeke ng'ende nikaghane litwi lyake."

10 Lekeni mfalume kalonga, "Angu nene nina choni na mwemwe iwana wa Seruya? Ka IMNDEWA kamlongela, ‘Mlighite Daudi,’ Nani yodaha kughutsa, ‘Hebali utenda apfo?’"

11 Lekeni mfalume Daudi kamlongela Abishai na watumighwa wake wose, "Ka imwanangu mwenyegho kobama yanikome. Lelo imunu ayuno wa likabila lya Benyamini yatsolekatse ukutenda apfino? Mwemwe mlekeni yanilighite kwaapfila IMNDEWA kamlaghitsa yanilighite. 12 Songaa IMNDEWA katsolola apfino pfanighaya, na katsoniliha ighanoghile kwa ukulighitighwa akuno kwanilighitighwa leloli." 13 Apfo mfalume Daudi na iwanu wake waghendelela na ghumwanza ghwao aku Shimei yang'ali yoghenda mmbalimbali mwa ichidunda komkoleletsa Daudi mwambu na mwambu. Shimei yang'ali yomlighita Daudi na kumwasila ghamabwe, na kumdimlila litimbwisi aku koghenda. 14 Kuya mfalume na iwanu iwakalile hamwe naye, wapfika kuna ghumto Yoridani aku wepfa ghendo, na baho wabwihila.

15 Apfo Absalomu na iwanu wose wa Isiraeli, wapfika kuna ghumji ghwa Yerusalemu hamwe na Ahitofeli. 16 Hushai kulawa Ariki, sale yake Daudi, kamghendela Absalomu, kamlongela, "Imulungu yakwike mgima mfalume! Imulungu yakwike mgima mfalume!"

17 Absalomu kamlongela Hushai, "Angu apfi pfipfo pfaumkunda sale yako Daudi? Hebali ng'ughendile baye na isale yako?"

18 Hushai kamwidika, "Baye! Ayula iyasaghulighwe na IMNDEWA, na iwanu awano wose, na Waisiraeli wose, ayo yuyo nene nitsakuwa wake, na yuyo yanitsokala naye. 19 Kubita agho, nene nimtumikile nani? Angu si imwana wa sale yangu baye? Nitsomtumikila yeye ka pfanimtumikile aba wako."

20 Kuya Absalomu kamlongela Ahitofeli, "Nilongele, lelo tutende choni?"

21 Ahitofeli kamlongela Absalomu, "Uwase na mapinga wadodo wa aba wako wayawalekile walolese ing'anda ya mfalume. Na iwanu wa Isiraeli watsohulika ka ghweghwe komtenda aba wako yakuhile, apfo iwanu wose iwokuwinza ghweghwe watsoghumighwa ngupfu." 22 Apfo, iwanu wamtindimikila Absalomu hema mchanya mwa ing'anda ya mfalume, naye Absalomu kawengilila mapinga wadodo wa aba wake aku Waisiraeli wose wolola.

23 Matsuwa agho, ushauli wowose wayalongile Ahitofeli tsa woneka ka ulapfighwa na Imulungu! Na chochose chayalongile tsachiwinzighwa na Daudi na Absalomu.